ਲੁਧਿਆਣਾ, 4 ਅਪ੍ਰੈਲ (ਪੋਸਟ ਬਿਊਰੋ)- ਇਸ ਮਹਾਨਗਰ ਦੇ ਥਾਣਾ ਸਦਰ ਦੇ ਘੇਰੇ ਹੇਠਲੇ ਇਲਾਕੇ ਵਿੱਚ ਪਿੰਡ ਚੁਪਕੀ ਵਿੱਚ ਕੱਲ੍ਹ ਰਾਤ ਕੁਝ ਅਣਪਛਾਤੇ ਨੇ ਸ਼ਰਾਬ ਦੇ ਠੇਕੇ ਦੇ ਕਰਿੰਦੇ ਦਾ ਕਤਲ ਕਰ ਦਿੱਤਾ ਹੈ।
ਮਿਲੀ ਜਾਣਕਾਰੀ ਅਨੁਸਾਰ ਮ੍ਰਿਤਕ ਦੀ ਪਛਾਣ ਰੁਮੇਲ ਚੰਦ ਵੱਜੋਂ ਹੋਈ ਹੈ। ਉਸਦੀ ਉਮਰ 51 ਸਾਲ ਦੇ ਕਰੀਬ ਸੀ। ਰੁਮੇਲ ਚੰਦ ਪਿੰਡ ਚੁਪਕੀ ਜੱਸੋਵਾਲ ਸੜਕ ਨੇੜੇ ਮਾਨਕ ਰੇਖੀ ਦੇ ਸ਼ਰਾਬ ਦੇ ਠੇਕੇ 'ਤੇ ਕਾਰਿੰਦੇ ਵਜੋਂ ਕੰਮ ਕਰਦਾ ਸੀ। ਪੁਲਸ ਅਨੁਸਾਰ ਮ੍ਰਿਤਕ ਰਾਤ 8.15 ਵਜੇ ਦੇ ਕਰੀਬ ਪਿੰਡ ਚੁਪਕੀ ਵਿੱਚ ਆਪਣੇ ਸਾਥੀ ਦੇ ਘਰ ਖਾਣਾ ਖਾ ਕੇ ਆਇਆ ਸੀ। ਦੇਰ ਰਾਤ ਜਦੋਂ ਠੇਕੇ ਦਾ ਇੰਚਾਰਜ ਪ੍ਰਣਾਮ ਤੇ ਉਸ ਦੇ ਸਾਥੀ ਚੈਕਿੰਗ ਕਰਨ ਲਈ ਆਏ ਤਾਂ ਰੁਮੇਲ ਚੰਦ ਦੇ ਕਮਰੇ ਵਿੱਚ ਗਏ, ਪਰ ਓਥੇ ਬਾਹਰੋਂ ਜਿੰਦਾ ਲੱਗਾ ਹੋਇਆ ਸੀ। ਜਦੋਂ ਉਹ ਜਿੰਦਾ ਤੋੜ ਕੇ ਅੰਦਰ ਗਏ ਤਾਂ ਉਥੇ ਰੁਮੇਲ ਚੰਦ ਦੀ ਲਾਸ਼ ਖੂਨ ਨਾਲ ਲੱਥ ਪੱਥ ਜ਼ਮੀਨ 'ਤੇ ਪਈ ਸੀ। ਉਸ ਦੇ ਸਿਰ, ਮੱਥੇ ਅਤੇ ਅੱਖਾਂ 'ਤੇ ਤੇਜ਼ਧਾਰ ਹਥਿਆਰਾਂ ਨਾਲ ਜ਼ਖ਼ਮਾਂ ਦੇ ਕਈ ਨਿਸ਼ਾਨ ਸਨ। ਸੂਚਨਾ ਮਿਲਦੇ ਸਾਰ ਥਾਣਾ ਸਦਰ ਦੇ ਐਸ ਐਚ ਓ ਜਗਦੇਵ ਸਿੰਘ ਮੌਕੇ 'ਤੇ ਪਹੁੰਚੇ।