ਓਨਟਾਰੀਓ, 31 ਅਕਤੂਬਰ (ਪੋਸਟ ਬਿਊਰੋ) : ਬੀਤੇ ਦਿਨੀਂ ਓਨਟਾਰੀਓ ਦੀ ਪਾਰਲੀਆਮੈਂਟ ਕੁਈਨਜ਼ ਪਾਰਕ ਅਤੇ ਕੈਨੇਡਾ ਦੀ ਰਾਜਧਾਨੀ ਓਟਵਾ ਵਿਖੇ ਪਾਰਲੀਆਮੈਂਟ ਵਿੱਚ ਮਨਾਏ ਗਏ ਦੀਵਾਲੀ ਸਮਾਰੋਹ ਵਿੱਚ ਸਵਾਮੀ ਆਨੰਦ ਗਿਰੀ ਜੀ ਮੁੱਖ ਮਹਿਮਾਨ ਵਜੋਂ ਪਹੁੰਚੇ।
ਸਵਾਮੀ ਜੀ ਨਾਲ ਭਾਰਤ ਦੇ ਹਾਈ ਕਮਿਸ਼ਨਰ ਸ੍ਰੀ ਵਿਕਾਸ ਸਵਰੂਪ।
ਸਵਾਮੀ ਜੀ ਨੇ ਦੋਵਾਂ ਪਾਰਲੀਆਮੈਂਟਾਂ ਵਿੱਚ ਦੀਵਾਲੀ ਮਨਾਉਣ ਆਏ ਸਮੂਹ ਮੈਂਬਰਾਂ ਨੂੰ ਸੰਬੋਧਨ ਕੀਤਾ। ਇਸ ਮੌਕੇ ਵੱਖ ਵੱਖ ਸਿਆਸੀ ਆਗੂਆਂ ਨੇ ਉਨ੍ਹਾਂ ਦਾ ਸਵਾਗਤ ਕੀਤਾ ਤੇ ਉਨ੍ਹਾਂ ਤੋਂ ਗਿਆਨ ਹਾਸਲ ਕੀਤਾ। ਜਿ਼ਕਰਯੋਗ ਹੈ ਕਿ ਸਵਾਮੀ ਆਨੰਦ ਗਿਰੀ ਜੀ ਰੂਹਾਨੀ ਆਗੂ ਹਨ ਤੇ ਉਹ ਸਮਾਜ ਦੀ ਸੇਵਾ ਕਰਨ ਤੇ ਆਪਣੇ ਕੰਮ ਤੇ ਗਿਆਨ ਨਾਲ ਲੋਕਾਂ ਨੂੰ ਪ੍ਰੇਰਿਤ ਕਰਨ ਪ੍ਰਤੀ ਸਮਰਪਿਤ ਹਨ। ਦੋਸਤ, ਫਿਲਾਸਫਰ ਤੇ ਗਾਈਡ ਵਜੋਂ ਉਨ੍ਹਾਂ ਆਪਣੇ ਪੈਰੋਕਾਰਾਂ ਨੂੰ ਹਮੇਸ਼ਾਂ ਵੈਦਿਕ ਸਿੱਖਿਆ ਹੀ ਦਿੱਤੀ ਹੈ ਤੇ ਉਨ੍ਹਾਂ ਦਾ ਰਾਹ ਰੁਸ਼ਨਾਇਆ ਹੈ।
ਸਵਾਮੀ ਜੀ ਨਾਲ ਐੱਮ ਪੀਜ਼, ਪਰਿਵਾਰਿਕ ਦੋਸਤ
ਆਪਣੀ ਜਿ਼ੰਦਗੀ ਦਾ ਵਧੇਰੇ ਸਮਾਂ ਉਨ੍ਹਾਂ ਕੇਦਾਰ, ਹਿਮਾਲਿਆ ਵਿਖੇ ਤੁੰਗਨਾਥ, ਰੁਦਰਨਾਥ, ਕਲਪੇਸ਼ਵਰ, ਮਦਮਹੇਸ਼ਵਰ, ਤ੍ਰਿਯੋਗੀ ਨਾਰਾਇਣ ਤੇ ਵਾਸੂਕਿਟਲ ਵਿਖੇ ਗਿਰੀਰਾਜ ਤੇ ਸਾਰਸਵਤ ਮਹਾਰਾਜ ਤਹਿਤ ਬਿਤਾਇਆ। ਉਨ੍ਹਾਂ ਵੇਦਾਂ ਤੇ ਆਯੁਰਵੇਦ ਵਿੱਚ ਤਾਲੀਮ ਹਾਸਲ ਕੀਤੀ। ਉਨ੍ਹਾਂ ਆਪਣੀ ਯੋਗ ਸਿੱਖਿਆ ਯੋਗਾ ਨਿਕੇਤਨ ਧਾਮ ਰਿਸ਼ੀਕੇਸ਼ ਤੋਂ ਮਹਾਮੰਡਲੇਸ਼ਵਰ ਵਿਸ਼ਵ ਗੁਰੂ ਜੀ ਮਹਾਰਾਜ ਤੋਂ ਹਾਸਲ ਕੀਤੀ। ਸਵਾਮੀ ਜੀ ਨੇ ਸਿਰਫ ਵੈਦਿਕ ਤਾਲੀਮ ਹੀ ਹਾਸਲ ਨਹੀਂ ਕੀਤੀ ਸਗੋਂ ਉਨ੍ਹਾਂ ਬਨਾਰਸ ਹਿੰਦੂ ਯੂਨੀਵਰਸਿਟੀ ਤੋਂ ਆਪਣੀ ਗ੍ਰੈਜੂਏਸ਼ਨ ਮੁਕੰਮਲ ਕੀਤੀ ਤੇ ਉਹ ਯੋਗਾ ਤੰਤਰ ਵਿੱਚ ਪੀਐਚਡੀ ਵੀ ਪੂਰੀ ਕਰ ਰਹੇ ਹਨ। ਸਵਾਮੀ ਜੀ ਛੇ ਯੂਨੀਵਰਸਿਟੀਜ਼ ਵਿੱਚ ਗੈਸਟ ਲੈਕਚਰਰ ਹਨ ਤੇ ਨੌਜਵਾਨਾਂ ਨੂੰ ਪ੍ਰੇਰਿਤ ਕਰਨ ਲਈ ਉਨ੍ਹਾਂ ਨੂੰ ਵੱਖ ਵੱਖ ਸਕੂਲਾਂ ਕਾਲਜਾਂ ਵਿੱਚ ਵੀ ਸਮੇਂ ਸਮੇਂ ਉੱਤੇ ਬੁਲਾਇਆ ਜਾਂਦਾ ਹੈ।
ਉਨ੍ਹਾਂ ਦਾ ਸੁਪਨਾ ਕੌਮਾਂਤਰੀ ਪੱਧਰ ਦਾ ਗੁਰੂਕੁਲ ਖੋਲ੍ਹਣ ਦਾ ਹੈ ਜਿੱਥੇ ਵੇਦਾਂਤਾ, ਸੰਸਕ੍ਰਿਤ ਤੇ ਹੋਰਨਾਂ ਲੋਕਾਂ ਨੂੰ ਆਪਣੇ ਸੱਭਿਆਚਾਰ ਤੋਂ ਜਾਣੂ ਕਰਵਾਇਆ ਜਾਣਾ ਹੋਵੇ। ਇਸ ਸੱਭ ਤੋਂ ਇਲਾਵਾ ਸਵਾਮੀ ਜੀ ਸਵਰਨ ਭੂਮੀ ਪ੍ਰਯਾਗ ਨਾਂ ਦੀ ਕਿਤਾਬ ਵੀ ਲਿਖ ਚੁੱਕੇ ਹਨ ਜੋ ਕਿ 2013 ਵਿੱਚ ਕੁੰਭ ਮੇਲੇ ਵਿੱਚ ਰਲੀਜ਼ ਹੋਈ ਸੀ।