ਅੰਮ੍ਰਿਤਸਰ, 29 ਮਾਰਚ, (ਪੋਸਟ ਬਿਊਰੋ)- ਪੰਜਾਬ ਵਿਚ ਕੋਰੋਨਾ ਵਾਇਰਸ ਦੀ ਬਿਮਾਰੀ ਦੇ ਨਾਲ ਪਾਜਿ਼ਟਿਵ ਪਾਏ ਗਏ ਇਕ ਹੋਰ ਮਰੀਜ਼ ਦੀ ਮੌਤ ਹੋ ਗਈ ਹੈ। ਪਿੰਡ ਮੋਰਾਂਵਾਲੀ ਜ਼ਿਲ੍ਹਾ ਹੁਸ਼ਿਆਰਪੁਰ ਦਾ ਹਰਭਜਨ ਸਿੰਘ ਤੋਂ ਪਾਜਿ਼ਟਿਵ ਸਾਬਤ ਹੋਣ ਕਾਰਨ ਸਰਕਾਰੀ ਮੈਡੀਕਲ ਕਾਲਜ ਅੰਮ੍ਰਿਤਸਰ ਵਿਖ਼ੇ ਇਲਾਜ ਚੱਲ ਰਿਹਾ ਸੀ। ਉਹ ਕੋਰੋਨਾ ਨਾਲ ਪੰਜਾਬ ਵਿਚ ਸਭ ਤੋਂ ਪਹਿਲਾਂ ਮਰਨ ਵਾਲੇ ਗਿਆਨੀ ਬਲਦੇਵ ਸਿੰਘ ਪਿੰਡ ਪਠਲਾਵਾ ਦਾ ਸਾਥੀ ਸੀ ਅਤੇ ਉਸ ਦੇ ਨਾਲ ਰਿਹਾ ਸੀ। ਹਰਭਜਨ ਸਿੰਘ ਦੇ ਪਾਜ਼ਿਟਿਵ ਪਾਏ ਜਾਣ ਦੇ ਲਗਪਗ ਇਕ ਹਫ਼ਤਾ ਪਿੱਛੋਂ ਹਰਭਜਨ ਸਿੰਘ ਦੀ ਪਤਨੀ, ਉਨ੍ਹਾਂ ਦਾ ਬੇਟਾ ਤੇ ਨੂੰਹ ਵੀ ਪਾਜਿ਼ਟਿਵ ਪਾਏ ਗਏ ਸਨ ਅਤੇ ਇਨ੍ਹਾਂ ਸਾਰਿਆਂ ਦਾ ਇਲਾਜ ਚੱਲ ਰਿਹਾ ਹੈ।
ਹਰਭਜਨ ਸਿੰਘ ਦੀ ਮੌਤ ਦੀ ਪੁਸ਼ਟੀ ਕਰਦਿਆਂ ਪੰਜਾਬ ਦੇ ਚੀਫ ਸੈਕਟਰੀ ਕੇ ਬੀ ਐੱਸ ਸਿੱਧੂ ਨੇ ਦੱਸਿਆ ਹੈ ਕਿ ਹਰਭਜਨ ਸਿੰਘ (ਉਮਰ 60-65 ਸਾਲ) ਸ਼ੂਗਰ ਅਤੇ ਬਲੱਡ ਪ੍ਰੈਸ਼ਰ ਦਾ ਵੀ ਮਰੀਜ਼ ਸੀ। ਇਸ ਦੀ ਮੌਤ ਮੈਡੀਕਲ ਕਾਲਜ ਹਸਪਤਾਲ ਅੰਮ੍ਰਿਤਸਰ ਵਿੱਚ ਐਤਵਾਰ ਸ਼ਾਮ ਨੂੰ ਹੋਈ ਹੈ। ਇਸ ਤੋਂ ਪਹਿਲਾਂ ਕੋਰੋਨਾ ਵਾਇਰਸ ਕਾਰਨ ਜਿ਼ਲਾ ਨਵਾਂ ਸ਼ਹਿਰ ਦੇ ਪਿੰਡ ਪਠਲਾਵਾ ਦੇ ਗਿਆਨੀ ਬਲਦੇਵ ਸਿੰਘ ਦੀ ਮੌਤ ਹੋਈ ਸੀ, ਉਹ ਜਰਮਨੀ ਤੋਂ ਆਇਆ ਸੀ। ਅੱਜ ਪ੍ਰਾਣ ਤਿਆਗ ਗਿਆ ਹਰਭਜਨ ਸਿੰਘ ਵੀ ਓਸੇ ਬਲਦੇਵ ਸਿੰਘ ਦਾ ਸਾਥੀ ਸੀ ਅਤੇ ਉਸ ਦੇ ਨਾਲ ਰਹਿੰਦਾ ਸੀ।
ਪੰਜਾਬ ਵਿੱਚ ਅੱਜ ਐਤਵਾਰ ਤੱਕ ਪੁਸ਼ਟੀ ਹੋਏ ਕੇਸਾਂ ਦੀ ਗਿਣਤੀ 38 ਹੈ, ਪਰ 190 ਹੋਰ ਸ਼ੱਕੀ ਕੇਸਾਂ ਦੀ ਜਾਂਚ ਰਿਪੋਰਟ ਦੀ ਉਡੀਕ ਕੀਤੀ ਜਾ ਰਹੀ ਹੈ। ਰਾਜ ਦੇ ਸਿਹਤ ਵਿਭਾਗ ਤੋਂ ਜਾਰੀ ਹੋਏ ਮੀਡੀਆ ਬੁਲੇਟਿਨ ਮੁਤਾਬਕ ਅੱਜ ਤੱਕ ਲਏ ਗਏ 977 ਸੈਂਪਲਾਂ ਵਿਚੋਂ 38 ਪਾਜ਼ੀਟਿਵ ਤੇ 749 ਨੈਗੇਟਿਵ ਨਿਕਲੇ ਹਨ। ਇਸ ਰਾਜ ਵਿੱਚ 38 ਕੇਸ ਪੰਜ ਜ਼ਿਲਿਆਂ ਤੋਂ ਪਤਾ ਲੱਗੇ ਹਨ, ਜਿਨ੍ਹਾਂ ਵਿੱਚੋਂ 19 ਕੇਸ ਨਵਾਂ ਸ਼ਹਿਰ ਦੇ, 6 ਕੇਸ ਮੋਹਾਲੀ ਅਤੇ 6 ਹੁਸ਼ਿਆਰਪੁਰ ਨਾਲ ਸਬੰਧਤ ਹਨ। ਇਸ ਤੋਂ ਇਲਾਵਾ 5 ਕੇਸ ਜਲੰਧਰ ਦੇ ਹਨ ਅਤੇ ਇਕ-ਇਕ ਕੇਸ ਅੰਮ੍ਰਿਤਸਰ ਅਤੇ ਲੁਧਿਆਣਾ ਜਿ਼ਲੇ ਦਾ ਹੈ।