ਮਾਂਟਰੀਅਲ, 30 ਮਾਰਚ (ਪੋਸਟ ਬਿਊਰੋ) : ਕੋਵਿਡ-19 ਕਾਰਨ ਘਾਟਾ ਝੱਲ ਰਹੀ ਏਅਰ ਕੈਨੇਡਾ ਵੱਲੋਂ ਆਰਜ਼ੀ ਤੌਰ ਉੱਤੇ 16,500 ਕਰਮਚਾਰੀਆਂ ਦੀ ਛਾਂਗੀ ਕੀਤੀ ਜਾਵੇਗੀ। ਇਹ ਛਾਂਗੀ ਇਸ ਹਫਤੇ ਤੋਂ ਹੀ ਸ਼ੁਰੂ ਕਰ ਦਿੱਤੀ ਜਾਵੇਗੀ।
ਮਾਂਟਰੀਅਲ ਸਥਿਤ ਏਅਰਲਾਈਨ ਦੀਆਂ ਉਡਾਨਾਂ ਦੀ ਸਮਰੱਥਾ ਵਿੱਚ ਅਚਾਨਕ ਆਈ ਕਮੀ ਦੇ ਚੱਲਦਿਆਂ 15,200 ਯੂਨੀਅਨ ਵਰਕਰਾਂ ਤੇ 1300 ਮੈਨੇਜਰਾਂ ਨੂੰ ਕੱਢਣ ਦਾ ਕੰਮ ਇਸ ਸੁ਼ੱਕਰਵਾਰ ਤੋਂ ਸੁ਼ਰੂ ਹੋਵੇਗਾ ਤੇ ਅਪਰੈਲ ਤੇ ਮਈ ਤੱਕ ਚੱਲੇਗਾ। ਇੱਕ ਬਿਆਨ ਜਾਰੀ ਕਰਕੇ ਏਅਰਲਾਈਨ ਦੇ ਚੀਫ ਐਗਜੈ਼ਕਟਿਵ ਕੈਲਿਨ ਰੋਵਿਨੈਸਕੂ ਨੇ ਆਖਿਆ ਕਿ ਐਨੀ ਵੱਡੀ ਗਿਣਤੀ ਵਿੱਚ ਆਪਣੇ ਕਰਮਚਾਰੀਆਂ ਦੀ ਛਾਂਗੀ ਕਰਨਾ ਸਾਡੇ ਲਈ ਬਹੁਤ ਦੁਖਦਾਈ ਫੈਸਲਾ ਹੈ ਪਰ ਹਾਲ ਦੀ ਘੜੀ ਕੰਮ ਵਿੱਚ ਆਈ ਕਮੀ ਕਾਰਨ ਸਾਨੂੰ ਇਹ ਫੈਸਲਾ ਕਰਨਾ ਪੈ ਰਿਹਾ ਹੈ।
ਗਲੋਬਲ ਸ਼ੱਟਡਾਊਨ ਕਾਰਨ ਏਅਰਲਾਈਨ ਵੱਲੋਂ ਆਪਣੀਆਂ ਬਹੁਤੇ ਕੌਮਾਂਤਰੀ ਤੇ ਅਮਰੀਕਾ ਵਾਲੇ ਰੂਟਸ ਬੰਦ ਕੀਤੇ ਹੋਏ ਹਨ। ਏਅਰ ਕੈਨੇਡਾ ਨੇ ਆਖਿਆ ਕਿ ਉਨ੍ਹਾਂ ਦੀ ਇਸ ਸਕੀਮ ਨਾਲ ਉਨ੍ਹਾਂ ਨੂੰ 500 ਮਿਲੀਅਨ ਡਾਲਰ ਦੀ ਬਚਤ ਹੋਵੇਗੀ। ਇੱਥੇ ਦੱਸਣਾ ਬਣਦਾ ਹੈ ਕਿ ਸੀਈਓ ਤੇ ਚੀਫ ਫਾਇਨਾਂਸ਼ੀਅਲ ਆਫੀਸਰ ਮਾਈਕ ਰੌਸੀਊ ਵੱਲੋਂ ਆਪਣੀਆਂ 100 ਫੀ ਸਦੀ ਤਨਖਾਹਾਂ ਛੱਡੀਆਂ ਜਾ ਰਹੀਆਂ ਹਨ ਜਦਕਿ ਬਾਕੀ ਦੀ ਐਗਜੈ਼ਕਟਿਵ ਟੀਮ ਵਲੋਂ 25 ਫੀ ਸਦੀ ਤੇ 50 ਫੀ ਸਦੀ ਤਨਖਾਹ ਨਹੀਂ ਲਈ ਜਾਵੇਗੀ।