ਨਵੀਂ ਦਿੱਲੀ, 5 ਅਪਰੈਲ, (ਪੋਸਟ ਬਿਊਰੋ)- ਭਾਰਤ ਵਿੱਚ ਤਾਮਿਲ ਨਾਡੂ ਵਿੱਚ ਇੱਕੋ ਦਿਨ 74, ਮਹਾਰਾਸ਼ਟਰ ਵਿੱਚ 67 ਅਤੇ ਦਿੱਲੀ ਵਿੱਚ ਇਕੋ ਦਿਨ ਵਿੱਚ ਕੋਰੋਨਾ ਦੇ 59 ਨਵੇਂ ਕੇਸ ਪਤਾ ਲੱਗਣ ਨਾਲ ਕੁੱਲ ਪੀੜਤਾਂ ਦੀ ਗਿਣਤੀ 3578 ਤੱਕ ਚਲੀ ਗਈ ਅਤੇ ਇਸ ਵਾਇਰਸ ਕਾਰਨ ਅੱਜ ਤਕ 89 ਲੋਕਾਂ ਦੀ ਮੌਤ ਹੋ ਗਈ ਹੈ।
ਕੇਂਦਰੀ ਸਿਹਤ ਮੰਤਰਾਲਾ ਦੀ ਐਤਵਾਰ ਨੂੰ ਜਾਰੀ ਰਿਪੋਰਟ ਮੁਤਾਬਕ ਕੋਰੋਨਾ ਦਾ ਕਹਿਰ ਭਾਰਤ ਦੇ 29 ਰਾਜਾਂ ਤੇ ਕੇਂਦਰੀ ਪ੍ਰਦੇਸ਼ਾਂ ਵਿੱਚ ਫੈਲ ਚੁੱਕਾ ਅਤੇ 3578 ਕੇਸਾਂ ਦੀ ਪੁਸ਼ਟੀ ਹੋਈ ਹੈ। ਇਨ੍ਹਾਂ ਵਿੱਚ 65 ਵਿਦੇਸ਼ੀ ਮਰੀਜ਼ ਸ਼ਾਮਲ ਹਨ। ਇਸ ਦੌਰਾਨ ਦੇਸ਼ ਵਿੱਚ ਅੱਜ ਤਕ 89 ਲੋਕਾਂ ਦੀ ਮੌਤ ਹੋਈ, ਪਰ 267 ਲੋਕ ਠੀਕ ਹੋਏ ਹਨ। ਮਹਾਰਾਸ਼ਟਰ ਦੇ ਸਭ ਤੋਂ ਵੱਧ 748 ਲੋਕ ਪੀੜਤ ਹਨ ਤੇ 24 ਲੋਕਾਂ ਦੀ ਮੌਤ ਹੋਈ ਹੈ। ਦੂਸਰੇ ਥਾਂ ਤਾਮਿਲ ਨਾਡੂ ਵਿੱਚ 485 ਲੋਕ ਪੀੜਤ ਹਨ ਅਤੇ ਤਿੰਨ ਮੌਤਾਂ ਹੋਈਆਂ ਹਨ। ਦਿੱਲੀ ਵਿੱਚ ਵੀ ਕੇਸਾਂ ਦੀ ਗਿਣਤੀ ਪੰਜ ਸੌ ਤੋਂ ਟੱਪ ਕੇ ਤਾਮਿਲ ਨਾਡੂ ਤੋਂ ਵਧ ਗਈ ਹੈ।