ਲਾਂਬੜਾ, 6 ਅਪ੍ਰੈਲ (ਪੋਸਟ ਬਿਊਰੋ)- ਥਾਣਾ ਲਾਂਬੜਾ ਦੇ ਪਿੰਡ ਨਿੱਝਰਾਂ ਵਿਖੇ ਕਰਫਿਊ ਦੌਰਾਨ ਇੱਕ ਔਰਤ ਦਾ ਕਤਲ ਕਰ ਦੇਣ ਦੀ ਘਟਨਾ ਵਾਪਰੀ ਹੈ। ਇਸ ਦੀ ਸੂਚਨਾ ਮਿਲਦੇ ਸਾਰ ਐੱਸ ਪੀ ਡੀ ਸਰਬਜੀਤ ਸਿੰਘ, ਸੁਰਿੰਦਰਪਾਲ ਡੀ ਐੱਸ ਪੀ ਅਤੇ ਥਾਣਾ ਮੁਖੀ ਰਮਨਦੀਪ ਸਿੰਘ ਨੇ ਮੌਕੇ 'ਤੇ ਪਹੁੰਚ ਕੇ ਜਾਂਚ ਕੀਤੀ ਹੈ।
ਮਿਲੀ ਜਾਣਕਾਰੀ ਅਨੁਸਾਰ ਸੀਤਾ (52) ਪਤਨੀ ਲੁਭਾਇਆ ਪਿੰਡ ਨਿੱਝਰਾਂ ਬੀਤੇ ਸ਼ਨੀਵਾਰ ਰੋਜ਼ ਵਾਂਗ ਦੁਪਹਿਰ ਕਰੀਬ ਦੋ ਵਜੇ ਆਪਣੇ ਘਰੋਂ ਪਸ਼ੂਆਂ ਦਾ ਚਾਰਾ ਲੈਣ ਗਈ ਸੀ। ਉਹ ਜਦੋਂ ਚਾਰਾ ਲੈ ਕੇ ਸ਼ਾਮ ਨੂੰ ਘਰ ਨਾ ਪਹੁੰਚੀ ਤਾਂ ਘਰ ਵਾਲਿਆਂ ਨੇ ਇਸ ਦੀ ਸੂਚਨਾ ਪਿੰਡ ਦੇ ਮੋਹਤਬਰਾਂ ਨੂੰ ਦਿੱਤੀ। ਫਿਰ ਪਿੰਡ ਵਾਸੀਆਂ ਨੇ ਇਕੱਠੇ ਹੋ ਕੇ ਉਸ ਨੂੰ ਲੱਭਣ ਲਈ ਕਰੀਬ ਅੱਧੀ ਰਾਤ ਤੱਕ ਸਰਚ ਮੁਹਿੰਮ ਚਲਾਈ, ਪਰ ਉਸ ਦਾ ਪਤਾ ਨਹੀਂ ਲੱਗ ਸਕਿਆ। ਅਗਲੀ੍ਹ ਸਵੇਰ ਪਿੰਡ ਵਾਸੀਆਂ ਨੇ ਫਿਰ ਭਾਲ ਸ਼ੁਰੂ ਕੀਤੀ ਤਾਂ ਪਿੰਡ ਨਿੱਜਰਾਂ ਤੋਂ ਕਾਫੀ ਦੂਰ ਖੇਤਾਂ 'ਚੋਂ ਇੱਕ ਖੂਹ ਦੇ ਨੇੜਿਓਂ ਸੀਤਾ ਦੀ ਲਾਸ਼ ਪਈ ਮਿਲੀ। ਇਹ ਖੂਹ ਬਾਵਾ ਸਿੰਘ ਵਾਸੀ ਨਿੱਝਰਾਂ ਦਾ ਹੈ, ਜੋ ਇਸ ਸਮੇਂ ਵਿਦੇਸ਼ 'ਚ ਹੈ। ਮ੍ਰਿਤਕਾ ਸੀਤਾ ਦੀ ਚੰੁਨੀ ਨਾਲ ਗਲਾ ਘੁੱਟ ਕੇ ਕਤਲ ਕਰਨ ਦੀ ਘਟਨਾ ਲੱਗਦੀ ਹੈ। ਉਸ ਦੇ ਕੱਪੜਿਆਂ ਦੀ ਹਾਲਤ ਤੋਂ ਸ਼ੱਕ ਹੁੰਦਾ ਹੈ ਕਿ ਕਾਤਲ ਨੇ ਪਹਿਲਾਂ ਸੀਤਾ ਨਾਲ ਬਲਾਤਕਾਰ ਕੀਤਾ ਅਤੇ ਫਿਰ ਇਸ ਪਾਪ ਨੂੰ ਲੁਕਾਉਣ ਲਈ ਕਤਲ ਕਰ ਦਿੱਤਾ। ਮ੍ਰਿਤਕਾ ਦੀ ਲਾਸ਼ ਕੋਲ ਇੱਕ ਚੈਕਦਾਰ ਪਰਨਾ, ਚੱਪਲ ਅਤੇ ਪਾਣੀ ਦੀ ਬੋਤਲ ਮਿਲੀ ਸੀ।