ਨਵੀਂ ਦਿੱਲੀ, 4 ਅਪਰੈਲ, (ਪੋਸਟ ਬਿਊਰੋ)- ਭਾਰਤ ਵਿੱਚ ਕੋਰੋਨਾ ਦੀ ਇਨਫੈਕਸ਼ਨ ਦੇ ਕੇਸ ਵਧ ਰਹੇ ਹਨ ਤੇ ਸ਼ਨੀਵਾਰ ਸ਼ਾਮ ਤੱਕ 500 ਤੋਂ ਵੱਧ ਨਵੇਂ ਕੇਸ ਪਤਾ ਲੱਗਣ ਨਾਲ ਇਹ ਅੰਕੜਾ ਸਾਢੇ ਤਿੰਨ ਹਜ਼ਾਰ ਤੋਂ ਟੱਪ ਗਿਆ ਹੈ, ਜਿਨ੍ਹਾਂ ਵਿੱਚੋਂ ਲਗਪਗ ਅੱਧੇ ਲੋਕ ਤਬਲੀਗੀ ਜਮਾਤ ਵਾਲੇ ਹਨ। ਮੌਤਾਂ ਦੀ ਗਿਣਤੀ 100 ਤੋਂ ਟੱਪ ਗਈ ਹੈ।
ਮਿਲੀ ਜਾਣਕਾਰੀ ਅਨੁਸਾਰ ਸ਼ਨਿਚਰਵਾਰ ਨੂੰ ਮਹਾਰਾਸ਼ਟਰ ਵਿੱਚ ਛੇ ਮੌਤਾਂ ਹੋਈਆਂ ਹਨ, ਜਿਨ੍ਹਾਂ ਵਿੱਚੋਂ ਚਾਰ ਮੌਤਾਂ ਇਕੱਲੇ ਮੁੰਬਈ ਵਿੱਚ ਹੋਈਆਂ ਹਨ। ਤਾਮਿਲ ਨਾਡੂ ਵਿੱਚ ਦੋ ਅਤੇ ਕਰਨਾਟਕ, ਗੁਜਰਾਤ ਤੇ ਰਾਜਸਥਾਨ ਵਿੱਚ ਇਕ-ਇਕ ਮੌਤ ਕੋਰੋਨਾ ਕਾਰਨ ਹੋਈ ਹੈ। ਇਸ ਦੌਰਾਨ ਮਹਾਰਾਸ਼ਟਰ ਵਿੱਚ 145 ਨਵੇਂ ਕੇਸ ਮਿਲੇ ਹਨ। ਇਨ੍ਹਾਂ ਵਿਚੋਂ ਇਕੱਲੇ ਮੁੰਬਈ ਵਿੱਚ 52 ਕੇਸ ਹਨ। ਇਸ ਰਾਜ ਵਿੱਚ ਕੋਰੋਨਾ ਤੋਂ ਪ੍ਰਭਾਵਤ ਲੋਕਾਂ ਦੀ ਗਿਣਤੀ 635 ਹੋ ਗਈ ਹੈ। ਤਾਮਿਲ ਨਾਡੂ ਤੋਂ ਅੱਜ ਸ਼ਾਮ ਤੱਕ 74 ਨਵੇਂ ਕੇਸ ਲੱਭੇ ਹਨ, ਜਿਨ੍ਹਾਂ ਵਿਚੋਂ 73 ਲੋਕ ਦਿੱਲੀ ਵਿੱਚ ਤਬਲੀਗੀ ਜਮਾਤ ਦੇ ਪ੍ਰੋਗਰਾਮ ਵਿੱਚ ਹੋ ਕੇ ਮੁੜੇ ਸਨ। ਇਨ੍ਹਾਂ ਨਾਲ ਇਸ ਰਾਜ ਵਿੱਚ ਕੇਸਾਂ ਦੀ ਗਿਣਤੀ 485 ਹੋ ਗਈ ਹੈ। ਕੇਰਲ ਵਿੱਚ ਮਿਲੇ 11 ਨਵੇਂ ਕੇਸਾਂ ਵਿੱਚੋਂ ਤਿੰਨ ਜਣੇ ਤਬਲੀਗ ਵਾਲੇ ਹਨ। ਇਸ ਨਾਲ ਰਾਜ ਵਿੱਚ ਕੁਲ 306 ਕੇਸ ਹੋ ਗਏ ਤੇ ਦੋ ਦੀ ਮੌਤ ਹੋ ਚੁੱਕੀ ਹੈ। ਕਰਨਾਟਕ ਵਿੱਚ 16 ਨਵੇਂ ਪੌਜ਼ਿਟਿਵ ਕੇਸ ਮਿਲਣ ਨਾਲ ਕੁੱਲ ਗਿਣਤੀ 144 ਹੋ ਗਈ ਹੈ। ਆਂਧਰਾ ਪ੍ਰਦੇਸ਼ ਵਿੱਚ 26 ਨਵੇਂ ਕੇਸ ਪਤਾ ਲੱਗੇ ਹਨ ਤੇ ਸਾਰੇ ਲੋਕ ਤਬਲੀਗੀ ਹਨ। ਇਨ੍ਹਾਂ ਵਿੱਚ ਸੱਤ ਔਰਤਾਂ ਵੀ ਹਨ। ਇਸ ਰਾਜ ਵਿੱਚ ਕੇਸਾਂ ਦੀ ਗਿਣਤੀ 190 ਹੋ ਗਈ ਹੈ। ਗੁਜਰਾਤ ਵਿੱਚ 13 ਨਵੇਂ ਕੇਸਾਂ ਨਾਲ ਪ੍ਰਭਾਵਤ ਲੋਕਾਂ ਦੀ ਗਿਣਤੀ 108 ਹੋ ਗਈ ਹੈ ਤੇ ਉੱਤਰ ਪ੍ਰਦੇਸ਼ ਵਿੱਚ 52 ਨਵੇਂ ਕੇਸ ਮਿਲੇ ਹਨ, ਜਿਨ੍ਹਾਂ ਵਿਚੋਂ 40 ਤਬਲੀਗ ਵਾਲੇ ਹਨ। ਏਥੇ ਕੁਲ ਕੇਸ 234 ਹੋ ਗਏ ਹਨ। ਬੰਗਾਲ ਵਿੱਚ 11 ਨਵੇਂ ਕੇਸਾਂ ਵਿੱਚੋਂ ਇਕ ਤਬਲੀਗੀ ਹੈ ਤੇ ਕੁਲ ਗਿਣਤੀ 49 ਹੋ ਗਈ ਹੈ। ਜੰਮੂ-ਕਸ਼ਮੀਰ ਵਿੱਚ ਛੇ ਤਬਲੀਗੀ ਲੋਕਾਂ ਦੇ ਨਾਲ 17 ਲੋਕਾਂ ਦੀ ਰਿਪੋਰਟ ਪੌਜ਼ਿਟਿਵ ਮਿਲਣ ਨਾਲ ਪ੍ਰਭਾਵਤ ਲੋਕਾਂ ਦਾ ਅੰਕੜਾ 92 ਹੋ ਗਿਆ ਹੈ। ਦਿੱਲੀ ਤੋਂ 59 ਨਵੇਂ ਕੇਸ ਮਿਲੇ ਹਨ, ਜਿਨ੍ਹਾਂ ਵਿਚੋਂ 42 ਤਬਲੀਗ ਵਾਲੇ ਹਨ ਅਤੇ ਕੁਲ ਗਿਣਤੀ 445 ਹੋ ਗਈ ਹੈ। ਰਾਜਸਥਾਨ ਵਿੱਚ 22 ਨਵੇਂ ਕੇਸ ਮਿਲੇ ਹਨ, ਜਿਨ੍ਹਾਂ ਵਿਚੋਂ 10 ਤਬਲੀਗ ਵਾਲੇ ਦੱਸੇ ਗਏ ਅਤੇ ਕੁਲ ਕੇਸ 200 ਹੋ ਗਏ ਹਨ। ਛੇ ਨਵੇਂ ਕੇਸਾਂ ਦੇ ਨਾਲ ਮੱਧ ਪ੍ਰਦੇਸ਼ ਵਿੱਚ ਗਿਣਤੀ 178 ਹੋ ਗਈ ਹੈ। ਛੱਤੀਸਗੜ੍ਹ ਵਿੱਚ ਮਿਲਿਆ ਨਵਾਂ ਕੇਸ ਵੀ ਤਬਲੀਗ ਦਾ ਹੈ। ਹਰਿਆਣਾ ਵਿੱਚ 12 ਨਵੇਂ ਕੇਸਾਂ ਨਾਲ ਕੁੱਲ ਗਿਣਤੀ 70 ਹੋ ਗਈ ਹੈ। ਉੱਤਰਾਖੰਡ ਵਿੱਚ ਛੇ ਨਵੇਂ ਕੇਸ ਮਿਲੇ ਅਤੇ ਸਾਰੇ ਤਬਲੀਗੀ ਹਨ ਤੇ ਏਥੇ ਕੁੱਲ ਕੇਸ 22 ਹੋ ਗਏ ਹਨ। ਪੂਰਬ ਉੱਤਰ ਵਿੱਚ ਪੰਜ ਨਵੇਂ ਕੇਸਾਂ ਨਾਲ ਕੁੱਲ ਗਿਣਤੀ 29 ਹੋ ਗਈ ਹੈ।