ਨਵੀਂ ਦਿੱਲੀ, 5 ਅਪਰੈਲ, (ਪੋਸਟ ਬਿਊਰੋ)- ਐਤਵਾਰ ਦੀ ਰਾਤ ਨੌਂ ਵਜੇ ਭਾਰਤ ਵਿੱਚ ਲੋਕਾਂ ਨੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਅਪੀਲ ਉੱਤੇ ਕੋਰੋਨਾ ਦੇ ਖਿਲਾਫ ਜੰਗ ਵਿੱਚ ਇੱਕਮੁੱਠਤਾ ਲਈ ਦੀਵੇ ਜਗਾਏ, ਪਰ ਮੋਦੀ ਦੀ ਅਪੀਲ ਕਿ ਇਸ ਮੌਕੇ ਕੋਈ ਹੁੱਲੜਬਾਜ਼ੀ ਨਹੀਂ ਕਰਨੀ, ਦੇ ਬਾਵਜੂਦ ਪਟਾਕੇ ਚਲਾ ਕੇ ਹੰਗਾਮਾ ਹੁੰਦਾ ਰਿਹਾ।
ਕੋਰੋਨਾ ਦੀ ਮਹਾਮਾਰੀ ਦੇ ਵਿਰੁੱਧ ਲੜਾਈ ਵਿਚ ਭਾਰਤ ਦੇ ਲੋਕਾਂ ਨੂੰ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਐਤਵਾਰ ਦੀ ਰਾਤ ਨੌਂ ਵਜੇ ਨੌਂ ਮਿੰਟ ਤਕ ਦੀਵੇ, ਮੋਮਬੱਤੀ ਅਤੇ ਟਾਰਚ ਦੀ ਰੋਸ਼ਨੀ ਜਗਾ ਕੇ ਇਕਜੁਟਤਾ ਦਿਖਾਉਣ ਨੂੰ ਕਿਹਾ ਸੀ। ਉਨ੍ਹਾਂ ਦੀ ਅਪੀਲ ਮੰਨਦੇ ਹੋਏ ਆਮ ਲੋਕਾਂ ਨੇ ਨੌਂ ਵੱਜਣ ਤੋਂ ਵੀ ਪਹਿਲਾਂ ਆਪਣੇ ਘਰਾਂ ਦੀਆਂ ਲਾਈਟਾਂ ਬੰਦ ਕੀਤੀਆਂ ਅਤੇ ਛੱਤਾਂ, ਦਰਵਾਜ਼ਿਆਂ ਅਤੇ ਬਾਲਕੋਨੀਆਂ ਉੱਤੇ ਦੀਵੇ ਜਗਾ ਕੇ ਰੱਖ ਦਿੱਤੇ। ਦੀਵਿਆਂ ਦੀਆਂ ਲੜੀਆਂ ਦੀਵਾਲੀ ਦੇ ਦਿਨ ਵਾਂਗ ਸੱਜੀਆਂ ਜਾਪਦੀਆਂ ਸਨ। ਇਸ ਨਾਲ ਕੋਰੋਨਾ ਦੀ ਮਹਾਮਾਰੀ ਦੌਰਾਨ ਲੋਕਾਂ ਦੀ ਸੇਵਾ ਕਰ ਰਹੇ ਸਿਹਤ ਮੁਲਾਜ਼ਮਾਂ, ਪੁਲਿਸ ਵਾਲਿਆਂ ਤੇ ਹੋਰ ਜ਼ਰੂਰੀ ਸੇਵਾਵਾਂ ਨਾਲ ਜੁੜੇ ਲੋਕਾਂ ਨਾਲ ਇੱਕਮੁੱਠਤਾ ਦਾ ਪ੍ਰਗਟਾਵਾ ਕੀਤਾ ਗਿਆ।
ਉਂਜ ਪ੍ਰਧਾਨ ਮੰਤਰੀ ਨੇ ਇਹ ਵੀ ਕਿਹਾ ਸੀ ਕਿ ਜਿਵੇਂ 22 ਮਾਰਚ ਦੇ ਜਨਤਾ ਕਰਫਿਊ ਦੇ ਦਿਨ ਸ਼ਾਮ ਵੇਲੇ ਜਦੋਂ ਤਾੜੀਆਂ ਮਾਰਨ ਅਤੇ ਥਾਲੀਆਂ ਵਜਾਉਣ ਨੂੰ ਕਿਹਾ ਸੀ ਤਾਂ ਬਹੁਤ ਸਾਰੇ ਲੋਕ ਜਲੂਸ ਕੱਢਣ ਤੁਰ ਪਏ ਸਨ, ਇਸ ਵਾਰੀ ਇਸ ਤਰ੍ਹਾਂ ਨਾ ਕੀਤਾ ਜਾਵੇ, ਪਰ ਇਸ ਵਾਰੀ ਵੀ ਲਗਭਗ ਉਹੋ ਕੁਝ ਹੁੰਦਾ ਰਿਹਾ। ਨੌਂ ਵਜੇ ਦੀਵੇ ਜਗਾਉਣ ਦੇ ਨਾਲ ਦੇਸ਼ ਵਿੱਚ ਕਈ ਥਾਂਵਾਂ ਤੋਂ ਪਟਾਕੇ ਚਲਾਉਣ ਅਤੇ ਨੱਚਣ ਆਦਿ ਦੀਆਂ ਖਬਰਾਂ ਵੀ ਮਿਲਦੀਆਂ ਰਹੀਆਂ।