ਨਵੀਂ ਦਿੱਲੀ, 30 ਮਾਰਚ (ਪੋਸਟ ਬਿਊਰੋ)- ਅਫ਼ਗਾਨਿਸਤਾਨ ਵਿੱਚ ਕੋਰੋਨਾ ਵਾਇਰਸ ਦੇ ਵੱਧਦੇ ਕੇਸਾਂ ਕਾਰਨ ਭਾਰਤ ਨੇ ਆਪਣੇ ਹੇਰਾਤ ਤੇ ਜਲਾਲਾਬਾਦ ਦੇ ਕੌਂਸਲੇਟਾਂ ਤੋਂ ਸਟਾਫ਼ ਨੂੰ ਕਾਬੁਲ ਤਬਦੀਲ ਕਰ ਦਿੱਤਾ ਹੈ।
ਵਰਨਣ ਯੋਗ ਹੈ ਕਿ ਅਫ਼ਗਾਨਿਸਤਾਨ ਦੀ ਸਰਹੱਦ ਇਰਾਨ ਨਾਲ ਲੱਗਦੀ ਹੈ, ਜਿਹੜਾ ਮਹਾਮਾਰੀ ਨਾਲ ਬਹੁਤ ਜਿ਼ਆਦਾ ਪ੍ਰਭਾਵਿਤ ਦੇਸ਼ਾਂ ਵਿੱਚੋਂ ਇੱਕ ਹੈ। ਸਰਕਾਰੀ ਸੂਤਰਾਂ ਮੁਤਬਾਕ ਸਾਵਧਾਨੀ ਵਜੋਂ ਕੂਟਨੀਤਕਾਂ ਤੇ ਹੋਰ ਸਟਾਫ਼ ਨੂੰ ਕਾਬੁਲ ਲਿਆਂਦਾ ਗਿਆ ਹੈ। ਅਫ਼ਗਾਨਿਸਤਾਨ ਵਿੱਚ ਕੋਰੋਨਾ ਵਾਇਰਸ ਦੇ 110 ਕੇਸ ਸਾਹਮਣੇ ਆ ਚੁੱਕੇ ਹਨ, ਪਰ ਅਸਲ ਗਿਣਤੀ ਇਸ ਤੋਂ ਕਿਤੇ ਵੱਧ ਹੋਣ ਦੀ ਸੰਭਾਵਨਾ ਹੈ। ਸਿਹਤ ਮਾਹਿਰਾਂ ਦਾ ਕਹਿਣਾ ਹੈ ਕਿ ਕਈ ਸੂਬਿਆਂ ਵਿੱਚ ਗਿਣਤੀ ਕਾਫ਼ੀ ਵੱਧ ਹੋ ਸਕਦੀ ਹੈ, ਕਿਉਂਕਿ ਲੈਬ ਟੈਸਟ ਦੀ ਸਹੁਲਤ ਨਹੀਂ ਹੈ। ਅਫ਼ਗਾਨ ਮੀਡੀਆ ਮੁਤਾਬਕ ਦੋ ਵਿਦੇਸ਼ੀ ਦੂਤ ਤੇ ਨਾਟੋ ਸਹਿਯੋਗ ਮਿਸ਼ਨ ਦੇ ਚਾਰ ਅਧਿਕਾਰੀ ਵੀ ਪਾਜ਼ੇਟਿਵ ਹਨ। ਸੂਤਰਾਂ ਮੁਤਾਬਕ ਭਾਰਤੀ ਸਟਾਫ਼ ਨੂੰ ਇਸ ਕਰ ਕੇ ਵੀ ਏਥੋਂ ਤਬਦੀਲ ਕੀਤਾ ਗਿਆ ਹੈ ਕਿ ਇਥੇ ਲੋੜੀਂਦੀ ਮੈਡੀਕਲ ਸਹੂਲਤ ਵੀ ਨਹੀਂ ਹੈ। ਅਫ਼ਗਾਨਿਸਤਾਨ ਦੀ ਇਰਾਨ ਨਾਲ ਕਾਫ਼ੀ ਲੰਮੀ ਸਰਹੱਦ ਲੱਗਦੀ ਹੈ। ਇਰਾਨ ਨੂੰ ਇਸ ਬਿਮਾਰੀ ਨਾਲ ਨਜਿੱਠਣ 'ਚ ਬੇਹੱਦ ਔਖ ਆ ਰਹੀ ਹੈ। ਕੁਝ ਰਿਪੋਰਟਾਂ ਮੁਤਾਬਕ ਵੱਡੀ ਗਿਣਤੀ ਅਫ਼ਗਾਨ ਸ਼ਰਨਾਰਥੀ ਮੁਲਕ ਪਰਤ ਰਹੇ ਹਨ ਕਿਉਂਕਿ ਇਰਾਨ ਵਿੱਚ ਸਥਿਤੀ ਕਾਫ਼ੀ ਨਾਜ਼ੁਕ ਹੈ।