ਨਵੀਂ ਦਿੱਲੀ, 1 ਅਪ੍ਰੈਲ (ਪੋਸਟ ਬਿਊਰੋ)- ਐਲ ਪੀ ਜੀ (ਰਸੋਈ ਗੈਸ) ਦੀ ਸਿਲੰਡਰ ਬੁਕਿੰਗ ਬਾਰੇ ਨਵੇਂ ਕੇਸ ਸਾਹਮਣੇ ਆ ਰਹੇ ਹਨ। ਤੇਲ ਕੰਪਨੀਆਂ ਦੇ ਅਧਿਕਾਰੀਆਂ ਮੁਤਾਬਕ ਲਾਕਡਾਊਨ ਦੇ ਐਲਾਨ ਪਿੱਛੋਂ ਕਈ ਲੋਕਾਂ ਨੇ ਘਰ 'ਚ ਸਿਲੰਡਰ ਖਾਲੀ ਕੀਤੇ ਬਿਨਾਂ ਬੁਕਿੰਗ ਕਰਵਾ ਲਈ, ਪਰ ਡਲਿਵਰੀ ਪੁੱਜਣ ਉੱਤੇ ਸਿਲੰਡਰ ਵਾਪਸ ਭੇਜ ਰਹੇ ਹਨ।
ਗੈਸ ਸਿਲੰਡਰਾਂ ਦੀ ਵਿਕਰੀ ਦੀ ਜ਼ਿੰਮੇਵਾਰੀ ਸੰਭਾਲ ਰਹੇ ਇੱਕ ਅਧਿਕਾਰੀ ਨੇ ਨਾਂ ਨਾ ਦੱਸਣ ਦੀ ਸ਼ਰਤ 'ਤੇ ਕਿਹਾ, ‘ਸਾਡੇ ਡਲਿਵਰੀ ਬੁਆਏ ਬਿਨਾਂ ਸਿਲੰਡਰ ਦਿੱਤੇ ਵਾਪਸ ਲਿਆ ਰਹੇ ਹਨ, ਕਿਉਂਕਿ ਕਈ ਗਾਹਕਾਂ ਨੇ ਖਾਲੀ ਸਿਲੰਡਰ ਦੇ ਬਿਨਾਂ ਦੀ ਹਫੜਾ ਦਫੜੀ 'ਚ ਬੁਕਿੰਗ ਕਰ ਦਿੱਤੀ ਸੀ।' ਸੂਤਰਾਂ ਮੁਤਾਬਕ ਪਿਛਲੇ 15 ਤੋਂ 20 ਫ਼ੀਸਦੀ ਕੇਸਾਂ 'ਚ ਲੋਕਾਂ ਨੇ ਖਾਲੀ ਸਿਲੰਡਰ ਦੇ ਬਿਨਾਂ ਬੁਕਿੰਗ ਕਰ ਦਿੱਤੀ ਸੀ। ਇਸ ਕਾਰਨ ਇਹ ਸਿਲੰਡਰ ਵਾਪਸ ਲਿਆਉਣੇ ਪਏ ਹਨ। ਅਧਿਕਾਰੀ ਨੇ ਦੱਸਿਆ, ‘ਆਮ ਤੌਰ ਉੱਤੇ ਮਾਰਕੀਟਿੰਗ ਕੰਪਨੀਆਂ ਕੋਲ ਰੋਜ਼ ਕਰੀਬ 50 ਲੱਖ ਸਿਲੰਡਰ ਦੀ ਬੁਕਿੰਗ ਹੁੰਦੀ ਹੈ, ਪਰ ਪਿਛਲੇ ਹਫ਼ਤੇ ਇਹ ਅੰਕੜਾ ਕਰੀਬ 50 ਲੱਖ 'ਤੇ ਪੁੱਜ ਗਿਆ। ਇਸ ਕਾਰਨ ਕੰਪਨੀਆਂ ਨੂੰ ਇਸ ਦੇ ਮੁਤਾਬਕ ਉਤਪਾਦਨ ਵਧਾਉਣਾ ਪਿਆ। ਬਾਅਦ 'ਚ ਅਸੀਂ ਇਹ ਜਾਣ ਕੇ ਹੈਰਾਨ ਹੋਏ ਕਿ ਲੋਕ ਸਿਲੰਡਰ ਖਾਲੀ ਹੋਏ ਬਿਨਾਂ ਹੀ ਬੁਕਿੰਗ ਕਰਵਾ ਦਿੰਦੇ ਹਨ।' ਇੱਕ ਹੋਰ ਅਧਿਕਾਰੀ ਦਾ ਕਹਿਣਾ ਸੀ ਕਿ ਲਾਕਡਾਊਨ ਦੇ ਸ਼ੁਰੂ 'ਚ ਡਲਿਵਰੀ ਵਾਲਿਆਂ ਨੂੰ ਕੁਝ ਪਰੇਸ਼ਾਨੀਆਂ ਦਾ ਸਾਹਮਣਾ ਕਰਨਾ ਪਿਆ ਹੈ, ਜਿਸ ਨਾਲ ਲੋਕਾਂ 'ਚ ਹਫੜਾ ਦਫੜੀ ਸੀ, ਪਰ ਇਸ ਵੇਲੇ ਸਭ ਠੀਕ ਹੈ।