ਨਵੀਂ ਦਿੱਲੀ, 3 ਅਪ੍ਰੈਲ (ਪੋਸਟ ਬਿਊਰੋ)- ਕੋਰਨਾ ਵਾਇਰਸ ਦੀ ਮਹਾਮਾਰੀ ਕਾਰਨ ਲੋਕ ਆਪਣੇ ਪਰਵਾਰਕ ਮੈਂਬਰਾਂ ਨੂੰ ਆਖਰੀ ਵਿਦਾਇਗੀ ਦੇਣ ਨੂੰ ਵੀ ਤਰਸ ਗਏ ਹਨ। ਲੋਕ ਅੰਤਿਮ ਸਸਕਾਰ ਵਿੱਚ ਵੀ ਸ਼ਾਮਲ ਨਹੀਂ ਹੋ ਰਹੇ ਤੇ ਕਈ ਜਗ੍ਹਾ ਅੰਤਿਮ ਸਸਕਾਰ ਲਈ ਜ਼ਰੂਰੀ ਸਾਮਾਨ ਦੀ ਕਿੱਲਤ ਵੀ ਪੇਸ਼ ਆ ਰਹੀ ਹੈ।
ਲੁਧਿਆਣਾ ਸ਼ਹਿਰ ਦੇ ਸ਼ਮਸ਼ਾਨਘਾਟ ਦੇ ਕਨਵੀਨਰ ਰਾਕੇਸ਼ ਕਪੂਰ ਅਨੁਸਾਰ ਉਥੇ ਅੰਤਿਮ ਸਸਕਾਰ ਵਿੱਚ ਪਹੁੰਚਣ ਵਾਲਿਆਂ ਦੀ ਗਿਣਤੀ 100 ਤੋਂ ਘੱਟ ਕੇ ਸਿਰਫ 20 ਰਹਿ ਗਈ ਹੈ। ਅਸਲ ਵਿੱਚ ਮਹਾਮਾਰੀ ਨੂੰ ਫੈਲਣ ਤੋਂ ਰੋਕਣ ਲਈ ਸਮਾਜਕ ਮੇਲ-ਜੋਲ ਘਟਾਉਣ ਦੇ ਨਿਰਦੇਸ਼ ਕਾਰਨ ਲੋਕ ਇਨ੍ਹਾਂ ਦੀ ਪਾਲਣਾ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਹਨ। ਸਮਾਜਕ ਮੇਲ-ਜੋਲ ਘਟਾਉਣ ਦਾ ਅਸਰ ਅੰਤਿਮ ਰਸਮਾਂ 'ਤੇ ਵੀ ਪੈ ਰਿਹਾ ਹੈ। ਲੋਕ ਅੰਤਿਮ ਸਸਕਾਰ ਵਿੱਚ ਵੀਡੀਓ ਕਾਨਫਰੰਸਿੰਗ ਰਾਹੀਂ ਸ਼ਾਮਲ ਹੋ ਰਹੇ ਹਨ। ਪੇਂਡੂ ਇਲਾਕਿਆਂ ਵਿੱਚ ਤਕਨਾਲੋਜੀ ਤੋਂ ਵਾਂਝੇ ਲੋਕ ਖੁਦ ਨੂੰ ਇਕੱਲਾ ਮਹਿਸੂਸ ਕਰ ਰਹੇ ਹਨ।
ਦਿੱਲੀ ਦੀ ਪੱਤਰਕਾਰ ਰਿਤਿਕਾ ਜੈਨ ਦੇ 85 ਸਾਲਾ ਦਾਦਾ ਦਾ ਦਿਹਾਂਤ 24 ਮਾਰਚ ਤੋਂ ਸ਼ੁਰੂ ਹੋਏ 21 ਦਿਨਾਂ ਦੇ ਦੇਸ਼ ਵਿਆਪੀ ਲਾਕਡਾਊਨ ਦੌਰਾਨ ਗੁਜਰਾਤ ਦੇ ਪਲੀਤਾਨਾ ਵਿੱਚ ਹੋ ਗਿਆ ਸੀ, ਪਰ ਉਹ ਉਨ੍ਹਾਂ ਦੇ ਆਖਰੀ ਦਰਸ਼ਨ ਵੀ ਨਹੀਂ ਕਰ ਸਕੀ। ਉਸ ਦੇ ਪਿਤਾ ਲਾਕਡਾਊਨ ਹੋਣ ਤੋਂ ਪਹਿਲਾਂ ਜਲਦੀ 'ਚ ਮੁੰਬਈ ਤੋਂ ਭਾਵਨਗਰ ਹਵਾਈ ਜਹਾਜ਼ ਰਾਹੀਂ ਪਹੁੰਚ ਗਏ, ਪਰ ਦੂਰ ਰਹਿ ਰਹੇ ਪਰਵਾਰ ਦਾ ਕੋਈ ਮੈਂਬਰ ਨਹੀਂ ਪਹੁੰਚ ਸਕਿਆ ਅਤੇ ਉਹ ਲੋਕ ਜ਼ੂਮ ਮੋਬਾਈਲ ਐਪ ਰਾਹੀਂ ਅੰਤਿਮ ਸਸਕਾਰ ਵਿੱਚ ਸ਼ਾਮਲ ਹੋਏ। ਅਦਾਕਾਰ ਸੰਜੇ ਸੂਰੀ ਨੂੰ ਵੀ ਏਸੇ ਪ੍ਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪਿਆ ਜਦੋਂ ਉਨ੍ਹਾਂ ਦੀ ਪਤਨੀ ਦੀ ਦਾਦੀ ਦਾ ਦਿਹਾਂਤ ਹੋ ਗਿਆ। ਸੂਰੀ ਨੇ ਟਵਿੱਟਰ 'ਤੇ ਲਿਖਿਆ, ਜ਼ੂਮ ਰਾਹੀਂ ਅੰਤਿਮ ਸਸਕਾਰ ਵਿੱਚ ਸ਼ਾਮਲ ਹੋਣਾ ਬਹੁਤ ਅਜੀਬ ਸੀ। ਇਸੇ ਤਰ੍ਹਾਂ ਚੇਨਈ ਵਿੱਚ ਰਹਿਣ ਵਾਲੇ ਕੇਸਵਨ (77) ਨੂੰ ਆਪਣੀ 94 ਸਾਲਾ ਮਾਂ ਦੇ ਦਿਹਾਂਤ ਦੀ ਸੂਚਨਾ ਸ਼ਹਿਰ ਤੋਂ ਦੂਰ ਉਨ੍ਹਾਂ ਦੇ ਭਰਾ ਘਰ ਮਿਲੀ। ਉਨ੍ਹਾਂ ਨੂੰ ਆਪਣੇ ਘਰ ਪਹੁੰਚਣ ਵਿੱਚ ਮੁਸ਼ਕਲ ਆਈ। ਚੇਨਈ ਦੇ ਵੀਰਰਾਘਵਨ ਦੇ ਪਿਤਾ ਦੀ ਮੌਤ ਉਤੇ ਪਰਵਾਰ ਦਾ ਕੋਈ ਮੈਂਬਰ ਰਸਮਾਂ 'ਚ ਸ਼ਾਮਲ ਨਹੀਂ ਹੋ ਸਕਿਆ।