ਵਾਸ਼ਿੰਗਟਨ, 1 ਨਵੰਬਰ (ਪੋਸਟ ਬਿਊਰੋ)- ਅਮਰੀਕਾ ਵਿੱਚ ਬੀਤੇ ਦਿਨੀਂ ਇਕ ਕਾਰ ਹਾਦਸਾ ਗ੍ਰਸਤ ਹੋ ਗਈ। ਹਾਦਸਾ ਇੰਨਾ ਭਿਆਨਕ ਸੀ ਕਿ ਕਾਰ ਇਕ ਦਰੱਖਤ ਉਤੇ ਲਟਕ ਗਈ ਅਤੇ ਇਸ ਨੂੰ ਚਲਾਉਣ ਵਾਲੀ ਔਰਤ ਦੀ ਜਾਨ ਮੁਸ਼ਕਲ `ਚ ਫਸ ਗਈ। ਇਸ ਦੁਰਘਟਨਾ ਨੂੰ ਵਾਪਰਦਿਆਂ ਕਿਸੇ ਨੇ ਨਹੀਂ ਦੇਖਿਆ ਸੀ ਤੇ 6 ਦਿਨਾਂ ਤਕ ਕਾਰ ਲਟਕਦੀ ਰਹੀ ਅਤੇ ਔਰਤ ਜ਼ਿੰਦਗੀ ਲਈ ਸੰਘਰਸ਼ ਕਰਦੀ ਰਹੀ।
12 ਅਕਤੂਬਰ ਨੂੰ ਨੈਸ਼ਨਲ ਹਾਈਵੇਅ-60 ਕੋਲ ਵਿਕਨਬਰਗ `ਚ 53 ਸਾਲਾ ਔਰਤ ਦੀ ਕਾਰ ਦੁਰਘਟਨਾ ਗ੍ਰਸਤ ਹੋਈ ਤੇ ਰੇਲਿੰਗ ਤੋਂ ਉੱਛਲਦੀ ਹੋਈ ਦੂਰ ਇਕ ਦਰੱਖਤ ਉਤੇ ਲਟਕ ਗਈ। 6 ਦਿਨਾਂ ਬਾਅਦ ਜਦ ਪੁਲਸ ਓਥੇ ਪੁੱਜੀ ਤਾਂ ਕਾਰ ਖਾਲੀ ਸੀ। ਪੁਲਸ ਨੇ ਰਸਤਾ ਲੱਭਿਆ ਅਤੇ ਜ਼ਖਮੀ ਔਰਤ ਤਕ ਪੁੱਜੀ। ਔਰਤ ਨੇ ਦੱਸਿਆ ਕਿ ਕੁਝ ਦਿਨਾਂ ਤਕ ਉਹ ਆਪਣੀ ਕਾਰ ਵਿੱਚ ਰਹੀ ਤੇ ਫਿਰ ਕਿਸੇ ਤਰ੍ਹਾਂ ਹੌਲੀ-ਹੌਲੀ ਬਾਹਰ ਨਿਕਲੀ। ਔਰਤ ਇੰਨੀ ਕਮਜ਼ੋਰ ਸੀ ਕਿ ਉਹ ਤੁਰ ਵੀ ਨਹੀਂ ਸਕੀ ਅਤੇ ਹੈਲੀਕਾਪਟਰ ਰਾਹੀਂ ਉਸ ਨੂੰ ਹਸਪਤਾਲ `ਚ ਭਰਤੀ ਕਰਵਾਇਆ ਗਿਆ। ਹੈਰਾਨੀ ਦੀ ਗੱਲ ਇਹ ਸੀ ਕਿ ਇੰਨੇ ਦਿਨ ਭੁੱਖੀ-ਪਿਆਸੀ ਅਤੇ ਜ਼ਖਮੀ ਔਰਤ ਜਿਊਂਦੀ ਰਹੀ, ਪਰ ਕਿਸੇ ਨੂੰ ਵੀ ਯਕੀਨ ਨਹੀਂ ਸੀ ਕਿ ਉਹ ਬਚ ਗਈ ਹੋਵੇਗੀ। ਫਿਲਹਾਲ ਹਸਪਤਾਲ `ਚ ਉਸ ਦਾ ਇਲਾਜ ਚੱਲ ਰਿਹਾ ਹੈ।
ਉਸ ਔਰਤ ਨੇ ਦੱਸਿਆ ਕਿ ਉਸ ਨੇ ਕਈ ਵਾਰ ਕਾਰ ਵਿੱਚੋਂ ਉੱਤਰ ਕੇ ਸੜਕ `ਤੇ ਜਾਣ ਦੀ ਕੋਸ਼ਿਸ਼ ਕੀਤੀ, ਪਰ ਉਸ ਦੇ ਇੰਨੀਆਂ ਕੁ ਸੱਟਾਂ ਸਨ ਕਿ ਉਹ ਬਾਹਰ ਨਹੀਂ ਨਿਕਲ ਸਕੀ। ਫਿਰ ਬਹੁਤ ਮੁਸ਼ਕਲ ਨਾਲ ਕਾਰ `ਚੋਂ ਬਾਹਰ ਨਿਕਲ ਸਕੀ। ਪੁਲਸ ਨੇ ਦੱਸਿਆ ਕਿ ਕਿਸੇ ਨੇ ਵੀ ਇਹ ਘਟਨਾ ਵਾਪਰਦਿਆਂ ਨਹੀਂ ਦੇਖੀ ਸੀ, ਇਸੇ ਲਈ ਔਰਤ ਨੂੰ ਲੱਭਣ `ਚ ਪ੍ਰਸ਼ਾਸਨ ਨੂੰ 6 ਦਿਨ ਲੱਗ ਗਏ। ਉਨ੍ਹਾਂ ਕਿਹਾ ਕਿ 18 ਅਕਤੂਬਰ ਨੂੰ ਐਰੀਜੋਨਾ ਹਾਈਵੇਅ ਪ੍ਰਬੰਧਕ ਦਲ ਨੇ ਟੁੱਟੀ ਹੋਈ ਰੇਲਿੰਗ ਦੇਖੀ ਤਾਂ ਉਨ੍ਹਾਂ ਦੀ ਨਜ਼ਰ ਦਰੱਖਤ `ਤੇ ਲਟਕ ਰਹੀ ਕਾਰ `ਤੇ ਪਈ ਅਤੇ ਇਸ ਮਗਰੋਂ ਸਾਰੀ ਕਾਰਵਾਈ ਹੋਈ।