ਲੰਡਨ, 2 ਅਪ੍ਰੈਲ (ਪੋਸਟ ਬਿਊਰੋ)- ਵਿੰਬਲਡਨ ਨੂੰ ਕੋਰੋਨਾ ਵਾਇਰਸ ਦੀ ਮਹਾਂਮਾਰੀ ਕਾਰਨ ਰੱਦ ਕੀਤਾ ਗਿਆ ਹੈ। ਦੂਜੇ ਵਿਸ਼ਵ ਯੁੱਧ ਤੋਂ ਬਾਅਦ ਇਹ ਪਹਿਲਾ ਮੌਕਾ ਹੈ, ਜਦੋਂ ਸਭ ਤੋਂ ਪੁਰਾਣਾ ਗੈਂ੍ਰਡ ਸਲੈਮ ਟੂਰਨਾਮੈਂਟ ਨਹੀਂ ਖੇਡਿਆ ਜਾਵੇਗਾ, ਜਿਸ ਬਾਰੇ ਫੈਸਲਾ ਬਿਨਾਂ ਵਿਰੋਧ ਤੋਂ ਕੀਤਾ ਗਿਆ ਹੈ।
ਆਲ ਇੰਗਲੈਂਡ ਕਲੱਬ ਨੇ ਹੰਗਾਮੀ ਮੀਟਿੰਗ ਤੋਂ ਬਾਅਦ ਐਲਾਨ ਕੀਤਾ ਕਿ ਵਿੰਬਲਡਨ ਇਸ ਸਾਲ ਨਹੀਂ ਹੋਵੇਗਾ। ਵਿੰਬਲਡਨ 29 ਜੂਨ ਤੋਂ 12 ਜੁਲਾਈ ਤੱਕ ਲੰਡਨ ਦੇ ਘਾਹ ਦੇ ਕੋਰਟ 'ਤੇ ਖੇਡਿਆ ਜਾਣਾ ਸੀ। ਇਹ ਵੱਕਾਰੀ ਟੂਰਨਾਮੈਂਟ ਪਹਿਲੀ ਵਾਰ 1877 ਵਿੱਚ ਖੇਡਿਆ ਗਿਆ ਸੀ। 1915-18 ਵਿਚਾਲੇ ਪਹਿਲੀ ਵਿਸ਼ਵ ਜੰਗ ਤੇ 1940-45 ਵਿਚਕਾਰ ਦੂਜੀ ਵਿਸ਼ਵ ਜੰਗ ਨੂੰ ਛੱਡ ਕੇ ਹਰ ਸਾਲ ਖੇਡਿਆ ਜਾਂਦਾ ਰਿਹਾ ਹੈ। ਵਰਨਣ ਯੋਗ ਹੈ ਕਿ ਪਹਿਲਾਂ ਟੋਕਿਓ ਉਲੰਪਿਕ ਸਮੇਤ ਬਹੁਤ ਸਾਰੇ ਟੂਰਨਾਮੈਂਟਾਂ ਨੂੰ ਸਸਪੈਂਡ ਜਾਂ ਰੱਦ ਕਰ ਦਿੱਤਾ ਗਿਆ ਹੈ। ਫਰੈਂਚ ਓਪਨ ਤੋਂ ਬਾਅਦ ਵਿੰਬਲਡਨ ਟੈਨਿਸ ਦਾ ਦੂਜਾ ਵੱਡਾ ਟੂਰਨਾਮੈਂਟ ਹੈ, ਜੋ ਕੋਰੋਨਾ ਵਾਇਰਸ ਕਾਰਨ ਰੱਦ ਕਰ ਦਿੱਤਾ ਗਿਆ ਹੈ। ਫਰੈਚ ਓਪਨ ਨੂੰ ਸਤੰਬਰ ਤੱਕ ਲਈ ਮੁਲਤਵੀ ਕਰ ਦਿੱਤਾ ਗਿਆ ਹੈ, ਜਦੋਂ ਕਿ ਯੂ ਐਸ ਓਪਨ 31 ਅਗਸਤ ਤੋਂ 13 ਸਤੰਬਰ ਦੇ ਵਿਚਕਾਰ ਖੇਡਿਆ ਜਾਵੇਗਾ।