ਇਸਲਾਮਾਬਾਦ, 5 ਅਪ੍ਰੈਲ (ਪੋਸਟ ਬਿਊਰੋ)- ਕੋਰੋਨਾ ਵਾਇਰਸ ਨਾਲ ਜੂਝ ਰਹੇ ਪਾਕਿਸਤਾਨ ਨੂੰ ਉਸ ਦੇ ਸਦਾਬਹਾਰ ਮਿੱਤਰ ਚੀਨ ਨੇ ਧੋਖਾ ਦੇ ਦਿੱਤਾ ਹੈ। ਚੀਨ ਦਾ ਮੈਡੀਕਲ ਸਪਲਾਈ ਭੇਜਣ ਦਾ ਵਾਅਦਾ ਸੀ ਤੇ ਜਦ ਓਥੋਂ ਆਏ ਸਾਮਾਨ ਨੂੰ ਖੋਲ੍ਹ ਕੇ ਦੇਖਿਆ ਤਾਂ ਪਤਾ ਲੱਗਾ ਕਿ ਐੱਨ-95 ਮਾਸਕ ਦੀ ਜਗ੍ਹਾ ਅੰਡਰਵੇਅਰ ਨਾਲ ਬਣੇ ਮਾਸਕ ਪਾਕਿਸਤਾਨ ਨੂੰ ਫੜਾ ਦਿੱਤੇ ਗਏ ਹਨ। ਯੂਰਪ ਦੇ ਕਈ ਦੇਸ਼ਾਂ ਨੇ ਪਹਿਲਾਂ ਹੀ ਸ਼ਿਕਾਇਤ ਕੀਤੀ ਸੀ ਕਿ ਚੀਨ ਤੋਂ ਮਿਲੇ ਮਾਸਕ ਤੇ ਕਿਟ ਖਰਾਬ ਗੁਣਵੱਤਾ ਦੇ ਹਨ। ਸਪੇਨ ਅਤੇ ਨੀਦਰਲੈਂਡ ਨੇ ਮੈਡੀਕਲ ਸਪਲਾਈ ਵਾਪਸ ਕਰਨ ਦਾ ਵੀ ਫੈਸਲਾ ਕਰ ਲਿਆ ਹੈ।
ਚੀਨ ਨੇ ਪਿਛਲੇ ਦਿਨੀਂ ਪਾਕਿਸਤਾਨ ਨਾਲ ਵਾਅਦਾ ਕੀਤਾ ਸੀ ਕਿ ਉਹ ਉਸ ਨੂੰ ਐੱਨ-95 ਮਾਸਕ ਭੇਜੇਗਾ। ਪਾਕਿ ਪ੍ਰਧਾਨ ਮੰਤਰੀ ਇਮਰਾਨ ਖਾਨ ਆਏ ਦਿਨ ਕੋਰੋਨਾ ਵਾਇਰਸ ਨਾਲ ਲੜਨ ਦੀ ਤਿਆਰੀ ਬਾਰੇ ਆਪਣੇ ਭਾਸ਼ਣਾਂ ਵਿੱਚ ਚੀਨ ਦਾ ਗੁਣਗਾਨ ਕਰਦੇ ਦੇਖੇ ਜਾਂਦੇ ਹਨ, ਪਰ ਪਾਕਿ ਮੀਡੀਆ ਦੇ ਮੁਤਾਬਕ ਜਦ ਚੀਨ ਤੋਂ ਮੈਡੀਕਲ ਸਪਲਾਈ ਪਾਕਿਸਤਾਨ ਪਹੁੰਚੀ ਤਾਂ ਇਹ ਅੰਡਰਵੇਅਰ ਨਾਲ ਬਣੇ ਮਾਸਕ ਸਨ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਸਿੰਧ ਦੀ ਸੂਬਾਈ ਸਰਕਾਰ ਨੇ ਬਿਨਾਂ ਜਾਂਚ ਕੀਤੇ ਹੀ ਹਸਪਤਾਲਾਂ ਵਿੱਚ ਇਹ ਮਾਸਕ ਵੀ ਭੇਜ ਦਿੱਤੇ।