ਸੁਨਾਮ (ਊਧਮ ਸਿੰਘ ਵਾਲਾ), 2 ਨਵੰਬਰ (ਪੋਸਟ ਬਿਊਰੋ)- ਬਹੁਤ ਸਾਰੇ ਲੋਕਾਂ ਦੀ ਕੁੰਡਲੀ ਵੇਖਣ ਤੇ ਉਨ੍ਹਾਂ ਦੀ ਗ੍ਰਹਿ ਦਸ਼ਾ ਦੱਸਣ ਵਾਲਾ ਸੁਨਾਮ ਦਾ ਇੱਕ ਜੋਤਸ਼ੀ ਇਹ ਜੋਤਿਸ਼ ਨਹੀਂ ਲਾ ਸਕਿਆ ਕਿ ਉਸ ਦੀ ਆਪਣੀ ਕੁੰਡਲੀ ਵਿੱਚ ਬੁੱਧ ਬਾਰ੍ਹਵੇਂ ਅਤੇ ਸ਼ਨੀ ਅੱਠਵੇਂ ਘਰ ਵਿੱਚ ਆਣ ਬੈਠਾ ਹੈ। ਆਮਦਨ ਟੈਕਸ ਵਿਭਾਗ ਨੇ ਕਰੀਬ ਵੀਹ ਘੰਟੇ ਤੱਕ ਬਰੀਕੀ ਨਾਲ ਇਸ ਜੋਤਸ਼ੀ ਦੀ ਆਮਦਨ ਦੀ ਜਾਂਚ ਕੀਤੀ ਹੈ। ਵਿਭਾਗ ਦੇ ਸੂਤਰਾਂ ਅਨੁਸਾਰ ਇਹ ਸੂਹ ਮਿਲੀ ਸੀ ਕਿ ਸੁਨਾਮ ਦਾ ਰੋਹਿਤ ਸ਼ਰਮਾ ਨਾਂਅ ਦਾ ਜੋਤਸ਼ੀ ਆਪਣੀ ਕਰੋੜਾਂ ਦੀ ਆਮਦਨ ਨੂੰ ਵਿਭਾਗ ਤੋਂ ਲੁਕੋ ਰਿਹਾ ਹੈ। ਇਸੇ ਉੱਤੇ ਕਾਰਵਾਈ ਕਰਦਿਆਂ ਵਿਭਾਗ ਸੀਨੀਅਰ ਅਧਿਕਾਰੀ ਗਗਨ ਕੁੰਦਰਾ ਦੀ ਅਗਵਾਈ ਵਿੱਚ ਕਰੀਬ ਚਾਲੀ ਮੈਂਬਰਾਂ ਵੱਲੋਂ ਜੋਤਸ਼ੀ ਦੀ ਆਮਦਨ ਅਤੇ ਖਰਚ ਦਾ ਬਰੀਕੀ ਨਾਲ ਜਾਇਜ਼ਾ ਲਿਆ ਗਿਆ।
ਵਰਨਣ ਯੋਗ ਹੈ ਕਿ ਸੁਨਾਮ ਤੋਂ ਨਗਰ ਕੌਂਸਲ ਦੀ ਸਾਬਕਾ ਚੇਅਰਪਰਸਨ ਗੀਤਾ ਸ਼ਰਮਾ ਦੇ ਇਸ ਜੋਤਸ਼ੀ ਪੁੱਤਰ ਕੋਲ ਕਈ ਸਿਆਸੀ ਅਗੂ ਅਤੇ ਵੱਡੇ ਅਫਸਰ ਆਪਣੀਆਂ ਕੁੰਡਲੀਆਂ ਵਿਖਾਉਣ ਆਉਂਦੇ ਹਨ। ਲੋਕਾਂ ਨੇ ਦੱਸਿਆ ਕਿ ਉਸ ਜੋਤਸ਼ੀ ਤੋਂ ਪੁੱਛਣਾ ਲੈਣ ਵਾਲਿਆਂ ਨੂੰ ਵੱਖ-ਵੱਖ ਵਰਗਾਂ ਵਿੱਚ ਵਿਚਰਨਾ ਪੈਂਦਾ ਹੈ, ਜਿਵੇਂ ਜੇ ਕਿਸੇ ਨੇ ਆਮ ਮਿਲਣਾ ਹੋਵੇ ਤਾਂ ਉਸ ਨੂੰ ਪੰਜ ਸੌ ਰੁਪਏ ਫੀਸ ਦੇ ਕੇ ਘੰਟਿਆਂ ਬੱਧੀ ਉਡੀਕ ਕਰਨੀ ਪੈਂਦੀ ਹੈ। ਇਸੇ ਤਰ੍ਹਾਂ ਜਨਮ ਕੁੰਡਲੀ ਬਣਾਉਣ ਦੇ ਉਹ 11 ਸੌ ਰੁਪਏ ਲੈਂਦਾ ਹੈ। ਜੇ ਕਿਸੇ ਨੂੰ ਐਮਰਜੈਂਸੀ ਹੋਵੇ ਤਾਂ ਉਸ ਨੂੰ 2500 ਰੁਪਏ ਦੇਣੇ ਪੈਂਦੇ ਹਨ। ਸੰਗਰੂਰ ਰੇਂਜ ਦੇ ਇਨਕਮ ਟੈਕਸ ਵਿਭਾਗ ਦੇ ਐਡੀਸ਼ਨਲ ਕਮਿਸ਼ਨਰ ਕੁਲਰਾਜ ਸਿੰਘ ਬੈਂਸ ਨੇ ਦੱਸਿਆ ਕਿ ਜੋਤਸ਼ੀ ਦੇ ਲੈਪਟਾਪ ਅਤੇ ਹੋਰ ਦਸਤਾਵੇਜ਼ਾਂ ਦੀ ਜਾਂਚ ਅਤੇ ਇਸ ਦੌਰਾਨ ਕੀਤੇ ਸੁਆਲਾਂ ਦੇ ਉਹ ਸਹੀ ਜਵਾਬ ਨਾ ਦੇ ਸਕਿਆ। ਉਨ੍ਹਾਂ ਦੱਸਿਆ ਕਿ ਜੋਤਸ਼ੀ ਨੇ ਆਪਣੀ ਇੱਕ ਕਰੋੜ ਤੀਹ ਲੱਖ ਰੁਪਏ ਦੀ ਆਮਦਨ ਦੇ ਵਸੀਲਿਆਂ ਦਾ ਕੋਈ ਪੁਖਤਾ ਉਤਰ ਨਹੀਂ ਦਿੱਤਾ।