ਨਵੀਂ ਦਿੱਲੀ, 30 ਮਾਰਚ, (ਪੋਸਟ ਬਿਊਰੋ)- ਭਾਰਤ ਵਿੱਚ ਕੋਰੋਨਾ ਵਾਇਰਸ ਦੇ ਪੀੜਤਾਂ ਦੀ ਗਿਣਤੀ 1200 ਤੋਂ ਟੱਪ ਗਈ ਹੈ। ਸੋਮਵਾਰ ਨੂੰ ਕੋਰੋਨਾ ਦੇ ਮਰੀਜ਼ਾਂ ਦੇ 217 ਨਵੇਂ ਕੇਸ ਪਤਾ ਲੱਗੇ ਅਤੇ ਹੋਰ ਪੰਜ ਮਰੀਜ਼ਾਂ ਦੀ ਮੌਤ ਹੋ ਗਈ ਹੈ। ਇਸ ਨਾਲ ਮਰਨ ਵਾਲਿਆਂ ਦੀ ਗਿਣਤੀ 32 ਹੋ ਗਈ ਹੈ।
ਇਸ ਸੰਬੰਧ ਵਿੱਚ ਭਾਰਤ ਦੇ ਸਿਹਤ ਮੰਤਰਾਲੇ ਅਤੇ ਰਾਜ ਸਰਕਾਰਾਂ ਦੇ ਸਿਹਤ ਵਿਭਾਗਾਂ ਦੇ ਦੱਸਣ ਅਨੁਸਾਰ ਦੇਸ਼ ਵਿੱਚ ਤਕ ਕੋਰੋਨਾ ਵਾਇਰਸ ਦੇ ਅੱਜ ਤੱਕ ਕੁੱਲ 1251 ਕੇਸ ਪਤਾ ਲੱਗੇ ਹਨ। ਇਨ੍ਹਾਂ ਵਿੱਚੋਂ 32 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ, 49 ਵਿਦੇਸ਼ੀ ਨਾਗਰਿਕ ਅਤੇ ਤੰਦਰੁਸਤ ਹੋ ਚੁੱਕੇ 111 ਲੋਕ ਸ਼ਾਮਲ ਹਨ। ਮਹਾਰਾਸ਼ਟਰ ਵਿੱਚ 17 ਨਵੇਂ ਕੇਸ ਮਿਲਣ ਨਾਲ ਪੀੜਤਾਂ ਦੀ ਗਿਣਤੀ 220 ਹੋ ਗਈ ਹੈ। ਸੋਮਵਾਰ ਮੁੰਬਈ ਵਿੱਚ ਤਿੰਨ ਅਤੇ ਪੁਣੇ ਵਿੱਚ ਇਕ ਜਣੇ ਦੀ ਮੌਤ ਹੋਈ ਤੇ ਮੁੰਬਈ ਵਿੱਚ 86 ਸਾਲ ਦੀ ਇਕ ਔਰਤ ਅਤੇ 47 ਸਾਲਾ ਪੁਰਸ਼ ਨੇ ਦਮ ਤੋੜ ਦਿੱਤਾ। ਮਹਿਲਾ ਆਪਣੇ ਬੇਟੇ ਦੇ ਸੰਪਰਕ ਵਿੱਚ ਆਉਣ ਨਾਲ ਪ੍ਰਭਾਵਤ ਹੋਈ ਸੀ। ਮਹਾਰਾਸ਼ਟਰ ਵਿੱਚ ਅੱਜ ਤਕ ਨੌਂ ਜਣਿਆਂ ਦੀ ਕੋਰੋਨਾ ਨਾਲ ਮੌਤ ਹੋ ਚੁੱਕੀ ਹੈ।
ਕੇਰਲ ਵਿੱਚ ਸੋਮਵਾਰ 32 ਨਵੇਂ ਕੇਸ ਲੱਭਣ ਨਾਲ ਪੀੜਤਾਂ ਦੀ ਗਿਣਤੀ 234 ਹੋ ਗਈ ਹੈ, ਜਿਹੜੀ ਭਾਰਤ ਵਿੱਚ ਸਭ ਤੋਂ ਵੱਧ ਹੈ। ਕਰਨਾਟਕ ਵਿੱਚ ਪੰਜ ਨਵੇਂ ਕੇਸ ਪਤਾ ਲੱਗੇ ਤੇ ਗਿਣਤੀ 88 ਹੋ ਗਈ ਹੈ। ਤਾਮਿਲ ਨਾਡੂ ਵਿੱਚ 17 ਨਵੇਂ ਕੇਸ ਮਿਲੇ ਤੇ ਪੀੜਤਾਂ ਦਾ ਅੰਕੜਾ 67 ਤੱਕ ਚਲਾ ਗਿਆ ਹੈ। ਨਵੇਂ ਕੇਸਾਂ ਵਿੱਚ ਇਕੱਲੇ ਇਰੋਡ ਜ਼ਿਲ੍ਹੇ ਦੇ 10 ਕੇਸ ਹਨ। ਰਾਜਸਥਾਨ ਵਿੱਚ 10 ਨਵੇਂ ਕੇਸ ਮਿਲਣ ਨਾਲ ਕੁੱਲ 69 ਕੇਸ ਹੋ ਗਏ ਹਨ। ਜੰਮੂ-ਕਸ਼ਮੀਰ ਵਿੱਚ 11 ਨਵੇਂ ਕੇਸਾਂ ਨਾਲ ਮਰੀਜ਼ਾਂ ਦੀ ਗਿਣਤੀ 49 ਹੋ ਗਈ ਹੈ, ਜਿਨ੍ਹਾਂ ਵਿੱਚੋਂ ਦੋ ਜਣੇ ਠੀਕ ਹੋ ਚੁੱਕੇ ਤੇ ਦੋ ਦੀ ਮੌਤ ਹੋ ਗਈ ਹੈ। ਮੱਧ ਪ੍ਰਦੇਸ਼ ਵਿੱਚ ਸੋਮਵਾਰ ਨੂੰ ਅੱਠ ਕੇਸ ਪਤਾ ਲੱਗੇ ਅਤੇ ਮਰੀਜ਼ਾਂ ਦੀ ਗਿਣਤੀ 47 ਹੋ ਗਈ ਹੈ। ਆਂਧਰਾ ਪ੍ਰਦੇਸ਼ ਵਿੱਚ ਦੋ ਨਵੇਂ ਕੇਸਾਂ ਨਾਲ ਗਿਣਤੀ 23 ਹੋ ਗਈ ਹੈ। ਅੱਜ ਸੋਮਵਾਰ ਮਹਾਰਾਸ਼ਟਰ ਦੇ ਤਿੰਨ ਲੋਕਾਂ ਅਤੇ ਗੁਜਰਾਤ ਦੇ ਇਕ ਵਿਅਕਤੀ ਦੀ ਮੌਤ ਹੋ ਗਈ। ਗੁਜਰਾਤ ਵਿੱਚ ਸੱਤ ਨਵੇਂ ਕੇਸ ਮਿਲਣ ਨਾਲ ਮਰੀਜ਼ਾਂ ਦੀ ਗਿਣਤੀ 70 ਹੋ ਗਈ ਹੈ। ਇਸ ਰਾਜ ਵਿੱਚ ਅੱਜ ਤਕ ਛੇ ਜਣਿਆਂ ਦੀ ਕੋਰੋਨਾ ਨਾਲ ਮੌਤ ਹੋ ਚੁੱਕੀ ਹੈ। ਪੰਜ ਨਵੇਂ ਕੇਸਾਂ ਨਾਲ ਚੰਡੀਗੜ੍ਹ ਵਿੱਚ ਮਰੀਜ਼ਾਂ ਦੀ ਗਿਣਤੀ 13 ਹੋ ਗਈ ਹੈ। ਅੰਡੇਮਾਨ ਨਿਕੋਬਾਰ ਵਿੱਚ ਇਕ ਨਵੇਂ ਕੇਸ ਨਾਲ 10 ਮਰੀਜ਼ ਹੋ ਗਏ ਹਨ। ਉੱਤਰ ਪ੍ਰਦੇਸ਼ ਵਿੱਚ ਕੋਰੋਨਾ ਦੇ ਮਰੀਜ਼ਾਂ ਦੀ ਗਿਣਤੀ 85 ਹੋ ਗਈ ਹੈ। 3 ਨਵੇਂ ਕੇਸਾਂ ਨਾਲ ਤੇਲੰਗਾਨਾ ਵਿੱਚ ਪੀੜਤਾਂ ਦੀ ਗਿਣਤੀ 70 ਹੋ ਗਈ ਤੇ ਪੰਜ ਨਵੇਂ ਕੇਸਾਂ ਨਾਲ ਪੱਛਮੀ ਬੰਗਾਲ ਵਿੱਚ ਵੀ ਮਰੀਜ਼ਾਂ ਦੀ ਗਿਣਤੀ 22 ਹੋ ਗਈ ਹੈ।