ਦੁਬਈ, 31 ਅਕਤੂਬਰ (ਪੋਸਟ ਬਿਊਰੋ)- ਭਾਰਤ ਦੇ ਨੌਜਵਾਨ ਤੇਜ਼ ਗੇਂਦਬਾਜ਼ ਖਲੀਲ ਅਹਿਮਦ ਨੂੰ ਮੁੰਬਈ ਵਿੱਚ ਚੌਥੇ ਵਨ ਡੇ ਮੈਚ ਦੌਰਾਨ ਵੈਸਟ ਇੰਡੀਜ਼ ਦੇ ਬੱਲੇਬਾਜ਼ ਮਾਰਲੋਨ ਸੈਮੂਅਲਜ਼ ਨੂੰ ਹਮਲਾਵਰ ਵਿਦਾਈ ਦੇਣ ਲਈ ਚਿਤਾਵਨੀ ਤੇ ਇਕ ਡੀਮੈਰਿਟ ਪੁਆਇੰਟ ਦਿੱਤਾ ਗਿਆ। ਖਲੀਲ ਨੂੰ ਆਈ ਸੀ ਸੀ ਦੇ ਜ਼ਾਬਤੇ ਦੇ ਲੈਵਲ ਇਕ ਦੇ ਉਲੰਘਣ ਦਾ ਦੋਸ਼ੀ ਪਾਇਆ ਗਿਆ ਅਤੇ ਕਾਰਵਾਈ ਕੀਤੀ ਗਈ ਹੈ।
ਆਈ ਸੀ ਸੀ ਨੇ ਇੱਕ ਬਿਆਨ ਵਿੱਚ ਕਿਹਾ ਕਿ ਇਹ ਘਟਨਾ 14ਵੇਂ ਓਵਰ ਵਿੱਚ ਹੋਈ, ਜਦ ਖੱਬੇ ਹੱਥ ਦਾ ਇਹ ਤੇਜ਼ ਗੇਂਦਬਾਜ਼ ਸੈਮੂਅਲਜ਼ ਨੂੰ ਸਲਿਪ ਵਿੱਚ ਰੋਹਿਤ ਸ਼ਰਮਾ ਹੱਥੋਂ ਕੈਚ ਕਰਾਉਣ ਤੋਂ ਬਾਅਦ ਆਊਟ ਹੋਣ ਵਾਲੇ ਬੱਲੇਬਾਜ਼ ਵੱਲ ਹਮਲਾਵਰ ਅੰਦਾਜ਼ ਨਾਲ ਵਧਿਆ, ਜੋ ਮੈਦਾਨੀ ਅੰਪਾਇਰਾਂ ਦੀ ਨਜ਼ਰ ਵਿੱਚ ਵੈਸਟ ਇੰਡੀਜ਼ ਦੇ ਖਿਡਾਰੀ ਨੂੰ ਮੋੜਵੀਂ ਪ੍ਰਤੀਕਿਰਿਆ ਲਈ ਮਜਬੂਰ ਕਰ ਸਕਦਾ ਸੀ। ਖਲੀਲ ਨੇ ਜ਼ਾਬਤੇ ਦੇ ਨਿਯਮ 2.5 ਦਾ ਉਲੰਘਣ ਕੀਤਾ ਜੋ ਅਜਿਹੀ ਭਾਸ਼ਾ ਜਾਂ ਇਸ਼ਾਰਾ ਕਰਨ ਨਾਲ ਸਬੰਧਤ ਹੈ, ਜਿਸ ਨਾਲ ਅੰਤਰਰਾਸ਼ਟਰੀ ਮੈਚ ਦੌਰਾਨ ਆਊਟ ਹੋਣ ਵਾਲੇ ਬੱਲੇਬਾਜ਼ ਨੂੰ ਨੀਵਾਂ ਦਿਖਾਇਆ ਜਾਵੇ ਜਾਂ ਉਸ ਨੂੰ ਹਮਲਾਵਰ ਪ੍ਰਤੀਕਿਰਿਆ ਦੇ ਲਈ ਮਜਬੂਰ ਕੀਤਾ ਜਾਵੇ। ਲੈਵਲ ਇਕ ਦੇ ਅਪਰਾਧ ਲਈ ਘੱਟੋ-ਘੱਟ ਸਜ਼ਾ ਅਧਿਕਾਰਿਕ ਝਾੜ ਤੇ ਜ਼ਿਆਦਾ ਤੋਂ ਜ਼ਿਆਦਾ ਸਜ਼ਾ ਖਿਡਾਰੀ ਦੀ ਮੈਚ ਫੀਸ ਦਾ 50 ਫੀਸਦੀ ਜੁਰਮਾਨਾ ਹੈ। ਉਸ ਨੂੰ ਇਕ ਜਾਂ ਦੋ ਡਿਮੈਰਿਟ ਅੰਕ ਦਿੱਤੇ ਜਾ ਸਕਦੇ ਹਨ। ਜੇ 24 ਮਹੀਨੇ ਦੇ ਸਮੇਂ ਦੌਰਾਨ ਖਿਡਾਰੀ ਦੇ ਚਾਰ ਜਾਂ ਇਸ ਤੋਂ ਜ਼ਿਆਦਾ ਡਿਮੈਰਿਟ ਅੰਕ ਹੁੰਦੇ ਹਨ ਤਾਂ ਉਹ ਮੁਅੱਤਲੀ ਅੰਕ ਵਿੱਚ ਬਦਲ ਜਾਂਦੇ ਹਨ।