ਹੇਲਸਿੰਕੀ, 4 ਨਵੰਬਰ, (ਪੋਸਟ ਬਿਊਰੋ)- ਸੰਸਾਰ ਦਾ ਅਮਨ ਪਸੰਦ ਦੇਸ਼ ਗਿਣੇ ਜਾਂਦੇ ਸਵੀਡਨ ਦੇ ਦੂਜੇ ਸਭ ਤੋਂ ਵੱਡੇ ਸ਼ਹਿਰ ਗੋਟੇਬਾਰਗ ਨੇੜੇ ਅੱਜ ਗੋਲੀਬਾਰੀ ਦੀ ਘਟਨਾ ਵਾਪਰੀ, ਜਿਸ ਵਿਚ 7 ਲੋਕ ਜ਼ਖਮੀ ਹੋ ਗਏ ਅਤੇ ਪੁਲਸ ਨੇ ਇਸ ਸਿਲਸਿਲੇ ਵਿਚ 12 ਲੋਕਾਂ ਨੂੰ ਗ੍ਰਿਫਤਾਰ ਕੀਤਾ ਹੈ।
ਸ਼ੁਰੂ ਦੀ ਜਾਂਚ ਵਿਚ ਪੁਲਸ ਦੀ ਰਾਏ ਹੈ ਕਿ ਇਹ ਗੈਂਗਵਾਰ ਦਾ ਕੇਸ ਹੋ ਸਕਦਾ ਹੈ। ਪੁਲਸ ਮੁਤਾਬਕ ਪੈਟਰੋਲ ਟੀਮ ਸ਼ਨੀਵਾਰ ਸ਼ਾਮ ਜਦੋਂ ਗੋਟੇਬਾਰਗ ਦੇ ਦੱਖਣ-ਪੂਰਬੀ ਵਿਚ ਮਾਲਨਿਕ ਵਿਖੇ ਗਈ ਤਾਂ ਉਥੇ ਇਕ ਮਨੋਰੰਜਨ ਕੇਂਦਰ ਦੇ ਬਾਹਰ ਹੋਈ ਗੋਲੀਬਾਰੀ ਮਗਰੋਂ ਕਈ ਜ਼ਖਮੀ ਲੋਕ ਮਿਲੇ। ਗੋਲੀਬਾਰੀ ਦੇ ਕਾਰਨਾਂ ਬਾਰੇ ਪਤਾ ਨਹੀਂ ਲੱਗਾ, ਪਰ ਕਤਲ ਦੀ ਕੋਸ਼ਿਸ਼ ਮੰਨ ਕੇ ਜਾਂਚ ਕੀਤੀ ਜਾ ਰਹੀ ਹੈ। ਗੋਟੇਬਾਰਗਸ ਪੋਸਟੇਨ ਅਖਬਾਰ ਮੁਤਾਬਕ ਜ਼ਖਮੀ ਹੋਏ ਕਈ ਲੋਕਾਂ ਦੇ ਸਬੰਧ ਹੇਲਸ ਏਂਜਲਸ ਬਾਈਕਰ ਗੈਂਗ ਨਾਲ ਹਨ। ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਪਿਛਲੇ ਕੁਝ ਸਾਲਾਂ ਤੋਂ ਦੇਸ਼ ਵਿਚ ਜਥੇਬੰਦ ਅਪਰਾਧ ਦੀਆਂ ਗਤੀਵਿਧੀਆਂ ਵਧ ਗਈਆਂ ਹਨ ਅਤੇ ਦੇਸ਼ ਦੇ ਤਿੰਨ ਵੱਡੇ ਸ਼ਹਿਰਾਂ ਸਟਾਕਹੋਮ, ਗੋਟੇਬਾਰਗ ਅਤੇ ਮੈਲਮੋ ਵਿਚ ਅਪਰਾਧੀ ਗਰੁੱਪਾਂ ਵਲੋਂ ਗੋਲੀਬਾਰੀ ਦੀਆਂ ਕਈ ਵਾਰਦਾਤਾਂ ਹੋਈਆਂ ਹਨ।