ਓਟਵਾ, 5 ਅਪਰੈਲ (ਪੋਸਟ ਬਿਊਰੋ) : ਫੂਡ ਬੈਂਕਜ਼ ਤੇ ਲੋਕਲ ਫੂਡ ਆਰਗੇਨਾਈਜ਼ੇਸ਼ਨਜ਼ ਵੱਲੋਂ ਦੇਸ਼ ਭਰ ਵਿੱਚ ਲੋੜਵੰਦ ਲੋਕਾਂ ਤੇ ਕਮਿਊਨਿਟੀਜ਼ ਦੀ ਮਦਦ ਕੀਤੀ ਜਾਂਦੀ ਹੈ। ਇਨ੍ਹਾਂ ਆਰਗੇਨਾਈਜੇ਼ਸ਼ਨਜ਼ ਦੀਆਂ ਸੇਵਾਵਾਂ ਦੀ ਮੰਗ ਅਚਾਨਕ ਕਾਫੀ ਵੱਧ ਗਈ ਹੈ ਤੇ ਡੋਨੇਸ਼ਨਜ਼ ਤੇ ਵਾਲੰਟੀਅਰਜ਼ ਦੀ ਘਾਟ ਕਾਰਨ ਇਨ੍ਹਾਂ ਉਤੇ ਚੁਫੇਰਿਓਂ ਦਬਾਅ ਵੀ ਵੱਧ ਗਿਆ ਹੈ। ਕਿਸੇ ਵੀ ਹੋਰ ਸਮੇਂ ਦੇ ਮੁਕਾਬਲੇ ਇਨ੍ਹਾਂ ਨੂੰ ਹੁਣ ਸਾਡੇ ਸਮਰਥਨ ਦੀ ਵਧੇਰੇ ਲੋੜ ਹੈ ਤਾਂ ਕਿ ਇਹ ਲੋੜਵੰਦ ਕੈਨੇਡੀਅਨਾਂ ਨੂੰ ਆਪਣੀਆਂ ਸੇਵਾਵਾਂ ਦੇਣੀਆਂ ਜਾਰੀ ਰੱਖ ਸਕਣ।
ਇਸ ਸੰਦਰਭ ਵਿੱਚ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਵੱਲੋਂ ਸਮਾਜਕ, ਆਰਥਿਤ ਤੇ ਕੋਵਿਡ-19 ਮਹਾਮਾਰੀ ਕਾਰਨ ਸਿਹਤ ਸਬੰਧੀ ਨਾਜ਼ੁਕ ਹਾਲਾਤ ਨਾਲ ਜੂਝ ਰਹੇ ਕੈਨੇਡੀਅਨਾਂ ਤੱਕ ਭੋਜਣ ਪਹੁੰਚਾਉਣ ਲਈ 100 ਮਿਲੀਅਨ ਡਾਲਰ ਨਿਵੇਸ਼ ਕਰਨ ਦਾ ਐਲਾਨ ਕੀਤਾ ਗਿਆ। ਟਰੂਡੋ ਨੇ ਆਖਿਆ ਕਿ ਕੈਨੇਡਾ ਸਰਕਾਰ ਉਨ੍ਹਾਂ ਕੌਮੀ, ਲੋਕਲ ਤੇ ਰੀਜਨਲ ਆਰਗੇਨਾਈਜ਼ੇਸ਼ਨਜ਼ ਨੂੰ ਫੰਡ ਮੁਹੱਈਆ ਕਰਾਵੇਗੀ ਜਿਹੜੀਆਂ ਖੁਰਾਕ ਦੀ ਕਿੱਲਤ ਮਹਿਸੂਸ ਕਰ ਰਹੇ ਕੈਨੇਡੀਅਨਾਂ ਤੇ ਕਮਿਊਨਿਟੀਜ਼ ਤੱਕ ਫੂਡ ਪਹੁੰਚਾਉਣਗੀਆਂ। ਇਨ੍ਹਾਂ ਆਰਗੇਨਾਈਜੇ਼ਸ਼ਨਜ਼ ਵਿੱਚ ਫੂਡ ਬੈਂਕਸ ਕੈਨੇਡਾ, ਸਾਲਵੇਸ਼ਨ ਆਰਮੀ, ਸੈਕੰਡ ਹਾਰਵੈਸਟ, ਕਮਿਊਨਿਟੀ ਫੂਡ ਸੈਂਟਰਜ਼ ਕੈਨੇਡਾ ਤੇ ਬ੍ਰੇਕਫਾਸਟ ਕਲੱਬ ਆਫ ਕੈਨੇਡਾ ਸ਼ਾਮਲ ਹਨ। ਇਹ ਕੈਨੇਡੀਅਨਾਂ, ਜਿਨ੍ਹਾਂ ਵਿੱਚ ਮੂਲਵਾਸੀ ਲੋਕ ਤੇ ਉੱਤਰੀ ਆਬਾਦੀ ਵੀ ਸ਼ਾਮਲ ਹੈ, ਦੀਆਂ ਲੋੜਾਂ ਪੂਰੀਆਂ ਕਰਨ ਲਈ ਆਪਣੇ ਭਾਈਵਾਲਾਂ ਨਾਲ ਰਲ ਕੇ ਕੰਮ ਕਰਨ ਵਾਲੀਆਂ ਆਰਗੇਨਾਈਜ਼ੇਸ਼ਨਜ਼ ਲਈ ਸੁਨਹਿਰਾ ਮੌਕਾ ਹੈ।
ਇਸ ਫੰਡ ਨਾਲ ਖਾਣਾ ਤੇ ਹੋਰ ਲੋੜੀਂਦੀਆਂ ਵਸਤਾਂ ਖਰੀਦਣ ਵਿੱਚ ਮਦਦ ਮਿਲੇਗੀ। ਇਸ ਨਾਲ ਇਹ ਆਰਗੇਨਾਈਜ਼ੇਸ਼ਨਜ਼ ਲੋਕਾਂ ਤੱਕ ਪਹੁੰਚਣ ਦੇ ਨਵੇਂ ਰਾਹ ਲੱਭ ਲੈਣਗੀਆਂ। ਇਸ ਫੰਡ ਨਾਲ ਇਹ ਜਥੇਬੰਦੀਆਂ ਨਵੇਂ ਸਾਜ਼ੋ ਸਮਾਨ ਨੂੰ ਖਰੀਦ ਵੀ ਸਕਣਗੀਆਂ ਤੇ ਕਿਰਾਏ ਉੱਤੇ ਵੀ ਲੈ ਸਕਣਗੀਆਂ।