ਧਰਮਕੋਟ, 4 ਅਪ੍ਰੈਲ (ਪੋਸਟ ਬਿਊਰੋ)- ਇਸ ਸ਼ਹਿਰ ਵਿੱਚ ਰਹਿੰਦੇ ਮਰਦਾਨੇ ਦੇ ਪਰਵਾਰ ਦੀ ਧੀ ਜੋਤੀ ਪਤਨੀ ਰਮੇਸ਼ ਦੀ ਡਿਲੀਵਰੀ ਹੋਣੀ ਸੀ। ਕੱਲ੍ਹ ਰਾਤ 11.30 ਵਜੇ ਦੇ ਕਰੀਬ ਸ਼ਹਿਰ ਦੇ ਪ੍ਰਾਈਵੇਟ ਹਸਪਤਾਲਾਂ ਅਤੇ ਸਥਾਨਕ ਸਰਕਾਰੀ ਹਸਪਤਾਲ ਵੀ ਗਏ, ਪਰ ਸਭ ਥਾਂਈਂ ਕੁੰਡੇ ਲੱਗੇ ਹੋਏ ਸਨ ਅਤੇ ਕੋਈ ਵੀ ਡਾਕਟਰ ਨਹੀਂ ਮਿਲਿਆ, ਜਿਸ ਕਾਰਨ ਬਹੁਤ ਮੁਸ਼ਕਲ ਵਿੱਚ ਉਸ ਦੀ ਡਿਲੀਵਰੀ ਲੋਹਗੜ੍ਹ ਚੌਂਕ ਵਿੱਚ ਸੜਕ ਉਤੇ ਫ਼ੱਟੇ ਉਪਰ ਕੀਤੀ ਗਈ।
ਬਿੱਕਰ ਸਿੰਘ ਏ ਐਸ ਆਈ ਅਤੇ ਉਸ ਦੇ ਸਾਥੀ ਹਵਾਲਦਾਰ ਨੇ ਉਸ ਔਰਤ ਦੀ ਡਿਲੀਵਰੀ ਵਿੱਚ ਮਦਦ ਕੀਤੀ ਅਤੇ ਔਰਤਾਂ ਨੂੰ ਓਥੇ ਲਿਆ ਕੇ ਰਾਤ 1.30 ਵਜੇ ਡਿਲੀਵਰੀ ਕਰਵਾਈ। ਇਸ ਪਿੱਛੋਂ ਉਨ੍ਹਾਂ ਨੇ ਆਪਣੀ ਗੱਡੀ ਵਿੱਚ ਔਰਤ ਨੂੰ ਬਿਠਾ ਕੇ ਉਸ ਨੂੰ ਘਰ ਪੁਚਾਇਆ। ਸਮੁੱਚੇ ਸ਼ਹਿਰ ਅਤੇ ਇਲਾਕੇ ਵਿੱਚ ਪੁਲਸ ਵਾਲਿਆਂਦੇ ਰੋਲ ਦੀ ਸ਼ਲਾਘਾ ਕੀਤੀ ਜਾ ਰਹੀ ਹੈ। ਦੂਜੇ ਪਾਸੇ ਇਹ ਚਰਚਾ ਹੈ ਕਿ ਸਮੁੱਚਾ ਦੇਸ਼ ਕੋਰੋਨਾ ਵਾਇਰਸ ਵਰਗੀ ਬਿਮਾਰੀ ਬਾਰੇ ਸੰਕਟ ਦੀ ਘੜੀ ਵਿੱਚ ਹੈ ਤਾਂ ਅਜਿਹੇ ਸਮੇਂ ਡਾਕਟਰੀ ਸਹਾਇਤਾ ਨਾ ਮਿਲਣਾ ਚਿੰਤਾ ਦਾ ਵਿਸ਼ਾ ਹੈ।