ਮੋਗਾ, 4 ਨਵੰਬਰ (ਪੋਸਟ ਬਿਊਰੋ)- ਪੁਲਸ ਅਫਸਰਾਂ ਵੱਲੋਂ ਆਪਣੇ ਤਿੰਨ ਪੁਲਸ ਮੁਲਾਜ਼ਮਾਂ ਨੂੰ ਨਸ਼ਾ ਤਸਕਰੀ ਦੇ ਕੇਸ ਵਿੱਚ ਫਸਾਉਣ ਦੇ ਦੋਸ਼ ਵਿੱਚ ਅਦਾਲਤ ਨੇ ਪੁਲਸ ਨੂੰ ਕਾਰਵਾਈ ਲਈ ਦੋ ਮਹੀਨੇ ਦਾ ਸਮਾਂ ਦਿੱਤਾ ਹੈ।
ਮਿਲੀ ਜਾਣਕਾਰੀ ਅਨੁਸਾਰ ਥਾਣਾ ਬਾਘਾ ਪੁਰਾਣਾ ਪੁਲਸ ਵੱਲੋਂ ਛੇ ਸਤੰਬਰ 2013 ਨੂੰ ਦਰਜ ਕੇਸ ਦੇ ਅਨੁਸਾਰ ਓਦੋਂ ਐੱਸ ਐੱਚ ਓ ਅਮਰਜੀਤ ਸਿੰਘ ਨੇ ਰਾਤ 11 ਵਜੇ ਨੱਥੂਵਾਲਾ ਗਰਬੀ ਚੌਕ ਵਿੱਚ ਛਾਪੇ ਦੌਰਾਨ 1.68 ਕੁਇੰਟਲ ਚੂਰਾ ਪੋਸਤ, 66 ਬੋਤਲਾਂ ਸ਼ਰਾਬ ਅਤੇ 46 ਹਜ਼ਾਰ ਰੁਪਏ ਫੜੇ ਸਨ। ਥਾਣਾ ਬਾਘਾ ਪੁਰਾਣਾ ਵਿੱਚ ਚੌਕੀ ਇੰਚਾਰਜ ਏ ਐਸ ਆਈ ਜਰਨੈਲ ਸਿੰਘ, ਮੁਨਸ਼ੀ ਜਸਵੀਰ ਸਿੰਘ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਤੇ ਹੌਲਦਾਰ ਦਵਿੰਦਰ ਸਿੰਘ ਭੱਜ ਗਿਆ ਸੀ। ਪੁਲਸ ਨੇ ਤਿੰਨਾਂ ਉੱਤੇ ਨਸ਼ਾ ਤਸਕਰੀ ਦਾ ਕੇਸ ਦਰਜ ਕੀਤਾ ਸੀ, ਪਰ ਕੋਰਟ ਨੇ 21 ਸਤੰਬਰ ਨੂੰ ਤਿੰਨਾਂ ਮੁਲਾਜ਼ਮਾਂ ਨੂੰ ਬਰੀ ਕਰਨ ਦਾ ਹੁਕਮ ਦੇ ਦਿੱਤਾ। ਜੱਜ ਨੇ ਜਜਮੈਂਟ ਵਿੱਚ ਲਿਖਿਆ ਕਿ ਪੁਲਸ ਅਫਸਰਾਂ ਨੇ ਬਦਨੀਤ ਨਾਲ ਨਸ਼ਾ ਤਸਕਰੀ ਦੇ ਝੂਠੇ ਕੇਸ ਵਿੱਚ ਇਨ੍ਹਾਂ ਨੂੰ ਫਸਾਇਆ ਸੀ। ਦੋ ਜਣਿਆਂ ਨੂੰ 180 ਦਿਨ ਤੋਂ ਵੱਧ ਜੇਲ੍ਹ ਵਿੱਚ ਬਿਤਾਉਣੇ ਪਏ ਸਨ। ਇਸ ਦੇ ਨਾਲ ਕੋਰਟ ਨੇ ਐੱਸ ਐੱਸ ਪੀ ਮੋਗਾ ਨੂੰ ਹੁਕਮ ਦਿੱਤੇ ਸਨ ਕਿ ਇੱਕ ਨਵੰਬਰ 2018 ਤੱਕ ਕੇਸ ਨਾਲ ਜੁੜੇ ਜਾਂਚ ਅਧਿਕਾਰੀ, ਉਨ੍ਹਾਂ ਦੀ ਟੀਮ ਅਤੇ ਸੰਬੰਧਤ ਸੀਨੀਅਰ ਅਫਸਰ ਉੱਤੇ ਕਾਰਵਾਈ ਕਰ ਕੇ ਅਦਾਲਤ ਨੂੰ ਰਿਪੋਰਟ ਪੇਸ਼ ਕਰਨ। ਐੱਸ ਐੱਸ ਪੀ ਗੁਲਨੀਤ ਸਿੰਘ ਖੁਰਾਣਾ ਨੇ ਦੱਸਿਆ ਕਿ ਕੇਸ ਉਲਝਣ ਵਾਲਾ ਹੈ। ਇਸ ਦੀ ਨਿਰਪੱਖਤਾ ਨਾਲ ਜਾਂਚ ਕਰ ਕੇ ਦੋਸ਼ੀਆਂ ਦੇ ਖਿਲਾਫ ਕਾਰਵਾਈ ਕੀਤੀ ਜਾਏਗੀ। ਅਦਾਲਤ ਨੇ ਦੋ ਮਹੀਨੇ ਦਾ ਸਮਾਂ ਦਿੱਤਾ ਹੈ। ਅਗਲੀ ਸੁਣਵਾਈ ਪੰਜ ਜਨਵਰੀ 2019 ਨੂੰ ਹੋਵੇਗੀ। ਐੱਸ ਪੀ (ਡੀ) ਵਜ਼ੀਰ ਸਿੰਘ ਖਹਿਰਾ ਇਸ ਕੇਸ ਦੀ ਜਾਂਚ ਕਰ ਰਹੇ ਹਨ।