ਟੋਰਾਂਟੋ, 30 ਮਾਰਚ (ਪੋਸਟ ਬਿਊਰੋ) : ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦਾ ਕਹਿਣਾ ਹੈ ਕਿ ਹੈਲਥ ਕੈਨੇਡਾ ਇਹ ਯਕੀਨੀ ਬਣਾਵੇਗਾ ਕਿ ਚੀਨ ਤੋਂ ਆਉਣ ਵਾਲੇ ਮਾਸਕਸ ਤੇ ਮੈਡੀਕਲ ਸਾਜ਼ੋ ਸਮਾਨ ਦਾ ਚੰਗੀ ਤਰ੍ਹਾਂ ਮੁਲਾਂਕਣ ਹੋਵੇ। ਇਹ ਐਲਾਨ ਉਦੋਂ ਆਇਆ ਜਦੋਂ ਡਚ ਸਰਕਾਰ ਵੱਲੋਂ ਕਥਿਤ ਤੌਰ ਉੱਤੇ ਚੀਨ ਤੋਂ ਇੰਪੋਰਟ ਕੀਤੇ ਗਏ 600,000 ਨੁਕਸ ਵਾਲੇ ਮਾਸਕ ਵਾਪਿਸ ਮੰਗਵਾ ਲਏ।
ਆਪਣੀ ਓਟਵਾ ਸਥਿਤ ਰਿਹਾਇਸ਼ ਦੇ ਬਾਹਰੋਂ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਟਰੂਡੋ ਨੇ ਆਖਿਆ ਕਿ ਆਉਣ ਵਾਲੇ ਦਿਨਾਂ ਵਿੱਚ ਕੈਨੇਡਾ ਹੋਰ ਮੈਡੀਕਲ ਸਪਲਾਈਜ਼ ਚੀਨ ਤੋਂ ਮੰਗਾਵੇਗਾ। ਇਸ ਦੇ ਨਾਲ ਹੀ ਉਨ੍ਹਾਂ ਕੈਨੇਡਾ ਦੇ ਲੋਕਾਂ ਨੂੰ ਇਹ ਭਰੋਸਾ ਵੀ ਦਿਵਾਇਆ ਕਿ ਹੈਲਥ ਕੈਨੇਡਾ ਕੋਲ ਮੁਲਾਂਕਣ ਕਰਨ ਲਈ ਬਹੁਤ ਹੀ ਦਮਦਾਰ ਪ੍ਰਕਿਰਿਆ ਹੈ ਤੇ ਇਸ ਮਾਮਲੇ ਵਿੱਚ ਕੋਈ ਵੀ ਲਿਹਾਜ ਨਹੀਂ ਕੀਤੀ ਜਾਵੇਗੀ।
ਇਹ ਵੀ ਪਤਾ ਲੱਗਿਆ ਹੈ ਕਿ ਹਾਲੈਂਡ ਦੇ ਹੈਲਥ ਮੰਤਰੀ ਨੇ ਆਪਣੇ ਹਸਪਤਾਲਾਂ ਨੂੰ ਉਹ ਮਾਸਕ ਪਰਤਾਉਣ ਲਈ ਆਖਿਆ ਹੈ ਜਿਨ੍ਹਾਂ ਨੂੰ ਲਾ ਕੇ ਫਰੰਟਲਾਈਨ ਵਰਕਰਜ਼ ਕੋਵਿਡ-19 ਮਰੀਜ਼ਾਂ ਦਾ ਇਲਾਜ ਕਰ ਰਹੇ ਹਨ। ਸ਼ਨਿੱਚਰਵਾਰ ਨੂੰ ਓਟਵਾ ਸਥਿਤ ਚੀਨ ਦੀ ਅੰਬੈਸੀ ਨੇ ਆਖਿਆ ਸੀ ਕਿ ਚੀਨ ਵੱਲੋਂ 30,000 ਮੈਡੀਕਲ ਮਾਸਕਸ, 10,000 ਸੈੱਟ ਪ੍ਰੋਟੈਕਟਿਵ ਕਲੋਦਿੰਗ, 10,000 ਗੌਗਲਜ਼ ਤੇ 50,000 ਜੋੜੀ ਦਸਤਾਨੇ ਸ਼ੱੁਕਰਵਾਰ ਨੂੰ ਕੈਨੇਡਾ ਭੇਜੇ ਗਏ ਸਨ। ਅੰਬੈਸੀ ਨੇ ਇਹ ਵੀ ਆਖਿਆ ਕਿ ਇਸ ਸਮਾਨ ਦੀ ਖੇਪ ਤੋਂ ਬਾਅਦ ਐਨ95 ਮਾਸਕਸ ਦੀ ਖੇਪ ਵੀ ਆਉਣ ਵਾਲੀ ਹੈ।