ਬਰੈਂਪਟਨ, 4 ਨਵੰਬਰ (ਪੋਸਟ ਬਿਊਰੋ) : ਪੀਲ ਵਿੱਚ ਮਾਲ ਦੀ ਹੋਈ ਚੋਰੀ ਦੇ ਸਬੰਧ ਵਿੱਚ ਚੱਲ ਰਹੀ ਜਾਂਚ ਦੌਰਾਨ ਬਰੈਂਪਟਨ ਦੇ ਇੱਕ ਟਰੱਕ ਡਰਾਈਵਰ ਨੂੰ ਕਈ ਚਾਰਜਿਜ਼ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।
ਪੀਲ ਰੀਜਨਲ ਪੁਲਿਸ ਦਾ ਕਹਿਣਾ ਹੈ ਕਿ 15 ਸਤੰਬਰ ਨੂੰ ਬਰੈਂਪਟਨ ਵਿੱਚ ਹੁਰੌਨਤਾਰੀਓ ਸਟਰੀਟ ਤੇ ਕੰਜ਼ਰਵੇਸ਼ਨ ਡਰਾਈਵ ਇਲਾਕੇ ਵਿੱਚੋਂ ਇੱਕ ਟਰੈਕਟਰ ਟਰੇਲਰ ਚੋਰੀ ਕੀਤਾ ਗਿਆ। ਪੁਲਿਸ ਨੇ ਦੱਸਿਆ ਕਿ ਲੰਮੀਂ ਜਾਂਚ ਤੋਂ ਬਾਅਦ ਪਹਿਲੀ ਨਵੰਬਰ ਨੂੰ ਬਰੈਂਪਟਨ ਦੇ ਸੇਂਟ ਹੂਬਰਟ ਤੇ ਬੈਲੇਵਿੱਲੇ ਡਰਾਈਵਜ਼ ਇਲਾਕਿਆਂ ਵਿੱਚ ਸਰਚ ਵਾਰੰਟ ਕਢਵਾਕੇ ਤਲਾਸ਼ੀ ਲਈ ਗਈ ਤੇ ਇਹ ਚੀਜ਼ਾਂ ਮਿਲ ਗਈਆਂ। ਇਨ੍ਹਾਂ ਤੋਂ ਇਲਾਵਾ ਟੀਵੀ, ਜੁੱਤੇ ਤੇ ਕੈਂਪਿੰਗ ਦਾ ਸਾਜ਼ੋ ਸਮਾਨ ਆਦਿ ਵੀ ਮਿਲਿਆ। ਇਹ ਸਮਾਨ ਪੀਲ ਵਿੱਚ ਹੋਈਆਂ ਸੱਤ ਹੋਰਨਾਂ ਚੋਰੀਆਂ ਨਾਲ ਵੀ ਸਬੰਧਤ ਸੀ।
ਇਸ ਸਬੰਧ ਵਿੱਚ 38 ਸਾਲਾ ਪਰਮਿੰਦਰ ਬਾਰਨ ਨੂੰ ਜੁਰਮ ਨਾਲ ਬਣਾਈ ਗਈ ਸੰਪਤੀ ਰੱਖਣ ਤੇ ਪਾਬੰਦੀਸ਼ੁਦਾ ਪਦਾਰਥ ਰੱਖਣ ਦੇ ਦੋ ਮਾਮਲਿਆਂ ਸਮੇਤ ਕੁੱਲ ਅੱਠ ਮਾਮਲਿਆਂ ਵਿੱਚ ਚਾਰਜ ਕੀਤਾ ਗਿਆ।