ਵੇਰਕਾ, 5 ਅਪ੍ਰੈਲ (ਪੋਸਟ ਬਿਊਰੋ)- ਵੇਰਕਾ ਦੇ ਮਾਸਟਰ ਹਰਪਾਲ ਸਿੰਘ ਵੇਰਕਾ, ਕੌਂਸਲਰ ਪਰਮਿੰਦਰ ਕੌਰ ਹੁੰਦਲ, ਸਰਦਾਰਾ ਸਿੰਘ, ਪ੍ਰੋਫੈਸਰ ਬਲਦੇਵ ਸਿੰਘ, ਬਲਬੀਰ ਸਿੰਘ, ਨਵਤੇਜ ਸਿੰਘ ਤੇ ਇਲਾਕੇ ਦੇ ਹੋਰ ਲੋਕਾਂ ਨੇ ਕਿਹਾ ਹੈ ਕਿ ਦੋ ਅਪ੍ਰੈਲ ਨੂੰ ਸਵੇਰੇ ਪੰਥ ਦੀ ਪ੍ਰਸਿੱਧ ਧਾਰਮਿਕ ਹਸਤੀ ਪਦਮਸ੍ਰੀ ਭਾਈ ਨਿਰਮਲ ਸਿੰਘ ਖਾਲਸਾ ਦੇ ਕੋਰੋਨਾ ਵਾਇਰਸ ਨਾਲ ਦਿਹਾਂਤ ਤੋਂ ਬਾਅਦ ਪ੍ਰਸ਼ਾਸਨ ਵੱਲੋਂ ਵੇਰਕਾ ਦੇ ਸ਼ਮਸ਼ਾਨਘਾਟ 'ਚ ਸਸਕਾਰ ਕਰਨ ਦੇ ਅਚਨਚੇਤ ਲਏ ਫੈਸਲੇ ਨਾਲ ਵੇਰਕਾ ਵਾਸੀਆਂ 'ਚ ਸਹਿਮ ਪੈਦਾ ਹੋਣ ਕਾਰਨ ਲੋਕ ਆਪ ਮੁਹਾਰੇ ਇਕੱਠੇ ਹੋਣੇ ਸ਼ੁਰੂ ਹੋ ਗਏ ਸਨ ਤੇ ਹਾਲਾਤ ਬਾਰੇ ਮੋਹਤਬਰਾਂ ਨੂੰ ਸੂਚਿਤ ਕੀਤਾ ਗਿਆ ਸੀ। ਵੇਰਕਾ ਵਾਸੀਆਂ ਨੂੰ ਡਰ ਸੀ ਕਿ ਨੇੜੇ ਪੈਂਦੇ ਅੰਮ੍ਰਿਤਸਰ ਦੇ ਸ਼ਹੀਦਾਂ ਸਾਹਿਬ ਤੇ ਦੁਰਗਿਆਣਾ ਸ਼ਮਸ਼ਾਨਘਾਟ ਛੱਡ ਕੇ ਵੇਰਕਾ 'ਚ ਭਾਈ ਖਾਲਸਾ ਦਾ ਸਰਕਾਰ ਕਿਉਂ ਕੀਤਾ ਜਾ ਰਿਹਾ ਹੈ। ਮੋਹਤਬਰਾਂ ਨੇ ਵਿਚਾਰ ਕਰ ਕੇ ਅਧਿਕਾਰੀਆਂ ਨੂੰ ਸਸਕਾਰ ਲਈ ਬਦਲਵੇਂ ਪ੍ਰਬੰਧ ਕਰਨ ਦਾ ਸੁਝਾਅ ਦਿੱਤਾ ਸੀ ਕਿ ਭਾਈ ਨਿਰਮਲ ਸਿੰਘ ਖਾਲਸਾ ਮਹਾਨ ਧਾਰਮਿਕ ਸ਼ਖਸੀਅਤ ਹਨ, ਇਸ ਲਈ ਉਨ੍ਹਾਂ ਦੇ ਸਤਿਕਾਰ ਵਜੋਂ ਪਿੰਡ ਵੇਰਕਾ ਦੀ ਜੁਮਲਾ ਮੁਸ਼ਤਰਕਾ ਮਾਲਕਾਨ ਕਮੇਟੀ ਵੱਲੋਂ ਜ਼ਮੀਨ ਦੀ ਪੇਸ਼ਕਸ਼ ਕੀਤੀ ਗਈ ਸੀ। ਮੋਹਤਬਰਾਂ ਨੇ ਦੱਸਿਆ ਕਿ ਕਾਫੀ ਸਮਾਂ ਬੀਤਣ 'ਤੇ ਮਾਮਲਾ ਸਿਰੇ ਨਾ ਚੜ੍ਹਨ 'ਤੇ ਭਾਈ ਖਾਲਸਾ ਦੇ ਪੁੱਤਰ ਨਾਲ ਫੋਨ 'ਤੇ ਸੰਪਰਕ ਕਰ ਕੇ ਅਧਿਕਾਰੀਆਂ ਨਾਲ ਗੱਲ ਕਰਵਾਉਣ ਤੇ ਸਸਕਾਰ ਕਰਵਾਉਣ ਲਈ ਕਮੇਟੀ ਨੇ ਸਹਿਮਤੀ ਨਾਲ ਮਤਾ ਪਾਸ ਕਰ ਕੇ ਅਧਿਕਾਰੀਆਂ ਨੂੰ ਵੇਰਕਾ ਦੀ ਨੌਂ ਕਨਾਲ, ਦੋ ਮਰਲੇ ਜ਼ਮੀਨ ਸਪੁਰਦ ਕਰਨ ਦਾ ਵਾਅਦਾ ਕੀਤਾ ਤੇ ਕਮੇਟੀ ਵੱਲੋਂ ਮਤਾ ਵੀ ਪਾ ਕੇ ਦਿੱਤਾ ਗਿਆ।
ਕਮੇਟੀ ਨੇ ਸਾਫ ਕੀਤਾ ਕਿ ਉਦੋਂ ਤੱਕ ਭਾਈ ਨਿਰਮਲ ਸਿੰਘ ਖਾਲਸਾ ਦੀ ਦੇਹ ਸ੍ਰੀ ਗੁਰੂ ਨਾਨਕ ਦੇਵ ਹਸਪਤਾਲ ਵਿੱਚ ਸੀ, ਸਸਕਾਰ ਲਈ ਸਮੱਗਰੀ ਤਿਆਰ ਹੋਣ ਪਿੱਛੋਂ ਵੇਰਕਾ ਵਿੱਚ ਲਿਆਂਦੀ ਸੀ। ਵੇਰਕਾ ਵਾਸੀਆਂ ਨੇ ਇਸ ਗੱਲ ਨੂੰ ਝੂਠਾ ਕਰਾਰ ਦਿੱਤਾ ਕਿ ਭਾਈ ਖਾਲਸਾ ਦੀ ਦੇਹ ਪਹਿਲਾਂ ਲਿਆਂਦੀ ਗਈ ਸੀ ਜਿਸ ਨੂੰ ਪਿੰਡ ਵਾਸੀਆਂ ਨੇ ਵਾਪਸ ਕੀਤਾ ਹੈ। ਉਨ੍ਹਾ ਨੇ ਇਸ ਗੁੁੰਮਰਾਹਕੁੰਨ ਪ੍ਰਚਾਰ ਨੂੰ ਵੀ ਗਲਤ ਕਿਹਾ ਕਿ ਭਾਈ ਖਾਲਸਾ ਦਾ ਜੱਦੀ ਪਿੰਡ ਵੇਰਕਾ ਹੈ। ਵੇਰਕਾ ਵਾਸੀਆਂ ਨੇ ਸਪੱਸ਼ਟ ਕੀਤਾ ਕਿ ਵਿਵਾਦਤ ਸ਼ਮਸ਼ਾਨਘਾਟ ਪਿੰਡ ਦੇ ਆਲੇ ਦੁਆਲੇ ਦੇ ਲੋਕਾਂ ਦਾ ਸਾਂਝਾ ਹੈ। ਇਸ ਲਈ ਉਕਤ ਫੈਸਲਾ ਕਿਸੇ ਨਿੱਜੀ ਵਿਅਕਤੀ ਦਾ ਨਾ ਹੋ ਕੇ ਕੋਰੋਨਾ ਦੇ ਡਰ ਕਾਰਨ ਵੇਰਕਾ ਬਹੁਗਿਣਤੀ ਲੋਕਾਂ ਦਾ ਸੀ ਜਿਸ ਨੂੰ ਸਿਆਸਤ ਨਾਲ ਜੋੜ ਕੇ ਨਾ ਵੇਖਿਆ ਜਾਵੇ। ਵੇਰਕਾ ਵਾਸੀਆਂ ਨੇ ਸਮੂਹ ਨਾਨਕ ਲੇਵਾ ਸੰਗਤ ਤੇ ਭਾਈ ਨਿਰਮਲ ਸਿੰਘ ਖਾਲਸਾ ਦੇ ਪਰਵਾਰ ਨੂੰ ਬੇਨਤੀ ਕੀਤੀ ਹੈ ਕਿ ਜਾਣੇ-ਅਣਜਾਣੇ ਵਿੱਚ ਡਰ ਤੇ ਸਹਿਮ ਕਾਰਨ ਹੋਈ ਭੁੱਲ ਲਈ ਉਹ ਮੁਆਫੀ ਮੰਗਦੇ ਹਨ।