ਮਾਸਕੋ, ਰੂਸ, 31 ਮਾਰਚ (ਪੋਸਟ ਬਿਊਰੋ) : ਮਾਸਕੋ ਦੇ ਮੱੁਖ ਕਰੋਨਾਵਾਇਰਸ ਹਸਪਤਾਲ ਦੇ ਮੁਖੀ, ਜਿਸ ਨੇ ਇੱਕ ਹਫਤੇ ਪਹਿਲਾਂ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਨਾਲ ਮੁਲਾਕਾਤ ਕੀਤੀ ਸੀ, ਦਾ ਟੈਸਟ ਪਾਜ਼ੀਟਿਵ ਆਇਆ ਹੈ। ਦੂਜੇ ਪਾਸੇ ਕ੍ਰੈਮਲਿਨ ਵੱਲੋਂ ਕੀਤੇ ਗਏ ਐਲਾਨ ਅਨੁਸਾਰ ਪੁਤਿਨ ਬਿਲਕੁਲ ਸਿਹਤਮੰਦ ਤੇ ਠੀਕਠਾਕ ਹਨ।
ਬੀਤੇ ਮੰਗਲਵਾਰ ਡੈਨਿਸ ਪ੍ਰੌਤਸੈਂਕੋ ਨੇ ਰੂਸ ਦੇ ਆਗੂ ਨਾਲ ਮੁਲਾਕਾਤ ਕੀਤੀ ਸੀ। ਪੁਤਿਨ ਉਸ ਸਮੇਂ ਕੋਮੂਨਾਰਕਾ ਹਸਪਤਾਲ ਦਾ ਮੁਆਇਨਾ ਕਰਨ ਗਏ ਸਨ। ਉਨ੍ਹਾਂ ਨੇ ਗੂੜ੍ਹੇ ਰੰਗ ਦਾ ਹਜ਼ਮਤ ਸੂਟ ਪਾਇਆ ਹੋਇਆ ਸੀ। ਪਰ 67 ਸਾਲਾ ਪੁਤਿਨ ਨੂੰ ਬਿਨਾਂ ਕਿਸੇ ਪ੍ਰੋਟੈਕਟਿਵ ਗੇਅਰ ਦੇ ਪ੍ਰੌਤਸੈਂਕੋ ਨਾਲ ਗੱਲਬਾਤ ਕਰਦਿਆਂ ਵੀ ਵੇਖਿਆ ਗਿਆ।
ਕ੍ਰੈਮਲਿਨ ਦੇ ਬੁਲਾਰੇ ਦਮਿੱਤਰੀ ਪੈਸਕੋਵ ਨੇ ਫੌਰੀ ਰੂਸੀ ਏਜੰਸੀਆਂ ਨੂੰ ਦੱਸਿਆ ਕਿ ਪੁਤਿਨ ਵੱਲੋਂ ਨਿਯਮਿਤ ਤੌਰ ਉੱਤੇ ਆਪਣੀ ਜਾਂਚ ਕਰਵਾਈ ਜਾ ਰਹੀ ਹੈ ਤੇ ਉਨ੍ਹਾਂ ਦੀ ਸਿਹਤ ਬਾਰੇ ਚਿੰਤਾ ਕਰਨ ਦੀ ਕੋਈ ਲੋੜ ਨਹੀਂ ਹੈ। ਸੱਭ ਕੁੱਝ ਠੀਕ ਠਾਕ ਹੈ। ਪ੍ਰੌਤਸੈਂਕੋ ਨੇ ਆਖਿਆ ਕਿ ਉਸ ਦਾ ਟੈਸਟ ਭਾਵੇਂ ਪਾਜ਼ੀਟਿਵ ਆਇਆ ਹੈ ਪਰ ਉਹ ਠੀਕ ਮਹਿਸੂਸ ਕਰ ਰਹੇ ਹਨ। ਉਨ੍ਹਾਂ ਨੇ ਮਾਸਕ ਤੇ ਹਰੇ ਰੰਗ ਦੇ ਸਕਰੱਬਜ਼ ਵਾਲੀ ਤਸਵੀਰ ਫੇਸਬੱੁਕ ਉੱਤੇ ਸਾਂਝੀ ਕਰਕੇ ਆਖਿਆ ਕਿ ਉਨ੍ਹਾਂ ਨੇ ਆਪਣੇ ਆਫਿਸ ਵਿੱਚ ਹੀ ਖੁਦ ਨੂੰ ਆਈਸੋਲੇਟ ਕਰ ਲਿਆ ਹੈ ਤੇ ਉਹ ਕੰਮ ਕਰਨਾ ਜਾਰੀ ਰੱਖਣਗੇ।
ਪਿਛਲੇ 24 ਘੰਟਿਆਂ ਵਿੱਚ ਰੂਸੀ ਅਧਿਕਾਰੀਆਂ ਵੱਲੋਂ 500 ਨਵੇਂ ਮਾਮਲੇ ਰਿਪੋਰਟ ਕੀਤੇ ਗਏ ਹਨ। ਹੁਣ ਤੱਕ ਰੂਸ ਵਿੱਚ ਕਰੋਨਾਵਾਇਰਸ ਦਾ ਸਿ਼ਕਾਰ ਹੋਏ ਲੋਕਾਂ ਦੀ ਗਿਣਤੀ 2,337 ਹੋ ਚੁੱਕੀ ਹੈ ਤੇ ਉੱਥੇ ਇਸ ਮਹਾਮਾਰੀ ਕਾਰਨ 17 ਵਿਅਕਤੀ ਮੌਤ ਦੇ ਮੂੰਹ ਜਾ ਪਏ ਹਨ। ਰੂਸ ਵਿੱਚ ਕੋਵਿਡ-19 ਦੇ ਸੱਭ ਤੋਂ ਵੱਧ ਮਾਮਲੇ ਮਾਸਕੋ ਵਿੱਚ ਸਾਹਮਣੇ ਆਏ ਹਨ।