ਕਰਾਚੀ, 4 ਅਪ੍ਰੈਲ (ਪੋਸਟ ਬਿਊਰੋ)- ਪਾਕਿਸਤਾਨ ਦੇ ਸਿੰਧ ਸੂਬੇ ਦੀ ਸਰਕਾਰ ਨੇ ਸਾਲ 2002 ਵਿੱਚ ਅਮਰੀਕਾ ਦੇ ਪੱਤਰਕਾਰ ਡੈਨੀਅਲ ਪਰਲ ਦੇ ਕਤਲ ਕੇਸ ਵਿੱਚ ਕੱਲ੍ਹ ਹਾਈ ਕੋਰਟ ਵੱਲੋਂ ਇੱਕ ਬ੍ਰਿਟਿਸ਼ ਦਹਿਸ਼ਤਗਰਦ ਸਮੇਤ ਚਾਰ ਦੋਸ਼ੀ ਛੱਡਣ ਦੇ ਫੈਸਲੇ ਦੇ ਉਲਟ ਇਨ੍ਹਾਂ ਨੂੰ ਅਗਲੇ ਤਿੰਨ ਮਹੀਨੇ ਹਿਰਾਸਤ ਵਿੱਚ ਰੱਖਣ ਦਾ ਫੈਸਲਾ ਕੀਤਾ ਹੈ।
ਹਾਈ ਕੋਰਟ ਨੇ ਕੱਲ੍ਹ ਨੂੰ ਬ੍ਰਾਈਟਨ ਅਹਿਮਦ ਉਮਰ ਸਈਦ ਸਮੇਤ ਚਾਰ ਜਾਣਿਆਂ, ਜਿਨ੍ਹਾਂ ਨੂੰ ਪਰਲ ਦੀ ਹੱਤਿਆ ਦੇ ਦੋਸ਼ 'ਚ ਮੌਤ ਦੀ ਸਜ਼ਾ ਸੁਣਾਈ ਗਈ ਸੀ, ਨੂੰ ਛੱਡਣ ਦੇ ਹੁਕਮ ਕੀਤੇ ਸਨ। ਇਸ ਕੇਸ ਵਿੱਚ ਤਿੰਨ ਹੋਰਨਾਂ ਦੀ ਮੌਤ ਦੀ ਸਜ਼ਾ ਨੂੰ ਸੱਤ ਸਾਲ ਦੀ ਕੈਦ ਵਿੱਚ ਬਦਲ ਦਿੱਤਾ ਗਿਆ ਸੀ।
ਵਾਲ ਸਟਰੀਟ ਜਰਨਲ ਦਾ ਰਿਪੋਰਟਰ ਡੇਨੀਅਲ ਪਰਲ (38) ਅਮਰੀਕਾ ਵਿੱਚ ਹੋਏ 9/11 ਦੇ ਹਮਲੇ ਬਾਰੇ ਜਦੋਂ ਕਰਾਚੀ ਵਿੱਚ ਇਸਲਾਮਿਕ ਦਹਿਸ਼ਤਗਰਦਾਂ ਬਾਰੇ ਇੱਕ ਖੋਜੀ ਰਿਪੋਰਟ 'ਤੇ ਕੰਮ ਕਰ ਰਿਹਾ ਸੀ, ਓਦੋਂ ਜਨਵਰੀ 2002 ਵਿੱਚ ਅਗਵਾ ਕਰਨ ਮਗਰੋਂ ਉਹਦਾ ਸਿਰ ਕਲਮ ਕਰ ਦਿੱਤਾ ਗਿਆ ਸੀ। ਫਾਂਸੀ ਦੀ ਸਜ਼ਾ ਰੱਦ ਕਰਨ ਦੇ ਬਾਅਦ ਕੋਰਟ ਨੇ ਜਦੋਂ ਕੱਟੀ ਗਈ ਸਜ਼ਾ ਨੂੰ ਭੁਗਤੀ ਗਈ ਮੰਨ ਕੇ ਦੋਸ਼ੀਆਂ ਨੂੰ ਛੱਡਣ ਦਾ ਫੈਸਲਾ ਕੀਤਾਂ ਤਾਂ ਸਿੰਧ ਦੇ ਗ੍ਰਹਿ ਵਿਭਾਗ ਨੇ ਉਪਰੋਕਤ ਚਾਰਾਂ ਨੂੰ ਜੇਲ੍ਹ ਤੋਂ ਛੱਡੇ ਜਾਣ ਤੋਂ ਐਨ ਕੱਲ੍ਹ ਫਿਰ ਗ਼੍ਰਿਫ਼ਤਾਰ ਕਰਨ ਦੇ ਹੁਕਮ ਦੇ ਦਿੱਤੇ। ਵਿਭਾਗ ਦੇ ਇੱਕ ਸੀਨੀਅਰ ਅਧਿਕਾਰੀ ਨੇ ਹੁਕਮਾਂ 'ਚ ਕਿਹਾ, ‘ਸਿੰਧ ਸਰਕਾਰ ਕੋਲ ਅਹਿਮਦ ਉਮਰ ਸ਼ੇਖ਼ ਤੇ ਫਾਹਦ ਨਸੀਮ ਅਹਿਮਦ, ਸੱਯਦ ਸਲਮਾਨ ਸਾਕਿਬ ਤੇ ਸ਼ੇਖ ਮੁਹੰਮਦ ਆਦਿਲ ਨੂੰ ਗ਼੍ਰਿਫ਼ਤਾਰ ਕਰਨ ਤੇ ਅਗਲੇ ਤਿੰਨ ਮੀਨਿਆਂ ਲਈ ਹਿਰਾਸਤ ਵਿੱਚ ਰੱਖਣ ਲਈ ਢੁੱਕਵੇਂ ਕਾਰਨ ਹਨ। ਅਧਿਕਾਰੀ ਨੇ ਕਿਹਾ ਕਿ ਇਨ੍ਹਾਂ ਦੀ ਰਿਹਾਈ ‘ਦੇਸ਼ ਹਿੱਤਾਂ ਦੁ ਖ਼ਿਲਾਫ਼ ਜਾ ਸਕਦੀ ਹੈ।' ਦੱਖਣੀ ਏਸ਼ੀਆ ਲਈ ਅਮਰੀਕਾ ਦੇ ਸਿਖਰਲੇ ਦੂਤ ਨੇ ਸਿੰਧ ਹਾਈ ਕੋਰਟ ਦੇ ਇਸ ਫੈਸਲੇ 'ਤੇ ਦਿੱਤੇ ਪ੍ਰਤੀਕਰਮ ਵਿੱਚ ਕਿਹਾ ਸੀ ਕਿ ਚਾਰਾਂ ਨੂੰ ਛੱਡਣ ਦਾ ਫੈਸਲਾ ‘ਦਸ਼ਿਤਗਰਦੀ ਦੇ ਝੰਬੇ ਪੀੜਤਾਂ ਦਾ ਨਿਰਾਦਰ ਹੋਵੇਗਾ।'