ਨਿਊਯਾਰਕ, 4 ਅਪ੍ਰੈਲ (ਪੋਸਟ ਬਿਊਰੋ)- ਦੁਨੀਆ ਦੀ ਮਹਾਸ਼ਕਤੀ ਅਮਰੀਕਾ ਕੋਰੋਨਾ ਵਾਇਰਸ ਅੱਗੇ ਬੇਵੱਸ ਵਿਖਾਈ ਦੇ ਰਿਹਾ ਹੈ। ਕੁਝ ਹਫ਼ਤੇ ਪਹਿਲਾਂ ਤੱਕ ਕੋਰੋਨਾ ਦਾ ਮਜ਼ਾਕ ਉਡਾਉਣ ਵਾਲੇ ਟਰੰਪ ਵੀ ਇਸ ਤੋਂ ਨਹੀਂ ਬਚ ਸਕੇ। ਉਨ੍ਹਾਂ ਦੀ ਪਰਵਾਰਕ ਕੰਪਨੀ ਟਰੰਪ ਆਰਗੇਨਾਈਜ਼ੇਸ਼ਨ ਨੇ ਡਿਊਸ਼ ਬੈਂਕ ਵਰਗੇ ਕਰਜ਼ਦਾਤਿਆਂ ਨੂੰ ਕਿਹਾ ਹੈ ਕਿ ਕੀ ਉਹ ਕੋਰੋਨਾ ਵਾਇਰਸ ਮਹਾਮਾਰੀ ਨਾਲ ਆਰਥਿਕ ਨੁਕਸਾਨ ਕਾਰਨ ਕਰਜ਼ਾ ਅਦਾਇਗੀ 'ਚ ਦੇਰੀ ਕਰ ਸਕਦੀ ਹੈ?
ਅਸਲ ਵਿੱਚ ਟਰੰਪ ਵੱਲੋਂ ਬਣਾਈਆਂ ਕੰਪਨੀਆਂ ਦੇ ਟਰੰਪ ਆਰਗੇਨਾਈਜ਼ੇਸ਼ਨ, ਜਿਸ ਦਾ ਸੰਚਾਲਨ ਉਨ੍ਹਾਂ ਦੇ ਬੇਟੇ ਕਰਦੇ ਹਨ, ਨੂੰ ਕੋਰੋਨਾ ਵਾਇਰਸ ਮਹਾਮਾਰੀ ਕਾਰਨ ਲੱਗੀਆਂ ਪਾਬੰਦੀਆਂ ਨਾਲ ਦੂਜੀਆਂ ਕੰਪਨੀਆਂ ਵਾਂਗ ਘਾਟਾ ਝੱਲਣਾ ਪੈ ਰਿਹਾ ਹੈ। ਨਿਊਯਾਰਕ ਟਾਈਮਸ ਦੀ ਰਿਪੋਰਟ ਹੈ ਕਿ ਟਰੰਪ ਆਰਗੇਨਾਈਜ਼ੇਸ਼ਨ ਨੇ ਮਾਰਚ ਅੰਤ 'ਚ ਡਿਊਸ਼ ਬੈਂਕ ਨਾਲ ਸੰਪਰਕ ਕੀਤਾ ਅਤੇ ਕਰਜ਼ਾ ਅਦਾਇਗੀ ਦੀ ਸਮਾਂ-ਹੱਦ ਵਧਾਉਣ ਬਾਰੇ ਪੁੱਛਿਆ। ਆਰਗੇਨਾਈਜ਼ੇਸ਼ਨ ਦੇ ਕਾਰਜਕਾਰੀ ਵਾਈਸ ਚੇਅਰਮੈਨ ਤੇ ਟਰੰਪ ਦੇ ਬੇਟੇ ਏਰਿਕ ਨੇ ਦੱਸਿਆ ਕਿ ਇਨ੍ਹੀ ਦਿਨੀਂ ਹਰ ਕੋਈ ਇੱਕ-ਦੂਜੇ ਦੀ ਮਦਦ ਕਰ ਰਿਹਾ ਹੈ। ਸੂਤਰਾਂ ਅਨੁਸਾਰ ਡਿਊਸ਼ ਬੈਂਕ ਦਾ ਟਰੰਪ ਆਰਗੇਨਾਈਜ਼ੇਸ਼ਨ 'ਤੇ ਕਈ ਸੌ ਕਰੋੜ ਡਾਲਰ ਬਕਾਇਆ ਹੈ। ਗਰੁੱਪ ਨੇ ਟਰੰਪ ਇੰਟਰਨੈਸ਼ਨਲ ਗੋਲਫ ਕਲੱਬ ਅਤੇ ਕੁਝ ਹੋਰ ਜਾਇਦਾਦਾਂ ਦੇ ਕਿਰਾਏ ਨੂੰ ਟਾਲਣ ਦੀ ਵੀ ਅਪੀਲ ਕੀਤੀ ਹੈ।