ਜਕਾਰਤਾ, 1 ਨਵੰਬਰ (ਪੋਸਟ ਬਿਊਰੋ)- ਇੰਡੋਨੇਸ਼ੀਆ ਵਿੱਚ ਹਾਦਸੇ ਦਾ ਸ਼ਿਕਾਰ ਹੋਏ ਜਹਾਜ਼ ਦੇ ਮਲਬੇ ਦੀ ਭਾਲ ਵਿੱਚ ਲੱਗੇ ਕਰਮਚਾਰੀਆਂ ਨੇ ਵੱਡੀ ਸਫਲਤਾ ਦਾ ਦਾਅਵਾ ਕੀਤਾ ਹੈ। ਉਨ੍ਹਾਂ ਮੁਤਾਬਕ ਜਹਾਜ਼ ਦੇ ਮੁੱਖ ਹਿੱਸੇ (ਫਿਊਜ਼ਲੇਜ) ਦਾ ਰੇਡੀਓ ਸੰਕੇਤ ਮਿਲਿਆ ਹੈ। ਜਲਦੀ ਹੀ ਗੋਤਾਖੋਰਾਂ ਨੂੰ ਭੇਜ ਕੇ ਉਸ ਸੰਕੇਤ ਦੀ ਪੁਸ਼ਟੀ ਕੀਤੀ ਜਾਏਗੀ।
ਲਾਇਨ ਏਅਰ ਦਾ ਬੋਇੰਗ-737 ਮੈਕਸ-8 ਜਹਾਜ਼ ਸੋਮਵਾਰ ਸਮੁੰਦਰ ਵਿੱਚ ਡਿੱਗ ਗਿਆ ਸੀ। ਇਸ ਦੁਰਘਟਨਾ ਵਿੱਚ ਜਹਾਜ਼ ਵਿੱਚ ਸਵਾਰ ਸਾਰੇ 189 ਯਾਤਰੀਆਂ ਤੇ ਚਾਲਕ ਦਲ ਦੇ ਮੈਂਬਰਾਂ ਦੀ ਮੌਤ ਹੋ ਗਈ ਸੀ। ਜਹਾਜ਼ ਨੂੰ ਭਾਰਤੀ ਪਾਇਲਟ ਭਵਯ ਸੁਨੇਜਾ (31) ਉਡਾ ਰਹੇ ਸਨ, ਜਦ ਕਿ ਕੋ-ਪਾਇਲਟ ਜਕਾਰਤਾ ਵਾਸੀ ਹਰਵਿਨੋ ਸਨ। ਇੰਡੋਨੇਸ਼ੀਆ ਦੇ ਫੌਜ ਮੁਖੀ ਹਾਦੀ ਜਜਾਂਤੋ ਨੇ ਕਿਹਾ, ਸਾਨੂੰ ਪੂਰੀ ਆਸ ਹੈ ਕਿ ਫਿਊਜ਼ਲੇਜ ਦਾ ਇੱਕ ਹਿੱਸਾ ਮਿਲ ਗਿਆ ਹੈ। ਸਮੁੰਦਰੀ ਫੌਜ ਅਧਿਕਾਰੀ ਕਰਨਲ ਹੈਰਿਸ ਨੇ ਦੱਸਿਆ ਕਿ ਕਰੀਬ 32 ਮੀਟਰ ਦੀ ਡੂੰਘਾਈ 'ਤੇ 22 ਮੀਟਰ ਲੰਬੀ ਕੋਈ ਚੀਜ਼ ਦਿਸੀ ਹੈ। ਗੋਤਾਖੋਰਾਂ ਨੂੰ ਇਸ ਦਾ ਪਤਾ ਲਾਉਣ ਲਈ ਭੇਜਿਆ ਜਾਏਗਾ। ਖੋਜਕਰਤਾ ਜਹਾਜ਼ ਦੇ ਬਲੈਕ ਬਾਕਸ ਰਿਕਾਰਡਰ ਦਾ ਪਤਾ ਲਾਉਣ ਦੀ ਕੋਸ਼ਿਸ਼ ਕਰ ਰਹੇ ਹਨ। ਬਲੈਕ ਬਾਕਸ ਰਿਕਾਰਡਰ ਦੀ ਮਦਦ ਤੋਂ ਇਹ ਪਤਾ ਲੱਗਣ ਦੀ ਆਸ ਹੈ ਕਿ ਆਖਰੀ ਪਲਾਂ ਵਿੱਚ ਪਾਇਲਟਾਂ ਦੀ ਕੀ ਗੱਲ ਹੋਈ ਸੀ। ਅਧਿਕਾਰੀਆਂ ਮੁਤਾਬਕ ਉਡਾਨ ਭਰਨ ਦੇ ਕੁਝ ਮਿੰਟ ਬਾਅਦ ਪਾਇਲਟਾਂ ਨੇ ਜਹਾਜ਼ ਦੀ ਐਮਰਜੈਂਸੀ ਲੈਂਡਿੰਗ ਦੀ ਇਜਾਜ਼ਤ ਮੰਗੀ ਸੀ। ਗਰਾਊਂਡ ਕੰਟਰੋਲ ਅਧਿਕਾਰੀਆਂ ਨੇ ਇਜਾਜ਼ਤ ਦੇ ਦਿੱਤੀ ਸੀ, ਪਰ ਕੁਝ ਮਿੰਟ ਬਾਅਦ ਜਹਾਜ਼ ਦਾ ਸੰਪਰਕ ਟੁੱਟ ਗਿਆ ਤੇ ਉਹ ਹਾਦਸੇ ਦਾ ਸ਼ਿਕਾਰ ਹੋ ਗਿਆ। ਇਸ ਦੌਰਾਨ ਉਡਾਣ ਤੋਂ ਪਹਿਲਾਂ ਜਹਾਜ਼ ਦੀ ਹਾਲਤ ਬਾਰੇ ਮੀਡੀਆ ਵਿੱਚ ਉਠ ਰਹੇ ਸਵਾਲਾਂ ਨੂੰ ਦੇਖਦੇ ਹੋਏ ਇੰਡੋਨੇਸ਼ੀਆ ਦੇ ਟਰਾਂਸਪੋਰਟ ਮੰਤਰੀ ਨੇ ਲਾਇਨ ਏਅਰ ਦੇ ਟੈਕਨੀਕਲ ਡਾਇਰੈਕਟਰ ਅਤੇ ਕਈ ਤਕਨੀਸ਼ੀਅਨਾਂ ਨੂੰ ਸਸਪੈਂਡ ਕਰ ਦਿੱਤਾ।