ਵਾਸ਼ਿੰਗਟਨ, 5 ਅਪ੍ਰੈਲ (ਪੋਸਟ ਬਿਊਰੋ)- ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਐਲਾਨ ਕੀਤਾ ਹੈ ਕਿ ਉਹ ਉਸ ਸੀਨੀਅਰ ਖੁਫੀਆ ਅਧਿਕਾਰੀ ਨੂੰ ਨੌਕਰੀ ਤੋਂ ਕੱਢ ਰਹੇ ਹਨ, ਜਿਸ ਦੀ ਪਿਛਲੇ ਸਾਲ ਟਰੰਪ ਦੇ ਖਿਲਾਫ ਆਰੰਭੀ ਗਈ ਮਹਾਦੋਸ਼ ਦੀ ਸੁਣਵਾਈ ਪਿੱਛੇ ਅਹਿਮ ਭੂਮਿਕਾ ਸੀ। ਵਰਨਣ ਯੋਗ ਹੈ ਕਿ ਅਗਸਤ 2019 ਵਿੱਚ ਟਰੰਪ ਖਿਲਾਫ ਕੀਤੀ ਸ਼ਿਕਾਇਤ ਮਗਰੋਂ ਉਨ੍ਹਾਂ ਵਿਰੁੱਧ ਮਹਾਦੋਸ਼ ਦੀ ਸੁਣਵਾਈ ਸ਼ੁਰੂ ਹੋਈ ਸੀ।
ਪਾਰਲੀਮੈਂਟ ਦੇ ਉੱਪਰਲੇ ਸਦਾਨ ਸੈਨੇਟ ਦੀ ਇੰਟੈਲੀਜੈਂਸ ਕਮੇਟੀ ਨੂੰ ਲਿਖੇ ਪੱਤਰ ਵਿੱਚ ਟਰੰਪ ਨੇ ਕਿਹਾ ਕਿ ਉਹ ਮਾਈਕਲ ਐਟਕਿਨਸਨ ਤੋਂ ਭਰੋਸਾ ਗੁਆ ਚੁੱਕੇ ਹਨ। ਐਟਕਿਨਸਨ ਵੱਡੇ ਅਮਰੀਕੀ ਖੁਫੀਆ ਤਾਣੇ-ਬਾਣੇ ਦੇ ਆਜ਼ਾਦਾਨਾ ਇੰਸਪੈਕਟਰ ਜਨਰਲ ਸਨ। ਉਨ੍ਹਾਂ ਪਿਛਲੇ ਸਾਲ ਅਗਸਤ ਵਿੱਚ ਇੱਕ ਬੇਨਾਮੀ ਸ਼ਿਕਾਇਤ ਦੀ ਜਾਂਚ ਕੀਤੀ ਸੀ। ਇਸ 'ਚ ਟਰੰਪ ਵੱਲੋਂ ਯੂਕਰੇਨ ਤੋਂ ਸਿਆਸੀ ਲਾਭ ਲੈਣ ਬਾਰੇ ਜ਼ਿਕਰ ਸੀ ਤੇ ਇਹ ਮਹਾਦੋਸ਼ ਦੀ ਕਾਰਵਾਈ ਦਾ ਆਧਾਰ ਬਣੀ।
ਵਰਨਣ ਯੋਗ ਹੈ ਕਿ ਰਾਸ਼ਟਰਪਤੀ ਟਰੰਪ ਉੱਤੇ ਯੂਕਰੇਨ ਨੂੰ ਫੌਜੀ ਮਦਦ ਰੋਕਣ ਦੇ ਦੋਸ਼ ਲਾਏ ਗਏ ਸਨ ਕਿਉਂਕਿ ਉਹ ਡੈਮੋਕ੍ਰੇਟ ਉਮੀਦਵਾਰ ਜੋਅ ਬਿਡੇਨ ਖਿਲਾਫ ਯੂਰਪੀ ਮੁਲਕ ਤੋਂ ਕਾਰਵਾਈ ਦੀ ਮੰਗ ਕਰ ਰਹੇ ਸਨ। ਇਸ ਨਾਲ ਉਹ ਬਿਡੇਨ ਦੀ ਚੋਣ ਮੁਹਿੰਮ ਫਿੱਕੀ ਪਾਉਣਾ ਚਾਹੁੰਦੇ ਸਨ। ਸਰਕਾਰੀ ਅਟਾਰਨੀ ਐਟਕਿਨਸਨ ਨੇ ਸ਼ਿਕਾਇਤ ਨਿਆਂ ਵਿਭਾਗ ਤੇ ਕਾਂਗਰਸ ਨੂੰ ਭੇਜੀ ਸੀ। ਫਿਰ ਉਨ੍ਹਾਂ ਨੇ ਗਵਾਹੀ ਵੀ ਦਿੱਤੀ ਸੀ। ਟਰੰਪ ਨੂੰ ਰਿਪਬਲੀਕਨ ਕੰਟਰੋਲ ਵਾਲੀ ਸੈਨੇਟ ਨੇ ਫਰਵਰੀ ਵਿੱਚ ਨਿਰਦੋਸ਼ ਕਰਾਰ ਦਿੱਤਾ ਸੀ। ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਭਰੋਸਾ ਦਿੱਤਾ ਹੈ ਕਿ ਨਵੰਬਰ ਮਹੀਨੇ ਹੋਣ ਵਾਲੀਆਂ ਚੋਣਾਂ ਕੋਰੋਨਾ ਵਾਇਰਸ ਕਾਰਨ ਟਲਣ ਦੀ ਸੰਭਾਵਨਾ ਨਹੀਂ ਹੈ। ਰਾਸ਼ਟਰਪਤੀ ਟਰੰਪ ਨੇ ਮੇਲ ਰਾਹੀਂ ਵੋਟਿੰਗ ਦਾ ਸਖਤ ਵਿਰੋਧ ਕੀਤਾ ਹੈ ਤੇ ਵੋਟਰ ਆਈ ਡੀ ਦਾ ਤਕੜਾ ਸਮਰਥਨ ਕੀਤਾ ਹੈ। ਟਰੰਪ ਨੇ ਕਿਹਾ ਕਿ ਵੋਟਰ ਆਈ ਡੀ ਹੀ ਰੀਅਲ ਡੀਲ ਹੈ। ਰਾਸ਼ਟਰਪਤੀ ਨੇ ਕਿਹਾ ਕਿ ਵੋਟਰ ਆਈ ਡੀ ਤੋਂ ਬਿਨਾਂ ਧੋਖਾਧੜੀ ਦੀ ਸੰਭਾਵਨਾ ਹੈ। ਜ਼ਿਕਰਯੋਗ ਹੈ ਕਿ ਅਮਰੀਕਾ ਵਿੱਚ ਕਈ ਸੂਬੇ ਵੋਟਰ ਆਈ ਡੀ ਦਾ ਇਸਤੇਮਾਲ ਨਹੀਂ ਕਰਦੇ।