ਮਕਸੂਦਾਂ, 30 ਮਾਰਚ (ਪੋਸਟ ਬਿਊਰੋ)- ਸਬਜ਼ੀ ਮੰਡੀ ਮਕਸੂਦਾਂ ਦੇ ਆਲੇ-ਦੁਆਲੇ ਕੈਮੀਕਲ ਨਾਲ ਅਦਰਕ ਧੋਣ ਦਾ ਧੰਦਾ ਸ਼ਰੇਆਮ ਲੰਬੇ ਸਮੇਂ ਤੋਂ ਰਾਜਨੀਤਿਕ ਸਰਪ੍ਰਸਤੀ ਹੇਠ ਚੱਲ ਰਿਹਾ ਹੈ। ਕੱਲ੍ਹ ਕੈਮੀਕਲ ਨਾਲ ਅਦਰਕ ਧੋ ਰਹੇ ਲੋਕਾਂ ਦੀ ਸ਼ਿਕਾਇਤ ਮੰਡੀ ਬੋਰਡ ਤੇ ਸਿਹਤ ਵਿਭਾਗ ਕੋਲ ਪੁੱਜੀ ਤਾਂ ਟੀਮ ਨੇ ਛਾਪਾ ਮਾਰ ਕੇ ਕਈ ਕੁਇੰਟਲ ਅਦਰਕ ਕਬਜ਼ੇ ਵਿੱਚ ਲੈ ਲਿਆ। ਮੌਕੇ 'ਤੇ ਪੁੱਜੇ ਕੁਝ ਕਾਂਗਰਸੀ ਲੀਡਰ ਦੋਸ਼ੀਆਂ ਦੇ ਹੱਕ ਵਿੱਚ ਹੋ ਜਾਣ ਕਾਰਨ ਦੋਸ਼ੀ ਫ਼ਰਾਰ ਹੋ ਗਏ ਅਤੇ ਸ਼ਾਮ ਤੱਕ ਵਿਭਾਗ ਅਦਰਕ ਦੇ ਮਾਲਕਾਂ ਤੱਕ ਨਹੀਂ ਪਹੁੰਚਿਅਆ।
ਇਸ ਮੌਕੇ ਓਥੇ ਪੁੱਜੇ ਮੁੱਖ ਸਿਹਤ ਅਧਿਕਾਰੀ ਐਸ ਐਸ ਨਾਗਲ ਨੇ ਦੱਸਿਆ ਕਿ ਦੋਸ਼ੀ ਫ਼ਰਾਰ ਹੋ ਗਏ ਹਨ, ਜੇ ਅਦਰਕ ਦੇ ਮਾਲਕ ਸਾਹਮਣੇ ਆਉਣ ਤਾਂ ਵਿਭਾਗ ਇਸ ਦੇ ਸੈਂਪਲ ਭਰੇਗਾ ਅਤੇ ਦੋਸ਼ੀ ਪਾਏ ਜਾਣ 'ਤੇ ਕਾਰਵਾਈ ਹੋਵੇਗੀ। ਦੂਜੇ ਪਾਸੇ ਜ਼ਿਲ੍ਹਾ ਮੰਡੀ ਬੋਰਡ ਅਧਿਕਾਰੀ ਦਵਿੰਦਰ ਸਿੰਘ ਨੇ ਦੱਸਿਆ ਕਿ ਕੁੱਲ 79 ਬੋਰੀਆਂ ਅਦਰਕ ਫੜੀਆਂ ਗਈਆਂ ਹਨ ਪਰ ਅਦਰਕ ਦਾ ਕੋਈ ਮਾਲਕ ਸਾਹਮਣੇ ਨਹੀਂ ਆ ਰਿਹਾ। ਸਿਹਤ ਵਿਭਾਗ ਨੇ ਸੈਂਪਲ ਲੈਣ ਤੋਂ ਇਨਕਾਰ ਕਰ ਦਿੱਤਾ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਪਹਿਲਾ ਮਾਲਕ ਨੂੰ ਸਾਹਮਣੇ ਆਵੇ ਪਰ ਕੋਈ ਆੜ੍ਹਤੀ ਹਾਲੇ ਸਾਹਮਣੇ ਨਹੀਂ ਆਇਆ।