ਨਵੀਂ ਦਿੱਲੀ, 30 ਮਾਰਚ, (ਪੋਸਟ ਬਿਊਰੋ)- ਕੋਰੋਨਾ ਵਾਇਰਸ ਦੇ ਕਾਰਨ ਮਰਨ ਵਾਲੇ ਵਿਅਕਤੀ ਦੀ ਲਾਸ਼ ਦਾ ਅੰਤਿਮ ਸਸਕਾਰ ਕਰਨ ਬਾਰੇ ਵਿਸ਼ਵ ਸਿਹਤ ਸੰਗਠਨ (ਡਬਲਿਊ ਐੱਚ ਓ) ਨੇ ਗਾਈਡਲਾਈਨ ਜਾਰੀ ਕੀਤੀ ਹੈ ਕਿ ਇਨਫੈਕਸ਼ਨ ਦੀ ਰੋਕਥਾਮ, ਮਹਾਮਾਰੀ ਉੱਤੇ ਕੰਟਰੋਲ ਅਤੇ ਸਿਹਤ ਸੰਭਾਲ ਦਾ ਧਿਆਨ ਰੱਖ ਕੇ ਏਦਾਂ ਦੀ ਲਾਸ਼ ਨੂੰ ਆਈਸੋਲੇਸ਼ਨ ਰੂਮ ਜਾਂ ਕਿਸੇ ਖੇਤਰ ਤੋਂ ਏਧਰ-ਓਧਰ ਲਿਜਾਣ ਦੌਰਾਨ ਲਾਸ਼ ਦੇ ਸੰਪਰਕ ਵਿੱਚ ਆਉਣ ਤੋਂ ਬਚਣ ਲਈ ਸੀਲਡ ਬਕਸੇ ਵਿੱਚ ਲਿਜਾ ਕੇ ਇਸ ਨੂੰ ਅਗਨ ਭੇਟ ਕਰਨਾ ਹੀ ਠੀਕ ਹੋਵੇਗਾ।
ਡਬਲਿਊ ਐੱਚ ਓ ਦੀ ਹਦਾਇਤ ਮੁਤਾਬਕ ਮੁਰਦਾਘਰ ਵਿੱਚ ਲਾਸ਼ ਦੀ ਸੰਭਾਲ ਅਤੇ ਪੋਸਟ ਮਾਰਟਮ ਲਈ ਕੋਰੋਨਾ ਦੇ ਪੀੜਤ ਦੀ ਲਾਸ਼ ਮੁਰਦਾਘਰ ਤੋਂ ਸ਼ਮਸ਼ਾਨਘਾਟ ਜਾਂ ਕਬਰਸਤਾਨ ਲਿਜਾਣ ਤੋਂ ਪਹਿਲਾਂ ਸੀਲਡ ਬਾਡੀ ਬੈਗ ਵਿੱਚ ਪੂਰੀ ਤਰ੍ਹਾਂ ਸੀਲ ਕੀਤਾ ਜਾਣਾ ਚਾਹੀਦਾ ਹੈ ਤਾਂ ਕਿ ਲਾਸ਼ ਦੇ ਫਲੂਇਡਸ ਦੀ ਲੀਕੇਜ ਨਾ ਹੋ ਸਕੇ। ਲਾਸ਼ ਨੂੰ ਸੰਭਾਲਣ ਵਾਲੇ ਲੋਕਾਂ ਲਈ ਡਿਸਪੋਜ਼ੇਬਲ ਅਤੇ ਲੰਮੇ ਕਾਲਰ ਅਤੇ ਕਫ਼ ਵਾਲੇ ਗਾਊਨ ਦੀ ਵਰਤੋਂ ਲਈ ਕਿਹਾ ਗਿਆ ਹੈ। ਲਾਸ਼ ਦੇ ਬਾਹਰੀ ਹਿੱਸੇ ਉੱਤੇ ਬਾਡੀ ਫਲੂਇਡਸ, ਮੈਲਾ ਜਾਂ ਕੋਈ ਲੀਕੇਜ ਦਿਖਾਈ ਦੇਵੇ ਤਾਂ ਗਾਊਨ ਵਾਟਰ ਪਰੂਫ਼ ਚਾਹੀਦਾ ਹੈ।
ਵਿਸ਼ਵ ਸਿਹਤ ਸੰਗਠਨ ਦੇ ਮੁਤਾਬਕ ਮੁਰਦਾਘਰ ਦੇ ਸਟਾਫ ਅਤੇ ਅੰਤਿਮ ਸਸਕਾਰ ਕਰਨ ਵਾਲਿਆਂ ਨੂੰ ਹੱਥਾਂ ਨੂੰ ਸਮੁੱਚੇ ਤੌਰ ਉੱਤੇ ਸਟੈਂਡਰਡ ਚੌਕਸੀ ਰੱਖਣੀ ਚਾਹੀਦੀ ਤੇ ਯੋਗ ਨਿੱਜੀ ਸੁਰੱਖਿਆ ਯੰਤਰਾਂ ਦੀ ਵਰਤੋਂ ਕਰਨੀ ਚਾਹੀਦੀ ਹੈ।
ਇਸ ਦੌਰਾਨ ਮਹਾਰਾਸ਼ਟਰ ਦੀ ਸਰਕਾਰ ਨੇ ਕਿਹਾ ਹੈ ਕਿ ਕੋਰੋਨਾ ਨਾਲ ਮਰਨ ਵਾਲੇ ਹਰੇਕ ਵਿਅਕਤੀ ਦੀ ਲਾਸ਼ ਨੂੰ ਸਾੜਨਾ ਹੋਵੇਗਾ, ਭਾਵੇਂ ਉਹ ਕਿਸੇ ਵੀ ਧਰਮ ਦਾ ਹੋਵੇ, ਉਸ ਨੂੰ ਦਫ਼ਨਾਉਣ ਦੀ ਆਗਿਆ ਨਹੀਂ ਹੋਵੇਗੀ। ਅੰਤਿਮ ਸਸਕਾਰ ਲਈ ਸਿਰਫ਼ ਪੰਜ ਲੋਕ ਜਾਣਗੇ। ਮੰਨਿਆ ਜਾਂਦਾ ਹੈ ਕਿ ਲਾਸ਼ ਦਫ਼ਨਾਉਣ ਨਾਲ ਹੋਰਨਾਂ ਵਿੱਚ ਇਨਫੈਕਸ਼ਨ ਦੀ ਸੰਭਾਵਨਾ ਰਹਿੰਦੀ ਹੈ, ਇਸ ਲਈ ਲਾਸ਼ ਨੂੰ ਸਾੜਨਾ ਹੀ ਇਨਫੈਕਸ਼ਨ ਫੈਲਣ ਤੋਂ ਰੋਕਣ ਲਈ ਠੀਕ ਤਰੀਕਾ ਹੈ।