ਟੋਰਾਂਟੋ, 1 ਅਪਰੈਲ (ਪੋਸਟ ਬਿਊਰੋ) : ਕੋਵਿਡ-19 ਕਾਰਨ ਮੌਤ ਦੇ ਐਨ ਨੇੜੇ ਪਹੁੰਚੇ ਲੋਕਾਂ ਦੀ ਦੇਖਭਾਲ ਵਿੱਚ ਲੱਗੀ ਇੱਕ ਪਰਸਨਲ ਸਪੋਰਟ ਵਰਕਰ ਦਾ ਕਹਿਣਾ ਹੈ ਕਿ ਆਊਟਬ੍ਰੇਕ ਨੂੰ ਰੋਕਣ ਲਈ ਉਸ ਨੂੰ ਤੇ ਉਸ ਦੇ ਕੁਲੀਗਜ਼ ਨੂੰ ਸਹੀ ਪ੍ਰੋਟੈਕਟਿਵ ਸਾਜ਼ੋ ਸਮਾਨ ਵੀ ਨਹੀਂ ਦਿੱਤਾ ਗਿਆ।
ਵ੍ਹਿਸਲਬਲੋਅਰ, ਜਿਸ ਦਾ ਨਾਂ ਜੂਲੀ ਦੱਸਿਆ ਜਾਂਦਾ ਹੈ, ਨੇ ਆਖਿਆ ਕਿ ਇਹ ਸਮਸਿਆ ਪ੍ਰੋਟੈਕਟਿਵ ਗੇਅਰ, ਜਿਵੇਂ ਕਿ ਮਾਸਕਸ ਆਦਿ, ਦੀ ਕਮੀ ਦੀ ਨਹੀਂ ਹੈ ਸਗੋਂ ਚਿੰਤਾ ਦੀ ਗੱਲ ਇਹ ਹੈ ਕਿ ਕਿਤੇ ਇਸ ਸਾਜੋ਼ ਸਮਾਨ ਵਿੱਚ ਕੋਈ ਕਮੀ ਨਾ ਆ ਜਾਵੇ ਇਸ ਲਈ ਇਸ ਨੂੰ ਸਟੋਰ ਕਰਕੇ ਰੱਖਿਆ ਜਾ ਰਿਹਾ ਹੈ। ਜੂਲੀ ਨੇ ਆਖਿਆ ਕਿ ਇਹ ਸਾਰਾ ਸਮਾਨ ਉੱਥੇ ਹੀ ਮੌਜੂਦ ਹੈ ਤੇ ਉਨ੍ਹਾਂ ਨੇ ਇਸ ਨੂੰ ਬੇਸਮੈਂਟ ਵਿੱਚ ਤਾਲਾਬੰਦ ਕਰਕੇ ਰੱਖਿਆ ਹੋਇਆ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਉਹ ਇਸ ਨੂੰ ਬਚਾਅ ਕੇ ਰੱਖ ਰਹੇ ਹਨ। ਉਸ ਨੇ ਦੱਸਿਆ ਕਿ ਉਸ ਨੂੰ ਕਿਸੇ ਅਜਿਹੇ ਵਿਅਕਤੀ ਨੂੰ ਮਾਸਕ ਪੁਆਉਣ ਨਹੀਂ ਦਿੱਤਾ ਜਾਂਦਾ ਜਿਸ ਨੂੰ ਘੰਘ ਹੋਵੇ।
ਇੱਥੇ ਦੱਸਣਾ ਬਣਦਾ ਹੈ ਕਿ ਦੇਸ ਭਰ ਵਿੱਚ ਆਊਟਬ੍ਰੇਕ ਹੋਣ ਦੀ ਸੂਰਤ ਵਿੱਚ ਲਾਂਗ ਟਰਮ ਕੇਅਰ ਫੈਸਿਲਿਟੀਜ਼ ਘਾਤਕ ਹੀ ਸਿੱਧ ਹੋਈਆਂ ਹਨ। ਜੂਲੀ ਨੇ ਆਖਿਆ ਕਿ ਉਸ ਨੂੰ ਡਰ ਹੈ ਕਿ ਫੇਸ ਮਾਸਕ ਤੋਂ ਬਿਨਾਂ ਉਹ ਸੁੱਤੇ ਸਿਧ ਹੀ ਵਾਇਰਸ ਇਕ ਰੈਜ਼ੀਡੈਂਟ ਤੋਂ ਦੂਜੇ ਤਕ ਫੈਲਾਈ ਜਾ ਰਹੀ ਹੈ। 60,000 ਹੈਲਥਕੇਅਰ ਵਰਕਰਜ਼ ਦੀ ਨੁਮਾਇੰਦਗੀ ਕਰਨ ਵਾਲੀ ਐਸਈਆਈਯੂ ਹੈਲਥਕੇਅਰ ਦੇ ਪ੍ਰੈਜ਼ੀਡੈਂਟ ਸਰਲੀਨ ਸਟੀਵਾਰਟ ਨੇ ਆਖਿਆ ਕਿ ਲਾਂਗ ਟਰਮ ਕੇਅਰ ਹੋਮਜ਼ ਵਿ਼ਚ ਕੰਮ ਕਰਨ ਵਾਲਿਆਂ ਲਈ ਉਹ ਚਿੰਤਤ ਹਨ।
ਜਿ਼ਕਰਯੋਗ ਹੈ ਕਿ ਓਨਟਾਰੀਓ ਵਿੱਚ ਇਹ ਨਿਰਦੇਸ਼ ਹਨ ਕਿ ਪਰਸਨਲ ਪ੍ਰੋਟੈਕਟਿਵ ਇਕਿਉਪਮੈਂਟ ਜਾਂ ਪੀਪੀਈ ਸਿਰਫ ਉਸ ਸਮੇਂ ਹੀ ਕਿਸੇ ਵਿਅਕਤੀ ਨੂੰ ਮੁਹੱਈਆ ਕਰਵਾਏ ਜਾਣ ਜਦੋਂ ਉਸ ਦੇ ਮਾਮਲੇ ਦੀ ਪੁਸ਼ਟੀ ਹੋ ਜਾਵੇ।