ਰਿਆਧ, 5 ਨਵੰਬਰ (ਪੋਸਟ ਬਿਊਰੋ)- ਸਾਊਦੀ ਅਰਬ ਦੀ ਸਰਕਾਰ ਨੇ ਅਰਬਪਤੀ ਪ੍ਰਿੰਸ ਅਲ ਵਲੀਦ ਬਿਨ ਤਲਾਲ ਦੇ ਭਰਾ ਪ੍ਰਿੰਸ ਖਾਲਿਦ ਨੂੰ ਇਕ ਸਾਲ ਹਿਰਾਸਤ 'ਚ ਰੱਖਣ ਪਿੱਛੋਂ ਛੱਡ ਦਿੱਤਾ ਹੈ। ਪੱਤਰਕਾਰ ਜਮਾਲ ਖਸ਼ੋਗੀ ਦੀ ਹੱਤਿਆ ਦੇ ਮਾਮਲੇ ਵਿੱਚ ਅੰਤਰਰਾਸ਼ਟਰੀ ਦਬਾਅ ਦਾ ਸਾਹਮਣਾ ਕਰ ਰਹੀ ਸਾਊਦੀ ਸਰਕਾਰ ਨੇ ਖਾਲਿਦ ਨੂੰ ਅਚਾਨਕ ਰਿਹਾਅ ਕਰਨ ਦਾ ਕੋਈ ਕਾਰਨ ਨਹੀਂ ਦੱਸਿਆ ਹੈ।
ਵਰਨਣ ਯੋਗ ਹੈ ਕਿ ਪਿਛਲੇ ਸਾਲ ਨਵੰਬਰ ਵਿੱਚ ਸਾਊਦੀ ਅਰਬ ਦੇ ਵਾਰੇਨ ਬਫੇਟ ਕਹੇ ਜਾਣ ਵਾਲੇ ਪਿੰ੍ਰਸ ਅਲ ਵਲੀਦ ਸਮੇਤ ਦੇਸ਼ ਦੇ ਦਰਜਨਾਂ ਪ੍ਰਿੰਸ ਨੂੰ ਰਾਜਧਾਨੀ ਰਿਆਧ ਦੇ ਆਲੀਸ਼ਾਨ ਰਿਟਜ਼ ਕਾਰਲਟਨ ਹੋਟਲ ਵਿੱਚ ਨਜ਼ਰਬੰਦ ਕਰ ਦਿੱਤਾ ਗਿਆ ਸੀ। ਸਾਊਦੀ ਅਰਬ ਸਰਕਾਰ ਨੇ ਇਸ ਨੂੰ ਭਿ੍ਰਸ਼ਟਾਚਾਰ ਖਿਲਾਫ ਵੱਡੀ ਕਾਰਵਾਈ ਕਰਾਰ ਦਿੱਤਾ ਸੀ, ਪ੍ਰੰਤੂ ਆਲੋਚਕਾਂ ਦਾ ਕਹਿਣਾ ਹੈ ਕਿ ਇਹ ਕਰਾਊਨ ਪ੍ਰਿੰਸ ਮੁਹੰਮਦ ਬਿਨ ਸਲਮਾਨ ਦਾ ਆਪਣੇ ਵਿਰੋਧੀਆਂ ਨੂੰ ਬੰਨੇ ਲਾਉਣ ਅਤੇ ਸੱਤਾ ਉਤੇ ਆਪਣੀ ਪਕੜ ਮਜ਼ਬੂਤ ਕਰਨ ਦਾ ਯਤਨ ਸੀ। ਪ੍ਰਿੰਸ ਖਾਲਿਦ ਨੇ ਸਰਕਾਰ ਦੇ ਇਸ ਕਦਮ ਦੀ ਆਲੋਚਨਾ ਕੀਤੀ ਸੀ, ਜਿਸ ਪਿੱਛੋਂ ਉਨ੍ਹਾਂ ਨੂੰ ਹਿਰਾਸਤ ਵਿੱਚ ਲੈ ਲਿਆ ਗਿਆ ਸੀ। ਸਰਕਾਰ ਨਾਲ ਗੁਪਤ ਵਿੱਤੀ ਸਮਝੌਤੇ ਪਿੱਛੋਂ ਪਿੰ੍ਰਸ ਅਲ ਵਲੀਦ ਨੂੰ ਇਸ ਸਾਲ ਜਨਵਰੀ ਵਿੱਚ ਰਿਹਾਅ ਕਰ ਦਿੱਤਾ ਗਿਆ ਸੀ। ਸਾਊਦੀ ਅਰਬ ਨੇ ਸ਼ਾਹੀ ਪਰਵਾਰ ਦੇ ਮੈਂਬਰਾਂ ਨਾਲ ਸਬੰਧ ਮਜ਼ਬੂਤ ਕਰਨ ਦੀ ਯੋਜਨਾ ਬਣਾਈ ਹੈ ਅਤੇ ਸੰਭਾਵਨਾ ਹੈ ਕਿ ਰਿਆਧ ਦੇ ਸਾਬਕਾ ਗਵਰਨਰ ਪ੍ਰਿੰਸ ਤੁਰਕੀ ਬਿਨ ਅਬਦੁੱਲਾ ਸਮੇਤ ਨਜ਼ਰਬੰਦ ਹੋਰ ਸ਼ਾਹੀ ਮੈਂਬਰਾਂ ਨੂੰ ਵੀ ਜਲਦੀ ਛੱਡ ਦਿੱਤਾ ਜਾਵੇਗਾ।