ਕੁਰੂਕਸ਼ੇਤਰ, 5 ਅਪ੍ਰੈਲ (ਪੋਸਟ ਬਿਊਰੋ)- ਦੋ ਸਾਲ ਵਾਲਾ ਵਰਕ ਪਰਮਿਟ 'ਤੇ ਇੰਗਲੈਂਡ ਭੇਜਣ ਦਾ ਝਾਂਸਾ ਦੇ ਕੇ ਇੱਕ ਨੌਜਵਾਨ ਤੋਂ 13 ਲੱਖ ਠੱਗਣ ਦਾ ਇੱਕ ਮਾਮਲਾ ਸਾਹਮਣੇ ਆਇਆ ਹੈ। ਪੁਲਸ ਨੇ ਚਾਰ ਲੋਕਾਂ ਉੱਤੇ ਧੋਖਾਧੜੀ ਦਾ ਕੇਸ ਦਰਜ ਕਰ ਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।
ਝਿੰਵਰੇਹੜੀ ਪਿੰਡ ਦੇ ਰਾਜਿੰਦਰ ਨੇ ਪੁਲਸ ਨੂੰ ਸ਼ਿਕਾਇਤ ਦਿੱਤੀ ਹੈ, ਉਹ ਵਿਦੇਸ਼ ਜਾਣਾ ਚਾਹੁੰਦਾ ਸੀ। ਏਸੇ ਪਿੰਡ ਦਾ ਧਰਮਿੰਦਰ ਵਿਦੇਸ਼ ਭੇਜਣ ਲਈ ਏਜੰਟ ਵਜੋਂ ਕੰਮ ਕਰਦਾ ਹੈ। ਉਸ ਨੇ ਇੰਗਲੈਂਡ ਵਿੱਚ ਦੋ ਸਾਲ ਦੇ ਵਰਕ ਪਰਮਿਟ 'ਤੇ ਭੇਜਣ ਦਾ ਭਰੋਸਾ ਦਿੱਤਾ। ਉਸ ਦੇ ਸਾਥੀ ਦਿੱਲੀ ਵਾਸੀ ਅਮਨਦੀਪ ਸਿੰਘ, ਅਮਿਤ ਅਤੇ ਜਲੰਧਰ ਵਾਸੀ ਸਵਰਣ ਸਿੰਘ ਸਮੇਤ ਇੱਕ ਹੋਰ ਸਾਥੀ ਉਕਤ ਸਾਰੇ ਇਕੱਠੇ ਕੰਮ ਕਰਦੇ ਹਨ। ਦੋਸ਼ੀਆਂ 'ਤੇ ਯਕੀਨ ਕਰ ਕੇ ਉਨ੍ਹਾਂ ਨੂੰ ਪਾਸਪੋਰਟ ਸਮੇਤ ਹੋਰ ਦਸਤਾਵੇਜ਼ ਸੌਂਪ ਦਿੱਤੇ ਅਤੇ ਐਡਵਾਂਸ ਵਿੱਚ ਡੇਢ ਲੱਖ ਵੀ ਦਿੱਤੇ। ਇਸ ਦੇ ਬਾਅਦ ਦੋਸ਼ੀਆਂ ਨੇ ਬੰਗਲੌਰ ਅੰਬੈਂਸੀ ਵਿੱਚ ਇੰਗਲੈਂਡ ਦੇ ਲਈ ਵੀਜ਼ਾ ਅਪਲਾਈ ਕਰਨ ਨੂੰ ਭੇਜਿਆ। ਸ਼ਿਕਾਇਤ ਕਰਤਾ ਨੇ ਦੱਸਿਆ ਕਿ ਦੋਸ਼ੀਆਂ ਨੇ ਫਿਰ ਉਸ ਤੋਂ ਢਾਈ ਲੱਖ ਹੋਰ ਲਏ ਅਤੇ ਇੰਗਲੈਂਡ ਦੀ ਬਜਾਏ ਮਲੇਸ਼ੀਆ ਭੇਜ ਦਿੱਤਾ। ਕੁਝ ਦਿਨ ਬਾਅਦ ਉਥੋਂ ਵੀ ਵਾਪਸ ਭਾਰਤ ਭੇਜ ਦਿੱਤਾ ਗਿਆ। ਤਦ ਦੋਸ਼ੀਆਂ ਨੇ ਭਰੋਸਾ ਦਿੱਤਾ ਕਿ ਇਸੇ ਫਾਈਲ 'ਤੇ ਇੰਗਲੈਂਡ ਭੇਜਣਗੇ। ਕਈ ਮਹੀਨੇ ਖਰਚਿਆਂ ਦੇ ਨਾਂਅ 'ਤੇ ਕੁੱਲ 13 ਲੱਖ ਰੁਪਏ ਦੋਸ਼ੀਆਂ ਨੇ ਉਸ ਤੋਂ ਲੈ ਲਏ। ਇੰਨੇ ਪੈਸੇ ਦੇਣ ਦੇ ਬਾਅਦ ਵੀ ਜਦ ਉਸ ਨੂੰ ਵਿਦੇਸ਼ ਨਹੀਂ ਭੇਜਿਆ ਗਿਆ ਤਾਂ ਉਸ ਨੂੰ ਖੁਦ ਨਾਲ ਹੋਈ ਠੱਗੀ ਦਾ ਪਤਾ ਲੱਗਾ। ਪੈਸੇ ਵਾਪਸ ਮੰਗੇ, ਤਾਂ ਦੋਸ਼ੀ ਟਾਲ ਮਟੋਲ ਕਰਦੇ ਰਹੇ। ਬਾਅਦ ਵਿੱਚ ਪੈਸੇ ਦੇਣ ਤੋਂ ਮਨ੍ਹਾ ਕਰ ਦਿੱਤਾ। ਪੁਲਸ ਨੇ ਦੋਸ਼ੀਆਂ ਦੇ ਖਿਲਾਫ ਧੋਖਾਧੜੀ ਦਾ ਕੇਸ ਦਰਜ ਕੀਤਾ ਹੈ।