ਹੁਸ਼ਿਆਰਪੁਰ, 1 ਨਵੰਬਰ (ਪੋਸਟ ਬਿਊਰੋ)- ਵਧੀਕ ਜ਼ਿਲਾ ਤੇ ਸੈਸ਼ਨ ਜੱਜ ਰਣਜੀਤ ਸਿੰਘ ਜੈਨ ਦੀ ਅਦਾਲਤ ਨੇ ਡੀ ਏ ਵੀ ਕਾਲਜ 'ਚ ਦਿਨ ਦਿਹਾੜੇ ਗੋਲੀ ਮਾਰ ਕੇ ਸੁਪਰਡੈਂਟ ਦੀ ਹੱਤਿਆ ਕਰਨ ਦੇ ਕੇਸ ਦੀ ਸੁਣਵਾਈ ਤੋਂ ਬਾਅਦ ਪਾਏ ਗਏ ਦੋਸ਼ੀ ਨੂੰ ਉਮਰ ਕੈਦ ਦੀ ਸਜ਼ਾ ਤੇ 12 ਹਜ਼ਾਰ ਰੁਪਏ ਜੁਰਮਾਨੇ ਦੇ ਹੁਕਮ ਸੁਣਾਏ।
ਵਰਨਣ ਯੋਗ ਹੈ ਕਿ ਕਿਰਨ ਭੱਲਾ ਪਤਨੀ ਰਾਜ ਕੁਮਾਰ ਭੱਲਾ ਵਾਸੀ ਯੂ ਐਨ ਇਨਕਲੇਵ ਊਨਾ ਰੋਡ ਥਾਣਾ ਸਿਟੀ ਨੇ ਪੁਲਸ ਨੂੰ 10 ਫਰਵਰੀ 2015 ਨੂੰ ਸ਼ਿਕਾਇਤ ਦਰਜ ਕਰਵਾਈ ਕਿ ਉਹ ਡੀ ਏ ਵੀ ਕਾਲਜ 'ਚ ਲਾਇਬਰੇਰੀਅਨ ਹੈ ਅਤੇ ਉਸ ਦਾ ਪਤੀ ਰਾਜ ਕੁਮਾਰ ਭੱਲਾ ਪੁੱਤਰ ਹਕੀਕਤ ਰਾਏ ਭੱਲਾ ਵੀ ਉਸ ਦੇ ਨਾਲ ਦਫਤਰ 'ਚ ਸੁਪਰਡੈਂਟ ਸੀ। ਉਸ ਨੇ ਦੱਸਿਆ ਕਿ ਮੀਨਾ ਮਹਿਤਾ ਪਤਨੀ ਰਾਜਿੰਦਰ ਪਾਲ ਮਹਿਤਾ ਵਾਸੀ ਰਾਮ ਨਗਰ ਨਜ਼ਦੀਕ ਸ਼ਿਮਲਾ ਪਹਾੜੀ ਵੀ ਉਸ ਦੇ ਕਾਲਜ 'ਚ ਕਲਰਕ ਸੀ, ਜਿਸ ਨੇ ਧੋਖਾਧੜੀ ਕੀਤੀ ਤੇ ਉਸ ਨੂੰ ਕਾਲਜ ਵੱਲੋਂ ਸਸਪੈਂਡ ਕਰ ਦਿੱਤਾ ਗਿਆ ਸੀ, ਜਿਸ ਦਾ ਲੜਕਾ ਰੋਹਿਤ ਮਹਿਤਾ ਮਾਲ ਰੋਡ 'ਤੇ ਪੀਰਾਂ ਦੀ ਮਜ਼ਾਰ ਬਾਬਾ ਬਣਾਂ ਸ਼ਾਹ ਬੈਠਦਾ ਸੀ। ਉਹ ਕਾਲਜ ਵਲੋਂ ਉਸ ਦੀ ਮਾਤਾ ਨੂੰ ਸਸਪੈਂਡ ਕਰਨ ਦੀ ਰੰਜਿਸ਼ ਰੱਖਦਾ ਸੀ। ਦੁਪਹਿਰ ਬਾਅਦ ਜਦੋਂ ਉਹ ਆਪਣੇ ਪਤੀ ਨਾਲ ਦਫਤਰ ਤੋਂ ਬਾਹਰ ਨਿਕਲੀ ਤਾਂ ਰੋਹਿਤ ਰਿਵਾਲਵਰ ਲੈ ਕੇ ਕਾਲਜ 'ਚ ਦਾਖਲ ਹੋਇਆ ਸੀ ਤੇ ਉਸ ਦੇ ਪਤੀ 'ਤੇ ਗੋਲੀਆਂ ਚਲਾ ਦਿੱਤੀਆਂ, ਜਿਸ ਨਾਲ ਉਸ ਦੀ ਮੌਤ ਹੋ ਗਈ। ਤਤਕਾਲੀਨ ਥਾਣਾ ਸਦਰ ਦੇ ਇੰਚਾਰਜ ਪ੍ਰੇਮ ਕੁਮਾਰ ਨੇ ਦੋਸ਼ੀ ਨੂੰ ਗ੍ਰਿਫਤਾਰ ਕਰ ਲਿਆ ਸੀ।