ਲੰਡਨ, 5 ਅਪਰੈਲ (ਪੋਸਟ ਬਿਊਰੋ) : ਬ੍ਰਿਟਿਸ਼ ਪ੍ਰਧਾਨ ਮੰਤਰੀ ਬੌਰਿਸ ਜੌਹਨਸਨ ਨੂੰ ਐਤਵਾਰ ਨੂੰ ਹਸਪਤਾਲ ਦਾਖਲ ਕਰਵਾਇਆ ਗਿਆ। ਉਨ੍ਹਾਂ ਦੇ ਆਫਿਸ ਵੱਲੋਂ ਦਿੱਤੀ ਗਈ ਜਾਣਕਾਰੀ ਅਨੁਸਾਰ ਕੋਵਿਡ-19 ਹੋਣ ਤੋਂ ਦਸ ਦਿਨ ਬਾਅਦ ਵੀ ਉਨ੍ਹਾਂ ਅੰਦਰ ਇਸ ਦੇ ਲੱਛਣ ਪਾਏ ਜਾਣ ਕਾਰਨ ਅਜਿਹਾ ਕੀਤਾ ਗਿਆ।
ਜੌਹਨਸਨ ਦੇ ਆਫਿਸ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਡਾਕਟਰ ਦੀ ਸਲਾਹ ਉੱਤੇ ਹੀ ਹਸਪਤਾਲ ਦਾਖਲ ਕਰਵਾਇਆ ਗਿਆ ਹੈ, ਇਹ ਕੋਈ ਐਮਰਜੰਸੀ ਨਹੀਂ ਹੈ। ਉਨ੍ਹਾਂ ਨੂੰ ਕਿਸ ਹਸਪਤਾਲ ਦਾਖਲ ਕਰਵਾਇਆ ਗਿਆ ਹੈ ਇਸ ਬਾਰੇ ਕੋਈ ਜਾਣਕਾਰੀ ਨਹੀਂ ਦਿੱਤੀ ਗਈ। ਪ੍ਰਧਾਨ ਮੰਤਰੀ ਦੇ ਡਾਊਨਿੰਗ ਸਟਰੀਟ ਆਫਿਸ ਨੇ ਆਖਿਆ ਕਿ ਇਹ ਇਹਤਿਆਤਨ ਚੱੁਕਿਆ ਗਿਆ ਕਦਮ ਹੈ ਤੇ ਜੌਹਨਸਨ ਸਰਕਾਰ ਦੇ ਇਨਚਾਰਜ ਰਹਿਣਗੇ।
55 ਸਾਲਾ ਜੌਹਨਸਨ ਨੂੰ 26 ਮਾਰਚ ਨੂੰ ਕੋਵਿਡ-19 ਟੈਸਟ ਪਾਜ਼ੀਟਿਵ ਆਉਣ ਤੋਂ ਬਾਅਦ ਉਨ੍ਹਾਂ ਦੀ ਡਾਊਨਿੰਗ ਸਟਰੀਟ ਰਿਹਾਇਸ਼ਗਾਹ ਉੱਤੇ ਹੀ ਕੁਆਰਨਟੀਨ ਕਰਕੇ ਰੱਖਿਆ ਜਾ ਰਿਹਾ ਸੀ। ਬ੍ਰਿਟੇਨ ਵੱਲੋਂ ਇਸ ਆਊਟਬ੍ਰੇਕ ਲਈ ਕਿਹੋ ਜਿਹੀਆਂ ਕੋਸਿ਼ਸ਼ਾਂ ਕੀਤੀਆਂ ਜਾ ਰਹੀਆਂ ਹਨ ਉਸ ਲਈ ਹੋਣ ਵਾਲੀਆਂ ਸਾਰੀਆਂ ਮੀਟਿੰਗਾਂ ਦੀ ਅਗਵਾਈ ਜੌਹਨਸਨ ਵੱਲੋਂ ਕੀਤੀ ਜਾਂਦੀ ਰਹੀ। ਦਸ ਦਿਨ ਆਈਸੋਲੇਸ਼ਨ ਵਿੱਚ ਰਹਿਣ ਦੌਰਾਨ ਉਨ੍ਹਾਂ ਕਈ ਵੀਡੀਓ ਮੈਸੇਜ ਜਾਰੀ ਕੀਤੇ। ਪਰ ਫਿਰ ਵੀ ਬੁਖਾਰ ਖਤਮ ਨਾ ਹੋਣ ਤੋਂ ਬਾਅਦ ਉਨ੍ਹਾਂ ਨੂੰ ਹਸਪਤਾਲ ਦਾਖਲ ਕਰਵਾਉਣ ਦਾ ਫੈਸਲਾ ਲਿਆ ਗਿਆ ਜਿੱਥੇ ਡਾਕਟਰ ਹੁਣ ਸਿੱਧਿਆਂ ਉਨ੍ਹਾਂ ਦੀ ਜਾਂਚ ਕਰ ਸਕਣਗੇ।