ਬਰੈਂਪਟਨ, 1 ਅਪਰੈਲ (ਪੋਸਟ ਬਿਊਰੋ) : ਵਿਲੀਅਮ ਓਸਲਰ ਹੈਲਥ ਸਿਸਟਮ ਫਾਊਂਡੇਸ਼ਨ (ਓਸਲਰ ਫਾਊਂਡੇਸ਼ਨ) ਵੱਲੋਂ ਕੋਵਿਡ-19 ਨਾਲ ਵਿੱਢੀ ਗਈ ਲੜਾਈ ਵਾਸਤੇ ਵਿਲੀਅਮ ਓਸਲਰ ਹੈਲਥ ਸਿਸਟਮ (ਓਸਲਰ) ਲਈ ਇਕ ਮਿਲੀਅਨ ਡਾਲਰ ਇੱਕਠੇ ਕਰਨ ਦਾ ਐਲਾਨ ਕੀਤਾ ਗਿਆ ਹੈ।
ਜਿ਼ੰਦਗੀਆਂ ਬਚਾਉਣ ਲਈ ਲੋੜੀਂਦਾ ਸਾਜ਼ੋ ਸਮਾਨ ਖਰੀਦਣ ਵਾਸਤੇ ਓਸਲਰ ਦੇ ਹੈਲਥ ਕੇਅਰ ਵਰਕਰਜ਼ ਦੀ ਆਰਥਿਕ ਮਦਦ ਲਈ ਹੈਲਥ ਕੇਅਰ ਹੀਰੋਜ਼ ਕੈਂਪੇਨ ਲਾਂਚ ਕੀਤੀ ਗਈ ਹੈ। ਇਸ ਦੌਰਾਨ ਇੱਕਠੇ ਕੀਤੇ ਗਏ ਫੰਡਾਂ ਨਾਲ ਲੋੜੀਂਦਾ ਸਾਜੋ਼ ਸਮਾਨ, ਜਿਵੇਂ ਕਿ ਪਰਸਨਲ ਪ੍ਰੋਟੈਕਟਿਵ ਇਕਿਉਪਮੈਂਟ (ਪੀਪੀਈ), ਵੈਂਟੀਲੇਟਰਜ਼, ਸਟਰੈਚਰਜ਼, ਵਾਈਟਲ ਸਾਈਨ ਮੌਨੀਟਰਜ਼ ਤੇ ਥਰਮਾਮੀਟਰ ਆਦਿ, ਫੌਰੀ ਤੌਰ ਉੱਤੇ ਖਰੀਦਿਆ ਜਾਵੇਗਾ। ਜਿਹੜੇ ਲੋਕ ਇਸ ਸਬੰਧ ਵਿੱਚ ਡੋਨੇਸ਼ਨ ਦੇਣੀ ਚਾਹੁੰਦੇ ਹਨ ਉਹ oslerfoundation.org/covid19 ੳੱੁਤੇ ਵਿਜਿ਼ਟ ਕਰ ਸਕਦੇ ਹਨ।
ਓਸਲਰ ਫਾਊਂਡੇਸ਼ਨ ਦੇ ਚੇਅਰ ਬੌਬ ਪੀਕੌਕ ਨੇ ਆਖਿਆ ਕਿ ਸਾਡੇ ਹਸਪਤਾਲਾਂ ਦੀਆਂ ਲੋੜਾਂ ਫੌਰੀ ਤੌਰ ਉੱਤੇ ਪੂਰੀਆਂ ਹੋਣੀਆਂ ਬਹੁਤ ਜ਼ਰੂਰੀ ਹਨ ਤੇ ਸਿਹਤ ਸੰਭਾਲ ਲਈ ਓਸਲਰ ਉੱਤੇ ਨਿਰਭਰ ਕਰਨ ਵਾਲਿਆਂ ਦੀ ਹੈਲਥ ਤੇ ਸੇਫਟੀ ਯਕੀਨੀ ਬਣਾਉਣ ਲਈ ਕਮਿਊਨਿਟੀ ਦਾ ਸਹਿਯੋਗ ਵੀ ਜ਼ਰੂਰੀ ਹੈ। ਉਨ੍ਹਾਂ ਅੱਗੇ ਆਖਿਆ ਕਿ ਅਸੀਂ ਇਹ ਜਾਣਦੇ ਹਾਂ ਕਿ ਕਈਆਂ ਲਈ ਇਹ ਸਮਾਂ ਬਹੁਤ ਮੁਸ਼ਕਲ ਹੈ ਤੇ ਇਸ ਸੰਕਟ ਦੀ ਘੜੀ ਨਾਲ ਮੱਥਾ ਲਾਉਣ ਲਈ ਫੰਡਾਂ ਦੀ ਬਹੁਤ ਲੋੜ ਹੈ।
ਆਰਬੀਸੀ ਡੌਮੀਨੀਅਨ ਸਕਿਊਰਿਟੀਜ਼ ਨਾਲ ਵੈਲਥ ਸਲਾਹਕਾਰ ਵਜੋਂ ਕੰਮ ਕਰ ਰਹੇ ਤੇ ਓਸਲਰ ਫਾਊਂਡੇਸ਼ਨ ਬੋਰਡ ਮੈਂਬਰ ਸਟੀਵ ਰੌਬਿਨਸਨ ਵੱਲੋਂ ਇਸ ਸਮੇਂ ਹਾਸਲ ਹੋਣ ਵਾਲੀ 250,000 ਡਾਲਰ ਤੱਕ ਦੀ ਰਕਮ ਦੇ ਬਰਾਬਰ ਰਕਮ ਦਿੱਤੀ ਜਾ ਰਹੀ ਹੈ। ਇਸ ਤੋਂ ਭਾਵ ਹੈ ਕਿ ਹੁਣ ਤੱਕ ਜਿੰਨੀ ਵੀ ਡੋਨੇਸ਼ਨ ਹਾਸਲ ਹੋਈ ਹੈ ਉਹ ਦੁੱਗਣੀ ਹੋ ਚੱੁਕੀ ਹੈ।