ਕਾਬੁਲ, 2 ਅਪ੍ਰੈਲ (ਪੋਸਟ ਬਿਊਰੋ)- ਅਫ਼ਗਾਨਿਸਤਾਨ ਦੀ ਰਾਜਧਾਨੀ ਕਾਬੁਲ ਵਿਚਲੇ ਗੁਰਦੁਆਰਾ ਹਰਿਰਾਇ ਸਾਹਿਬ 'ਚ ਆਤਮਘਾਤੀ ਹਮਲੇ ਦੌਰਾਨ ਮਾਰੇ ਗਏ 25 ਕਾਬੁਲੀ ਸਿੱਖਾਂ ਦੇ ਨਾਲ ਉਥੋਂ ਦੇ ਇੱਕ ਮੁਸਲਮਾਨ ਨੇ ਵੀ ਸ਼ਹਾਦਤ ਦਿੱਤੀ ਸੀ। ਉਸ ਦੇ ਪਰਵਾਰ ਨੇ ਅਪੀਲ ਕੀਤੀ ਹੈ ਕਿ ਆਪਣੀ ਜ਼ਿੰਮੇਵਾਰੀ ਬਹਾਦਰੀ ਨਾਲ ਨਿਭਾਉਂਦੇ ਹੋਏ ਸ਼ਹਾਦਤ ਦੇਣ ਵਾਲੇ ਗੁਰਦੁਆਰਾ ਸਾਹਿਬ ਦੇ ਸੁਰੱਖਿਆ ਗਾਰਡ ਮਹਿਰਮ ਅਲੀ ਸ਼ਗਸੀ (43 ਸਾਲ) ਨੂੰ ਵੀ ਯਾਦ ਰੱਖਿਆ ਜਾਵੇ।
ਗੁਰਦੁਆਰਾ ਸਾਹਿਬ 'ਚ ਹੋਏ ਅੱਤਵਾਦੀ ਹਮਲੇ 'ਚ ਮਾਰੇ ਗਏ ਇਕਲੌਤੇ ਮੁਸਲਮਾਨ ਮਹਿਰਮ ਅਲੀ ਦੇ ਪਰਵਾਰ ਦਾ ਕਹਿਣਾ ਹੈ ਕਿ ਬੰਦੂਕਧਾਰੀਆਂ ਨੂੰ ਗੁਰਦੁਆਰਾ ਸਾਹਿਬ 'ਚ ਦਾਖ਼ਲ ਹੋਣ ਤੋਂ ਰੋਕਣ ਦੀ ਕੋਸ਼ਿਸ਼ ਕਰਨ 'ਤੇ ਹਮਲਵਾਰ ਨੇ ਉਸ ਦੇ ਸਿਰ 'ਚ ਗੋਲੀ ਮਾਰੀ ਸੀ। ਉਕਤ ਹਮਲੇ ਦੇ ਮ੍ਰਿਤਕਾਂ ਦੇ ਕੀਤੇ ਅੰਤਿਮ ਸੰਸਕਾਰ ਮੌਕੇ ਵੀ ਮਹਿਰਮ ਅਲੀ ਦਾ ਪਰਵਾਰ ਸ਼ਾਮਲ ਹੋਇਆ ਅਤੇ ਉਸ ਦੇ ਬਾਅਦ ਪਿੰਡ ਕਲਾਈ ਜ਼ਮਾਨ ਖ਼ਾਨ ਦੇ ਕਬਰਸਤਾਨ 'ਚ ਉਸ ਨੂੰ ਦਫ਼ਨਾਇਆ ਗਿਆ ਸੀ। ਕਾਬੁਲ ਤੋਂ ਇਸ ਬਾਰੇ ਅਰੰਦਰ ਸਿੰਘ ਨੇ ਦੱਸਿਆ ਕਿ ਮਹਿਰਮ ਅਲੀ ਦਾ ਕਾਬੁਲੀ ਸਿੱਖ ਭਾਈਚਾਰੇ ਨਾਲ ਚੰਗਾ ਰਿਸ਼ਤਾ ਸੀ। ਮਹਿਰਮ ਦੇ ਛੋਟੇ ਪੁੱਤਰ ਅਬਦੁਲ ਵਾਹਦ (23) ਦਾ ਕਹਿਣਾ ਹੈ ਕਿ ਉਸ ਦੇ ਪਿਤਾ ਹਫ਼ਤੇ 'ਚ ਸਿਰਫ਼ ਇੱਕ ਵਾਰ ਘਰ ਆਉਂਦੇ ਸਨ ਅਤੇ ਬਾਕੀ ਦਿਨ ਗੁਰਦੁਆਰਾ ਸਾਹਿਬ 'ਚ ਰਹਿੰਦੇ ਸਨ ਅਤੇ ਉਥੇ ਹੀ ਨਮਾਜ਼ ਪੜ੍ਹਦੇ ਸਨ। ਮਹਿਰਮ ਅਲੀ ਆਪਣੇ ਪਿੱਛੇ ਇੱਕ ਬਜ਼ੁਰਗ ਪਿਤਾ ਕੁਰਬਾਨ ਅਲੀ (75 ਸਾਲ), ਪਤਨੀ ਫਰੀਬਾ ਗੁਲ ਰੋਕ (40 ਸਾਲ) ਅਤੇ ਚਾਰ ਬੱਚੇ-ਪਰਵੇਜ਼ (22 ਸਾਲ), ਅਤੇ ਇੱਕ ਧੀ ਛੱਡ ਗਏ ਹਨ।