ਨਵੀਂ ਦਿੱਲੀ, 1 ਅਪਰੈਲ, (ਪੋਸਟ ਬਿਊਰੋ)- ਦਿੱਲੀ ਦੇ ਹਜ਼ਰਤ ਨਿਜਾਮੂਦੀਨ ਵਾਲੇ ਤਬਲੀਗੀ ਮਰਕਜ ਤੋਂ ਇਸ ਜਮਾਤ ਦੇ ਲੋਕਾਂ ਨੂੰ ਕੱਢਣ ਤੋਂ ਬਾਅਦ ਕੇਂਦਰ ਸਰਕਾਰ ਨੇ ਵੱਖ-ਵੱਖ ਰਾਜਾਂ ਵਿਚ ਗਏ ਉਨ੍ਹਾਂ ਦੀ ਜਮਾਤ ਦੇ ਲੋਕਾਂ ਦੀ ਤਲਾਸ਼ ਤੇਜ਼ ਕਰ ਦਿੱਤੀ ਹੈ। ਇਸ ਦੌਰਾਨ ਤਬਲੀਗ ਦੇ ਕਈ ਲੋਕਾਂ ਵਿੱਚ ਕੋਰੋਨਾ ਵਾਇਰਸ ਪਾਜਿ਼ਟਿਵ ਨਿਕਲਿਆ ਹੈ।
ਭਾਰਤ ਦੇ ਕੈਬਨਿਟ ਸੈਕਟਰੀ ਰਾਜੀਵ ਗੌਬਾ ਨੇ ਅੱਜ ਦੇਸ਼ ਦੇ ਸਾਰੇ ਰਾਜਾਂ ਦੇ ਪੁਲਿਸ ਮੁਖੀਆਂ (ਡੀ ਜੀ ਪੀਜ਼) ਤੇ ਚੀਫ ਸੈਕਟਰੀਆਂ ਨੂੰ ਤਬਲੀਗੀ ਜਮਾਤ ਦਾ ਕੇਸ ਛੇਤੀ ਵੇਖਣ ਨੂੰ ਕਿਹਾ ਹੈ। ਇਸ ਜਮਾਤ ਦੇ ਕਾਰਨ ਪਿਛਲੇ 24 ਘੰਟਿਆਂ ਵਿਚ ਕੋਰੋਨਾ ਨਾਲ ਪੀੜਤ 376 ਨਵੇਂ ਮਰੀਜ਼ ਪਤਾ ਲੱਗੇ ਹਨ। ਰਾਜੀਵ ਗੌਬਾ ਨੇ ਰਾਜਾਂ ਸਰਕਾਰ ਨੂੰ ਕਿਹਾ ਹੈ ਕਿ ਜਮਾਤ ਦੇ ਲੋਕਾਂ ਦੀ ਜੰਗੀ ਪੱਧਰ ਉੱਤੇ ਖੋਜ ਕਰ ਕੇ ਉਨ੍ਹਾਂ ਨੂੰ ਬਾਕੀ ਲੋਕਾਂ ਤੋਂ ਵੱਖ ਕਰਨਾ ਜ਼ਰੂਰੀ ਹੈ, ਵਰਨਾ ਅੱਜ ਤਕ ਕੀਤੀਆਂ ਸਭ ਕੋਸ਼ਿਸ਼ਾਂ ਉੱਤੇ ਪਾਣੀ ਫਿਰ ਸਕਦਾ ਹੈ। ਉਨ੍ਹਾਂ ਨੇ ਕਈ ਤਬਲੀਗੀਆਂ ਦੇ ਵਿਦੇਸ਼ੀ ਹੋਣ ਤੇ ਟੂਰਿਸਟ ਵੀਜ਼ੇ ਉੱਤੇ ਆਏ ਹੋਣ ਦੇ ਬਾਵਜੂਦ ਧਰਮ ਪ੍ਰਚਾਰ ਵਿਚ ਲੱਗਣ ਦਾ ਹਵਾਲਾ ਦੇ ਕੇ ਸਖਤ ਕਾਰਵਾਈ ਕਰਨ ਲਈ ਕਿਹਾ ਹੈ।
ਵਰਨਣ ਯੋਗ ਹੈ ਕਿ ਤਬਲੀਗੀ ਜਮਾਤ ਦੇ ਲੋਕਾਂ ਦੀ ਅਪਰਾਧਿਕ ਲਾਪਰਵਾਹੀ ਕਾਰਨ ਕੋਰੋਨਾ ਦੇ ਕੇਸ ਤੇਜ਼ੀ ਨਾਲ ਵਧੇ ਹਨ। ਇਸ ਦੇ ਹਵਾਲੇ ਨਾਲ ਸਿਹਤ ਮੰਤਰਾਲੇ ਦੇ ਜਾਇੰਟ ਸੈਕਟਰੀ ਲਵ ਅਗਰਵਾਲ ਨੇ ਕਿਹਾ ਕਿ ਉਨ੍ਹਾਂ ਦੇ ਸੰਪਰਕ ਵਿਚ ਆਉਣ ਕਰ ਕੇ ਦਿੱਲੀ ਦੇ 18, ਜੰਮੂ-ਕਸ਼ਮੀਰ 23, ਤੇਲੰਗਾਨਾ 20, ਆਂਧਰਾ ਪ੍ਰਦੇਸ਼ 43, ਅੰਡੇਮਾਨ-ਨਿਕੋਬਾਰ ਦੇ ਨੌਂ, ਤਾਮਿਲ ਨਾਡੂ 110 ਤੇ ਪੁਡੂਚੇਰੀ ਵਿੱਚ ਦੋ ਨਵੇਂ ਕੇਸ ਪਤਾ ਲੱਗੇ ਹਨ। ਇਸ ਤੋਂ ਬਿਨਾ ਕਈ ਹੋਰ ਥਾਵਾਂ ਉੱਤੇ ਸੈਂਪਲ ਟੈਸਟ ਕੀਤੇ ਜਾ ਰਹੇ ਹੈ। ਜਿੱਥੇ ਇਹ ਕੇਸ ਮਿਲੇ ਹਨ, ਇਨ੍ਹਾਂ ਦੇ ਸੰਪਰਕ ਵਿਚ ਆਉਣ ਵਾਲਿਆਂ ਦੀ ਪਛਾਣ ਕਰਨ ਲਈ ਤਲਾਸ਼ੀ ਮੁਹਿੰਮ ਵੀ ਸ਼ੁਰੂ ਕਰ ਦਿੱਤੀ ਗਈ ਹੈ।