ਨਵੀਂ ਦਿੱਲੀ, 1 ਅਪ੍ਰੈਲ (ਪੋਸਟ ਬਿਊਰੋ)- ਕੋਰੋਨਾ ਵਾਇਰਸ ਨਾਲ ਨਜਿੱਠਣ ਲਈ ਭਾਰਤ ਸਰਕਾਰ ਜਲਦੀ ਹੀ ਚੀਨ ਨੂੰ ਨਿੱਜੀ ਸੁਰੱਖਿਆ ਜੰਤਰ (ਪੀ ਪੀ ਈ)-ਮਾਸਕ, ਆਈ ਗੇਅਰ, ਹੋਰ ਜ਼ਰੂਰੀ ਵਸਤਾਂ ਸਮੇਤ ਵੈਂਟੀਲੇਟਰ ਖਰੀਦਣ ਲਈ ਆਰਡਰ ਦੇਵੇਗੀ, ਪਰ ਕੁਝ ਦੇਸ਼ਾਂ ਵੱਲੋਂ ਪ੍ਰੀਖਣ ਕਿੱਟਸ (ਟੈਸਟਿੰਗ ਕਿੱਟਸ) ਵਿੱਚ ਖ਼ਾਮੀਆਂ ਨਿਕਲਣ ਪਿੱਛੋਂ ਇਸ ਖਰੀਦ ਦੀ ਇਸ ਸੂਚੀ ਵਿੱਚ ਚੀਨੀ ਪ੍ਰੀਖਣ ਕਿੱਟਸ ਨੂੰ ਸ਼ਾਮਲ ਨਹੀਂ ਕੀਤਾ ਗਿਆ।
ਚੀਨ ਵੱਲੋਂ ਸਪਲਾਈ ਕੀਤੀਆਂ ਪ੍ਰੀਖਣ ਕਿੱਟਾਂ ਨੂੰ ਸਪੇਨ, ਚੈਕ ਗਣਰਾਜ ਅਤੇ ਤੁਰਕੀ ਨੇ ਨੁਕਸਦਾਇਕ ਮੰਨਿਆ ਹੈ ਅਤੇ ਫਿਲੀਪੀਨਸ ਨੇ ਵੀ ਨੁਕਸਦਾਇਕ ਕਿੱਟ ਦੀ ਸੂਚਨਾ ਦਿੱਤੀ ਹੈ। ਸਪਨੇ ਦੇ ਸਿਹਤ ਅਧਿਕਾਰੀਆਂ ਦੀ ਸ਼ਿਕਾਇਤ 'ਤੇ ਪਿਛਲੇ ਸ਼ੁੱਕਰਵਾਰ ਇੱਕ ਚੀਨੀ ਕੰਪਨੀ ਨੇ ਹਜ਼ਾਰਾਂ ਨੁਕਸਦਾਇਕ ਪ੍ਰੀਖਣ ਕਿਟਾਂ ਨੂੰ ਬਦਲਣ ਦੀ ਪੇਸ਼ਕਸ਼ ਕੀਤੀ ਹੈ। ਸਪੇਨ ਦੇ ਸਿਹਤ ਮੰਤਰੀ ਸਲਵਾਡੋਰ ਇੱਲਾ ਦੇ ਅਨੁਸਾਰ 6,40,000 ਪ੍ਰੀਖਣ ਕਿੱਟਸ ਦੀ ਪਹਿਲੀ ਖੇਪ 'ਚ ਕਈ ਪ੍ਰੀਖਣ ਕਿੱਟਾਂ ਪੀੜਤ ਮਰੀਜ਼ਾਂ ਦੀ ਪੂਰੀ ਪਛਾਣ ਕਰਨ ਵਿੱਚ ਸਫਲ ਨਹੀਂ ਹੋ ਸਕੀਆਂ। ਪਿਛਲੇ ਵੀਰਵਾਰ ਸਪੇਨ ਨੇ 58,000 ਕਿੱਟਾਂ ਵਾਪਸ ਕਰਨ ਦਾ ਐਲਾਨ ਕੀਤਾ ਸੀ ਅਤੇ ਪਿਛਲੇ ਹਫਤੇ ਇਹ ਪਤਾ ਲੱਗਾ ਸੀ ਕਿ ਭਾਰਤ ਵੈਂਟੀਲੇਟਰਸ, ਐੱਨ-95 ਮਾਸਕ ਅਤੇ ਨਿੱਜੀ ਸੁਰੱਖਿਆ ਉਪਕਰਨਾਂ ਆਦਿ ਮੈਡੀਕਲ ਵਸਤਾਂ ਦੀ ਖਰੀਦ ਲਈ ਚੀਨ ਨਾਲ ਸੌਦਾ ਕਰ ਰਿਹਾ ਹੈ। ਇਹ ਭਾਰਤ ਦਾ ਦਬਾਅ ਘੱਟ ਕਰ ਸਕਦਾ ਹੈ ਕਿਉਂਕਿ ਇਹ ਕੋਰੋਨਾ ਵਾਇਰਸ ਵਰਗੀ ਮਹਾਮਾਰੀ ਨਾਲ ਨਜਿੱਠਣ ਲਈ ਤਿਆਰ ਹੈ। ਭਾਰਤ ਵਿੱਚ ਐਨ-95 ਮਾਸਕ ਅਤੇ ਨਿੱਜੀ ਸੁਰੱਖਿਆ ਉਪਕਰਨਾਂ (ਪੀ ਪੀ ਈ) ਬਣਾਉਣ ਨੂੰ ਭਾਰੀ ਧੱਕਾ ਲੱਗਾ, ਕਿਉਂਕਿ ਇਹ ਸਾਮਾਨ ਚੀਨ ਅਤੇ ਦੱਖਣ ਕੋਰੀਆ ਤੋਂ ਇੰਪੋਰਟ ਕੀਤੇ ਜਾਂਦੇ ਹਨ ਤੇ ਦੋਵਾਂ ਦੇਸ਼ਾਂ ਵਿੱਚ ਕੋਰੋਨਾ ਦੇ ਕਹਿਰ ਤੋਂ ਬਾਅਦ ਸਪਲਾਈ ਵਿੱਚ ਵੱਡੀ ਗਿਰਾਵਟ ਆਈ ਹੈ।
ਕੱਲ੍ਹ ਵਿਦੇਸ਼ ਮੰਤਰੀ ਐੱਸ ਜੈਸ਼ੰਕਰ ਨੇ ਚੀਨੀ ਵਿਦੇਸ਼ ਮੰਤਰੀ ਵਾਂਗ ਯੀ ਨਾਲ ਫੋਨ ਉਤੇ ਦੋਵਾਂ ਦੇਸ਼ਾਂ 'ਚ ਕੋਰੋਨਾ ਵਾਇਰਸ ਦੇ ਪ੍ਰਭਾਵ ਬਾਰੇ ਗੱਲਬਾਤ ਕੀਤੀ ਤਾਂ ਵਾਂਗ ਨੇ ਭਾਰਤ ਨੂੰ ਅਪੀਲ ਕੀਤੀ ਕਿ ਇਸ ਵਾਇਰਸ ਨੂੰ ਚਾਈਨੀਜ਼ ਬ੍ਰਾਂਡ ਨਾ ਕੀਤਾ ਜਾਵੇ, ਇਸ ਨਾਲ ਦੁਨੀਆ ਵਿੱਚ ਚੀਨ ਦਾ ਅਕਸ ਖਰਾਬ ਹੁੰਦਾ ਹੈ।