ਜਲੰਧਰ, 3 ਅਪਰੈਲ, (ਪੋਸਟ ਬਿਊਰੋ)- ਪੰਜਾਬ ਵਿੱਚ ਕੋਰੋਨਾ ਪਾਜਿ਼ਟਿਵ ਦੇ ਕੇਸਾਂ ਦੀ ਗਿਣਤੀ 58 ਤਕ ਚਲੀ ਗਈ ਹੈ ਅਤੇ ਇਸ ਦੌਰਾਨ ਸ਼ੁੱਕਰਵਾਰ ਨੂੰ 10 ਹੋਰ ਕੇਸ ਸਾਹਮਣੇ ਆਏ ਹਨ।
ਅੱਜ ਮੋਹਾਲੀ ਵਿੱਚ ਪਤਾ ਲੱਗੇ ਦੋਵੇਂ ਨਵੇਂ ਕੇਸ ਦਿੱਲੀ ਦੇ ਨਿਜ਼ਾਮੁੱਦੀਨ ਵਿੱਚ ਤਬਲੀਗੀ ਜਮਾਤ ਦੇ ਪ੍ਰੋਗਰਾਮ ਤੋਂ ਮੁੜੇ ਲੋਕ ਹਨ। ਅੱਜ ਪੰਜਾਬ ਵਿੱਚ ਪੰਜ ਹੋਰ ਕੇਸਾਂ ਦੀ ਪੁਸ਼ਟੀ ਹੋਈ ਹੈ, ਜਿਨ੍ਹਾਂ ਵਿੱਚ ਤਿੰਨ ਕੇਸ ਮਾਨਸਾ, ਇਕ ਰੋਪੜ ਤੇ ਇਕ ਅੰਮ੍ਰਿਤਸਰ ਵਿੱਚ ਪਤਾ ਲੱਗਾ ਹੈ। ਮਾਨਸਾ ਦੇ ਤਿੰਨੇ ਪਾਜਿ਼ਟਿਵ ਕੇਸ ਦਿੱਲੀ ਤੋਂ ਆਏ ਤਬਲੀਗੀ ਮਰਕਜ਼ ਵਾਲੇ ਲੋਕ ਹਨ। ਇਸ ਦੌਰਾਨ ਸ੍ਰੀ ਹਰਿਮੰਦਰ ਸਾਹਿਬ ਦੇ ਸਾਬਕਾ ਹਜ਼ੂਰੀ ਰਾਗੀ ਪਦਮਸ਼੍ਰੀ ਨਿਰਮਲ ਸਿੰਘ ਦੀ ਚਾਚੀ ਤੇ ਇਕ ਰਾਗੀ ਵੀ ਕੋਰੋਨਾ ਤੋਂ ਪ੍ਰਭਾਵਤ ਨਿਕਲੇ ਹਨ। ਰਾਗੀ ਨਿਰਮਲ ਸਿੰਘ ਦੀ ਇੱਕ ਦਿਨ ਪਹਿਲਾਂ ਕੋਰੋਨਾ ਦੇ ਕਾਰਨ ਹੀ ਮੌਤ ਹੋ ਗਈ ਸੀ। ਉਨ੍ਹਾਂ ਦੇ ਪਰਿਵਾਰਕ ਮੈਂਬਰਾਂ ਅਤੇ ਸੰਪਰਕ ਵਾਲੇ 9 ਲੋਕਾਂ ਨੂੰ ਆਈਸੋਲੇਟ ਕੀਤਾ ਗਿਆ ਅਤੇ 31 ਹੋਰ ਲੋਕਾਂ ਨੂੰ ਵੀ ਕੁਆਰੰਟਾਈਨ ਕੀਤਾ ਗਿਆ ਹੈ, ਜਿਨ੍ਹਾਂ ਵਿੱਚ ਗੁਰੂ ਨਾਨਕ ਦੇਵ ਹਸਪਤਾਲ ਦੇ ਸੱਤ ਡਾਕਟਰ ਤੇ ਗੁਰੂ ਰਾਮਦਾਸ ਮੈਡੀਕਲ ਕਾਲਜ ਦੇ 9 ਸਿਹਤ ਮੁਲਾਜ਼ਮ ਵੀ ਸ਼ਾਮਲ ਦੱਸੇ ਗਏ ਹਨ।
ਇਸ ਦੌਰਾਨ ਨਵਾਂਸ਼ਹਿਰ ਜਿ਼ਲੇ ਵਿੱਚ 19 ਕੇਸ ਅਤੇ 1 ਮੌਤ, ਜਿ਼ਲਾ ਮੋਹਾਲੀ ਵਿੱਚ 12 ਕੇਸ ਅਤੇ 1 ਮੌਤ ਦੇ ਨਾਲ ਜਿ਼ਲਾ ਹੁਸ਼ਿਆਰਪੁਰ ਵਿੱਚ 7 ਕੇਸ ਅਤੇ 1 ਮੌਤ ਹੋਣ ਤੋਂ ਇਲਾਵਾ ਜਿ਼ਲਾ ਜਲੰਧਰ ਵਿੱਚ 5 ਕੇਸ, ਅੰਮ੍ਰਿਤਸਰ ਦੇ 6 ਕੇਸ, ਮਾਨਸਾ ਵਿੱਚ 3, ਲੁਧਿਆਣਾ ਵਿੱਚ 4 ਕੇਸ ਹੋਣ ਦੇ ਨਾਲ 1 ਮੌਤ ਵੀ ਹੋ ਚੁੱਕੀ ਹੈ।
ਸਾਰੇ ਭਾਰਤ ਵਿੱਚ ਮੌਤਾਂ ਦੀ ਗਿਣਤੀ 73 ਅਤੇ ਕੇਸਾਂ ਦੀ ਗਿਣਤੀ 2567 ਦੱਸੀ ਗਈ ਹੈ। ਦਿੱਲੀ ਦੇ ਤਬਲੀਗੀ ਮਰਕਜ਼ ਵਾਲੇ ਲੋਕਾਂ ਦੇ ਕਾਰਨ ਇਹ ਅੰਕੜਾ ਇੱਕ ਦਮ ਵਧਿਆ ਹੈ।