ਨਵੀਂ ਦਿੱਲੀ, 1 ਅਪ੍ਰੈਲ (ਪੋਸਟ ਬਿਊਰੋ)-ਕੋਰੋਨਾ ਵਾਇਰਸ ਤੋਂ ਬਚਣ ਲਈ ਵਿਦੇਸ਼ੀ ਯੂਨੀਵਰਸਿਟੀਆਂ ਤੋਂ ਭਾਰਤ ਵਾਪਸ ਆਏ ਵਿਦਿਆਰਥੀਆਂ ਦਾ ਸਥਾਨਕ ਲੋਕ ਬਾਈਕਾਟ ਕਰ ਰਹੇ ਹਨ। ਉਨ੍ਹਾਂ ਨੂੰ ਸਮਾਜਕ ਕਲੰਕ ਅਤੇ ਦੁਸ਼ਮਣੀ ਵਰਗੇ ਹਾਲਾਤ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਸਥਾਨਕ ਨਾਗਰਿਕ ਉਨ੍ਹਾਂ ਦੀ ਟਰੈਵਲ ਹਿਸਟਰੀ ਬਾਰੇ ਵੱਖ-ਵੱਖ ਤਰ੍ਹਾਂ ਦੀਆਂ ਦੁਸ਼ਮਣੀ ਭਰੀਆਂ ਪ੍ਰਤੀਕਿਰਿਆਵਾਂ ਦੇ ਰਹੇ ਹਨ।
ਇਟਲੀ ਦੇ ਸਿਏਨਾ ਯੂਨੀਵਰਸਿਟੀ 'ਚ ਮਾਸਟਰ ਡਿਗਰੀ ਕਰ ਰਹੇ 25 ਸਾਲਾ ਵਿਦਿਆਰਥੀ ਦਾ 19 ਮਾਰਚ ਨੂੰ ਭਾਰਤ ਪਹੁੰਚਦੇ ਹੀ ਕੋਰੋਨਾ ਦੇ ਵਾਇਰਸ ਬਾਰੇ ਟੈਸਟ ਕੀਤਾ ਗਿਆ, ਪਰ ਇਹ ਨੈਗੇਟਿਵ ਆਇਆ। ਉਹ ਇਸ ਵਕਤ ਕਾਲੀਕੱਟ ਵਿੱਚ ਘਰ ਵਿੱਚ 14 ਦਿਨਾਂ ਲਈ ਆਈਸੋਲੇਟ ਹੈ। ਉਸ ਦੇ ਘਰ ਪਹੁੰਚਣ ਤੋਂ ਪਹਿਲਾਂ ਉਸ ਦੇ ਮਾਂ-ਬਾਪ ਇੱਕ ਰਿਸ਼ਤੇਦਾਰ ਦੇ ਕੋਲ ਚਲੇ ਗਏ। ਉਹ ਡਰਿਆ ਹੋਇਆ ਹੈ ਅਤੇ ਉਦਾਸ ਹੈ। ਉਸ ਨੇ ਦੱਸਿਆ, ਮੇਰੀ ਮਾਂ ਮੈਨੂੰ ਖਾਣਾ ਦੇਣ ਆਉਂਦੀ ਹੈ, ਪਰ ਘਰ ਦੀ ਦਹਲਿੀਜ਼ 'ਤੇ ਖਾਣਾ ਰੱਖ ਕੇ ਚਲੀ ਜਾਂਦੀ ਹੈ। ਮੇਰੇ ਗੁਆਂਢੀ ਮੇਰੇ ਤੋਂ ਦੂਰ ਰਹਿੰਦੇ ਹਨ ਅਤੇ ਅਜਿਹੀਆਂ ਅਫਵਾਹਾਂ ਫੈਲਾ ਰਹੇ ਹਨ, ਜਿਵੇਂ ਮੈਂ ਅਸਲ ਵਿੱਚ ਕੋਰੋਨਾ ਪਾਜ਼ੀਟਿਵ ਹਾਂ। ਮੈਂ ਪੁਲਸ ਨੂੰ ਸ਼ਿਕਾਇਤ ਕੀਤੀ ਹੈ। ਇਸ ਵਕਤ ਮੈਨੂੰ ਦੂਜੀ ਟੈਸਟ ਰਿਪੋਰਟ ਦਾ ਇੰਤਜ਼ਾਰ ਹੈ।
ਦੂਸਰੇ ਦੇਸ਼ਾ ਤੋਂ ਘਰ ਪਰਤਣ ਵਾਲੇ ਦਰਜਨਾਂ ਵਿਦਿਆਰਥੀਆਂ ਦੀ ਲਗਭਗ ਇਹੋ ਕਹਾਣੀ ਹੈ। ਚੇਨਈ 'ਚ ਬ੍ਰਿਟੇਨ ਤੋਂ ਮੁੜੀ ਇੱਕ ਵਿਦਿਆਰਥਣ ਨੇ ਦੱਸਿਆ ਕਿ ਆਈਸੋਲੇਟ ਦੌਰਾਨ ਗੁਆਂਢੀਆਂ ਨੇ ਉਸ ਦੀ ਮਦਦ ਕੀਤੀ। ਜਾਣ ਪਛਾਣ ਵਾਲੇ, ਗੁਆਂਢੀ, ਪਰਵਾਰ ਅਤੇ ਦੋਸਤਾਂ ਨੇ ਇਨ੍ਹਾਂ ਵਿਦਿਆਰਥੀਆਂ ਦੇ ਭਾਰਤ ਪਰਤਣ 'ਤੇ ਇਨ੍ਹਾਂ ਤੋਂ ਦੂਰੀ ਬਣਾ ਲਈ ਹੈ। ਅਫਵਾਹਾਂ ਫੈਲਾਈਆਂ ਜਾ ਰਹੀਆਂ ਹਨ ਅਤੇ ਉਨ੍ਹਾਂ ਬਾਰੇ ਪੁਲਸ ਨੂੰ ਕਾਲ ਕਰ ਕੇ ਸ਼ਿਕਾਇਤਾਂ ਕੀਤੀਆਂ ਜਾ ਰਹੀਆਂ ਹਨ। ਇਟਲੀ ਤੋਂ ਮੁੜੇ ਇੱਕ ਵਿਦਿਆਰਥੀ ਬਾਰੇ ਅਫਵਾਹ ਫੈਲਾ ਦਿੱਤੀ ਗਈ ਕਿ ਉਹ ਮੰਦਰ ਗਿਆ ਸੀ, ਜਿਸ ਕਾਰਨ ਇਸ ਨੂੰ ਮਾੜੇ ਵਿਹਾਰ ਦਾ ਸਾਹਮਣਾ ਕਰਨਾ ਪਿਆ, ਜਦ ਕਿ ਉਸ ਦਾ ਕਹਿਣਾ ਹੈ ਕਿ ਉਹ ਘਰ ਵਿੱਚ ਹੀ ਸੀ।
ਆਈਸੋਲੇਟ ਵਿੱਚ ਰਹਿ ਰਹੀ ਤੇਲੰਗਾਨਾ ਦੀ ਵਿਦਿਆਰਥਣ ਨੇ ਦੱਸਿਆ ਕਿ ਮੇਰੇ ਗੁਆਂਢੀ ਮੇਰੇ ਮਾਂ-ਬਾਪ ਨਾਲ ਵੀ ਗੱਲ ਕਰਨ ਤੋਂ ਡਰਦੇ ਹਨ। ਬੰਗਲੌਰ ਦੀ ਇੱਕ ਔਰਤ ਨੇ ਘਰ ਪਰਤਣ ਤੋਂ ਬਾਅਦ ਬਹੁਤ ਮੁਸ਼ਕਲ ਸਮਾਂ ਗੁਜ਼ਾਰਿਆ। ਥੱਕ ਹਾਰ ਕੇ ਉਹ ਬਹੁਤ ਦੂਰ ਆਪਣੇ ਪਿੰਡ ਚਲੀ ਗਈ ਹੈ। ਵਿਦੇਸ਼ ਤੋਂ ਮੁੜੇ ਕਈ ਵਿਦਿਆਰਥੀਆਂ ਦੇ ਮਾਤਾ-ਪਿਤਾ ਨੂੰ ਅਪਾਰਟਮੈਂਟ ਬਲਾਕਾਂ ਵਿੱਚ ਦੁਰ-ਵਿਹਾਰ ਝੱਲਣਾ ਪੈ ਰਿਹਾ ਹੈ। ਦਿੱਲੀ ਦੇ ਇੱਕ ਪਰਵਾਰ ਨੇ ਕਿਹਾ ਕਿ ਗੁਆਂਢ ਵਿਚਲੀ ਕਰਿਆਨੇ ਦੀ ਦੁਕਾਨ ਤੱਕ ਜਾਣਾ ਉਨ੍ਹਾਂ ਲਈ ਦੁਖਦਾਈ ਹੋ ਗਿਆ ਅਤੇ ਸਥਾਨਕ ਵਪਾਰੀ ਵੀ ਸਾਮਾਨ ਦੇਣ ਲਈ ਤਿਆਰ ਨਹੀਂ ਹੁੰਦੇ ਹਨ। ਕੋਲਕਾਤਾ ਦੇ ਇੱਕ ਮਾਂ-ਬਾਪ ਨੇ ਕਿਹਾ ਕਿ ਉਸ ਦੇ ਨਾਲ ਉਨ੍ਹਾਂ ਗੁਆਂਢੀਆਂ ਨੇ ਮਾੜਾ ਵਿਹਾਰ ਕੀਤਾ ਜੋ ਉਨ੍ਹਾਂ ਨੂੰ ਲੰਬੇ ਸਮੇਂ ਤੋਂ ਜਾਣਦੇ ਸਨ।