ਨਵੀਂ ਦਿੱਲੀ, 6 ਅਪ੍ਰੈਲ (ਪੋਸਟ ਬਿਊਰੋ)- ਸ਼ਕੀਲ-ਉਰ-ਰਹਿਮਾਨ ਨੇ ਆਪਣੀ ਮਾਂ ਨੂੰ ਆਖ਼ਰੀ ਵਾਰ ਦਸੰਬਰ ਵਿੱਚ ਉਦੋਂ ਦੇਖਿਆ ਸੀ ਜਦੋਂ ਉਹ ਬਿਹਾਰ ਦੇ ਸਮਸਤੀਪੁਰ ਤੋਂ ਇਲਾਜ ਲਈ ਆਈ ਸੀ, ਪਰ ਇਹ ਉਨ੍ਹਾਂ ਦੀ ਆਖਰੀ ਮੁਲਕਾਤ ਹੋ ਗਈ। ਉਨ੍ਹਾਂ ਦੀ ਮਾਂ ਦਾ ਪਿੱਛੇ ਜਿਹੇ ਮੌਤ ਹੋ ਗਈ ਅਤੇ ਉਹ ਮਾਂ ਨੂੰ ਆਖ਼ਰੀ ਵਾਰ ਵੀ ਦੇਖ ਨਹੀਂ ਸਕਿਆ।
40 ਸਾਲਾ ਕਾਰੋਬਾਰੀ ਨੇ ਦੱਸਿਆ ਕਿ ਮੈ ਸੋਚਿਆ ਸੀ ਕਿ ਮੈਂ ਲਾਕਡਾਊਨ ਖ਼ਤਮ ਹੋਣ ਪਿੱਛੋਂ ਉਨ੍ਹਾਂ ਨੂੰ ਮਿਲਾਗਾ, ਪਰ ਹਰ ਚੀਜ਼ ਸਾਡੇ ਸੋਚਣ ਮੁਤਾਬਕ ਨਹੀਂ ਹੁੰਦੀ। ਰਹਿਮਾਨ ਕੋਰੋਨਾ ਵਾਇਰਸ ਨੂੰ ਫੈਲਣ ਤੋਂ ਰੋਕਣ ਦੇ ਲਈ 21 ਦਿਨਾ ਬੰਦ ਦੌਰਾਨ ਮਜ਼ਦੂਰਾਂ ਨੂੰ ਖਾਣਾ ਖੁਆਉਣ ਲਈ ਆਸ਼ਰਮ ਚੌਕ ਜਾਣ ਦੀ ਤਿਆਰੀ ਕਰ ਰਹੇ ਸੀ। ਰਾਜਧਾਨੀ ਵਿੱਚ ਟ੍ਰੈਵਲ ਏਜੈਂਸੀ ਚਲਾਉਣ ਵਾਲੇ ਰਹਿਮਾਨ ਦੀ ਮਾਂ ਦੀ ਕੱਲ੍ਹ ਸਵੇਰੇ ਮੌਤ ਹੋ ਗਈ। ਉਨ੍ਹਾਂ ਦੇ ਦੋਸਤਾਂ ਨੇ ਉਸ ਨੂੰ ਬਿਹਾਰ ਜਾ ਕੇ ਆਪਣੀ ਮਾਂ ਨੂੰ ਆਖ਼ਰੀ ਵਾਰ ਦੇਖਣ ਨੂੰ ਕਿਹਾ, ਪਰ ਰਹਿਮਾਨ ਦਾ ਕਹਿਣਾ ਸੀ, ਮੇਰੀ ਜ਼ਰੂਰਤ ਦਿੱਲੀ ਵਿੱਚ ਹੈ। ਮੈਨੂੰ ਇਹ ਕੰਮ ਪਹਿਲਾਂ ਕਰਨ ਦੀ ਲੋੜ ਹੈ ਕਿ ਕਿਸੇ ਦੀ ਮਾਂ ਭੁੱਖ ਨਾਲ ਨਾ ਮਰੇ। ਰਹਿਮਾਨ ਦੇ ਦੋਸਤ ਮੁਸਲਮ ਮੁਹੰਮਦ ਨੇ ਕਿਹਾ ਕਿ ਅਸੀਂ ਉਨ੍ਹਾਂ ਨੂੰ ਉਸਦੇ ਪਰਵਾਰ ਨਾਲ ਮਿਲਣ ਲਈ ਜਾਣ ਦੇਣ ਲਈ ਪ੍ਰਸ਼ਾਸਨ ਤੋਂ ਬੇਨਤੀ ਕਰ ਸਕਦੇ ਸੀ, ਪਰ ਰਹਿਮਾਨ ਨੇ ਉਸ ਤੋਂ ਇੰਨਕਾਰ ਕਰ ਦਿੱਤਾ। ਉਨ੍ਹਾਂ ਨੇ ਕਿਹਾ ਕਿ ਜੇ ਉਹ ਮੁਸੀਬਤ ਵਿੱਚ ਫਸੇ ਜ਼ਰੂਰਤਮੰਦ ਲੋਕਾਂ ਦੀ ਮਦਦ ਕਰ ਸਕੇ, ਤਾਂ ਇਹੀ ਉਸ ਦੀ ਮਾਂ ਨੂੰ ਸੱਚੀ ਸ਼ਰਧਾਂਜਲੀ ਹੋਵੇਗੀ।