ਰੋਮ, 5 ਅਪਰੈਲ, (ਪੋਸਟ ਬਿਊਰੋ)- ਕੋਰੋਨਾ ਵਾਇਰਸ ਦੀ ਮਾਰ ਹੇਠ ਬੁਰੀ ਤਰ੍ਹਾਂ ਆਏ ਹੋਏ ਇਟਲੀ ਤੋਂ ਪਿੱਛੋਂ ਇਸ ਦੀ ਮਾਰ ਦਾ ਅਗਲਾ ਕੇਂਦਰ ਅਮਰੀਕਾ ਦੇ ਨਿਊਯਾਰਕ ਰਾਜ ਨੂੰ ਮੰਨਿਆ ਜਾਂਦਾ ਹੈ, ਜਿਥੇ ਵੱਡੀ ਗਿਣਤੀ ਵਿਚ ਮੌਤਾਂ ਹੋਈਆਂ ਹਨ। ਭਾਰਤ ਵਿੱਚ ਐਤਵਾਰ ਦੀ ਸਵੇਰ ਹੋਣ ਤੱਕ ਇਟਲੀ ਵਿਚ ਮੌਤਾਂ ਦੀ ਗਿਣਤੀ 15,362 ਹੋ ਗਈ ਅਤੇ ਇਨ੍ਹਾਂ ਵਿੱਚ 681 ਲੋਕਾਂ ਦੀ ਮੌਤ ਬੀਤੇ 24 ਘੰਟਿਆਂ ਵਿੱਚ ਹੋਈ ਹੈ। ਇਸ ਦੌਰਾਨ ਕੁੱਲ 4805 ਨਵੇਂ ਪਾਜ਼ੇਟਿਵ ਕੇਸ ਲੱਭਣ ਨਾਲ ਅਮਰੀਕਾ ਵਿੱਚ ਪਾਜ਼ੇਟਿਵ ਕੇਸ 124,632 ਹੋ ਗਏ ਹਨ। ਇਟਲੀ ਵਿਚ ਕੋਰੋਨਾ ਨਾਲ ਲੜ ਰਹੇ 60 ਤੋਂ ਡਾਕਟਰ ਵੀ ਇਸ ਬਿਮਾਰੀ ਕਾਰਨ ਜਾਨ ਗੁਆ ਚੁੱਕੇ ਹਨ। ਇਸ ਦੇਸ਼ ਦੇ ਮਸ਼ਹੂਰ ਬੂਟਾਂ ਦੇ ਡਿਜ਼ਾਈਨਰ ਸਰਗੀਓ ਰੋਜ਼ੀ ਦੀ 84 ਸਾਲ ਦੀ ਉਮਰ ਵਿਚ ਕੋਰੋਨਾ ਵਾਇਰਸ ਦੇ ਕਾਰਨ ਮੌਤ ਹੋ ਗਈ ਹੈ।
ਅਮਰੀਕਾ ਵਿਚ ਕੋਰੋਨਾ ਦੇ ਕਾਰਨ ਹਾਲਾਤ ਹੱਦੋਂ ਵੱਧ ਖਰਾਬ ਹੁੰਦੇ ਜਾ ਰਹੇ ਹਨ। ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਇਸ ਨੂੰ ਆਪਣੇ ਦੇਸ਼ ਲਈ ਜੰਗ ਵਰਗੇ ਹਾਲਾਤ ਮੰਨਿਆ ਹੈ। ਸਥਿਤੀ ਦੇ ਟਾਕਰੇ ਲਈ ਅਮਰੀਕੀ ਫ਼ੌਜ ਨੂੰ ਵੀ ਸਰਗਰਮ ਕੀਤਾ ਜਾ ਰਿਹਾ ਹੈ। ਟਰੰਪ ਨੇ ਅਮਰੀਕੀਆਂ ਨੂੰ ਮਾਸਕ ਪਾਉਣ ਦੀ ਸਲਾਹ ਦਿੱਤੀ, ਪ੍ਰੰਤੂ ਖ਼ੁਦ ਇਸ ਨੂੰ ਪਾਉਣ ਤੋਂ ਪਰਹੇਜ਼ ਕੀਤਾ ਹੈ। ਭਾਰਤ ਵਿੱਚ ਐਤਵਾਰ ਦੀ ਸਵੇਰ ਤੱਕ ਅਮਰੀਕਾ ਵਿੱਚ ਕੋਰੋਨਾ ਦੇ ਕੇਸਾਂ ਦੀ ਗਿਣਤੀ 3,09,728 ਹੋ ਚੁੱਕੀ ਹੈ ਅਤੇ ਮਰਨ ਵਾਲਿਆਂ ਦੀ ਗਿਣਤੀ ਵੀ 8441 ਹੋ ਗਈ ਹੈ।
ਭਾਰਤ ਵਿੱਚ ਐਤਵਾਰ ਦੀ ਸਵੇਰ ਹੋਣ ਤੱਕ ਸਪੇਨ ਵਿੱਚ ਮੌਤਾਂ ਦੀ ਗਿਣਤੀ 11,947, ਫਰਾਂਸ ਵਿੱਚ 7,560, ਬ੍ਰਿਟੇਨ ਵਿੱਚ 4,313, ਇਰਾਨ ਵਿੱਚ 3,452, ਨੀਦਰਲੈਂਡ ਵਿੱਚ 1,651, ਜਰਮਨੀ ਵਿੱਚ 1,444 ਤੇ ਬੈਲਜੀਅਮ ਵਿੱਚ 1283 ਹੋ ਚੁੱਕੀ ਹੈ। ਪਾਕਿਸਤਾਨ ਵਿੱਚ ਕੋਰੋਨਾ ਦੇ ਵਾਇਰਸ ਤੋਂ ਪ੍ਰਭਾਵਤ ਲੋਕਾਂ ਦੀ ਗਿਣਤੀ ਤੇਜ਼ੀ ਨਾਲ ਵਧੀ ਅਤੇ ਇਹ ਅੰਕੜਾ 2818 ਤੱਕ ਚਲਾ ਗਿਆ। ਸਭ ਤੋਂ ਵੱਧ ਕੇਸ ਪਾਕਿਸਤਾਨ ਦੇ ਪੰਜਾਬ ਸੂਬੇ ਦੇ ਹਨ। ਪੰਜਾਬ ਵਿੱਚ 1072, ਸਿੰਧ ਵਿੱਚ 839, ਖੈਬਰ ਪਖਤੂਨਖਵਾ 343, ਬਲੋਚਿਸਤਾਨ 175, ਗਿਲਗਿਤ-ਬਾਟਿਸਤਾਨ ਵਿੱਚ 193, ਇਸਲਾਮਾਬਾਦ ਵਿੱਚ 75 ਅਤੇ ਪਾਕਿ ਦੇ ਕਬਜ਼ੇ ਵਾਲੇ ਕਸ਼ਮੀਰ ਵਿੱਚ 11 ਹੋ ਗਈ ਹੈ।