ਨਵੀਂ ਦਿੱਲੀ, 31 ਅਕਤੂਬਰ (ਪੋਸਟ ਬਿਊਰੋ)- ਭਾਰਤ ਦੇ ਸਭ ਤੋਂ ਅਮੀਰ ਕਾਰੋਬਾਰੀ ਮੁਕੇਸ਼ ਅੰਬਾਨੀ ਨੇ ਕਿਹਾ ਹੈ ਕਿ ਸਾਡਾ ਦੇਸ਼ ਵਿਸ਼ਵ ਦਾ ਤੀਜਾ ਸਭ ਤੋਂ ਅਮੀਰ ਦੇਸ਼ ਬਣਨ ਵਾਲਾ ਹੈ।
ਮੁਕੇਸ਼ ਅੰਬਾਨੀ ਨੇ ਕਿਹਾ ਕਿ ਪਹਿਲੀਆਂ ਤਿੰਨ ਉਦਯੋਗਿਕ ਕ੍ਰਾਂਤੀਆਂ ਤੋਂ ਖੁੰਝ ਜਾਣ ਤੋਂ ਬਾਅਦ ਭਾਰਤ ਤਕਨੀਕ ਪਸੰਦ ਯੁਵਾ ਆਬਾਦੀ ਦੇ ਦਮ ਉਤੇ ਚੌਥੀ ਉਦਯੋਗਿਕ ਕ੍ਰਾਂਤੀ ਦੀ ਅਗਵਾਈ ਕਰਨ ਦੀ ਹਾਲਤ ਵਿੱਚ ਹੈ। ਉਸ ਨੇ 24ਵੇਂ ਮੋਬੀਕੈਮ ਸੰਮੇਲਨ ਨੂੰ ਸੰਬੋਧਨ ਕਰਦੇ ਹੋਏ ਕਿਹਾ ਕਿ ਭਾਰਤ ਦਾ ਡਿਜੀਟਲ ਬਦਲਾਅ ਬੇਮਿਸਾਲ ਤੇ ਅਚਾਨਕ ਹੈ। ਉਨ੍ਹਾਂ ਕਿਹਾ ਕਿ ਦੇਸ਼ ਦੇ ਵਾਇਰਲੈਸ ਬਰਾਡ ਬੈਂਡ ਦੇ ਮਾਮਲੇ 'ਚ ਸਿਰਫ 24 ਮਹੀਨਿਆਂ ਵਿੱਚ 155ਵੇਂ ਸਥਾਨ ਤੋਂ ਚੋਟੀ ਤੱਕ ਦਾ ਸਫਰ ਤੈਅ ਕੀਤਾ ਹੈ। ਉਨ੍ਹਾਂ ਨੇ ਯਾਦ ਦਿਵਾਇਆ ਕਿ 1990 ਦੇ ਦਹਾਕੇ ਵਿੱਚ ਜਦੋਂ ਰਿਲਾਇੰਸ ਸੋਧ ਅਤੇ ਪੈਟਰੋ ਕੈਮੀਕਲਜ਼ ਪ੍ਰੋਜੈਕਟ ਬਣ ਰਹੀ ਸੀ, ਭਾਰਤ ਦਾ ਕੁੱਲ ਘਰੇਲੂ ਉਤਪਾਦਨ (ਜੀ ਡੀ ਪੀ) ਕਰੀਬ 350 ਅਰਬ ਡਾਲਰ ਸੀ ਅਤੇ ਦੇਸ਼ ਬੇਹੱਦ ਗੰਭੀਰ ਆਰਥਿਕ ਸੰਕਟ ਵਿੱਚੋਂ ਬਾਹਰ ਨਿਕਲਿਆ ਸੀ। ਉਨ੍ਹਾਂ ਕਿਹਾ ਕਿ ਬਹੁਤ ਘੱਟ ਲੋਕਾਂ ਨੇ ਸੋਚਿਆ ਹੋਵੇਗਾ ਕਿ ਸਾਡੇ ਦੇਸ਼ ਦੀਆਂ ਸੰਭਾਵਨਾਵਾਂ ਇੰਨੀਆਂ ਰੋਸ਼ਨ ਹਨ। ਅੱਜ ਸਾਡੀ ਜੀ ਡੀ ਪੀ ਕਰੀਬ 3000 ਅਰਬ ਡਾਲਰ ਦੀ ਹੋ ਗਈ ਹੈ ਅਤੇ ਅਸੀਂ ਸੰਸਾਰ ਦੇ ਤੀਜੇ ਸਭ ਤੋਂ ਅਮੀਰ ਦੇਸ਼ ਬਣਨ ਦੀ ਰਾਹ 'ਤੇ ਹਾਂ। ਉਨ੍ਹਾ ਕਿਹਾ ਕਿ ਮੋਬਾਈਲ ਕੰਪਿਊਟਿੰਗ ਵੱਡੇ ਪੱਧਰ 'ਤੇ ਡਾਟੇ ਦੀ ਖਪਤ ਲਈ ਮੁੱਖ ਸਰੋਤ ਹੈ ਅਤੇ ਇਸ ਨੇ ਯੁਵਾ ਭਾਰਤੀਆਂ ਨੂੰ ਵਿਆਪਕ ਬਦਲਾਅ ਵਾਲੀ ਸੋਚ ਲਈ ਜ਼ਮੀਨ ਦਿੱਤੀ ਹੈ। ਅੰਬਾਨੀ ਨੇ ਕਿਹਾ ਕਿ ਕੋਲਾ ਤੇ ਬਿਜਲੀ ਅਤੇ ਤੇਲ 'ਤੇ ਆਧਾਰਤ ਕ੍ਰਮਵਾਰ ਪਹਿਲੀ ਤੇ ਦੂਜੀ ਉਦਯੋਗਿਕ ਕ੍ਰਾਂਤੀਆਂ ਵਿੱਚ ਭਾਰਤ ਹਾਸ਼ੀਏ 'ਤੇ ਰਿਹਾ। ਕੰਪਿਊਟਰ ਕੇਂਦਰਿਤ ਤੀਜੀ ਕ੍ਰਾਂਤੀ 'ਚ ਭਾਰਤ ਨੇ ਦੌੜ ਵਿੱਚ ਭਾਗ ਲੈਣਾ ਸ਼ੁਰੂ ਕੀਤਾ। ਉਨ੍ਹਾਂ ਕਿਹਾ ਕਿ ਚੌਥੀ ਉਦਯੋਗਿਕ ਕ੍ਰਾਂਤੀ ਹੁਣ ਸਾਡੇ 'ਤੇ ਹੈ।