ਚਰਚਾ ਹੈ ਕਿ ਸੰਜੇ ਲੀਲਾ ਭੰਸਾਲੀ ਆਪਣੀ ਬਣ ਰਹੀ ਫਿਲਮ ‘ਗੰਗੂਬਾਈ ਕਾਠਿਆਵਾੜੀ’ ਤੋਂ ਬਾਅਦ ਅਗਲੀ ਫਿਲਮ ਵਜੋਂ ਫਿਲਮ ‘ਬੈਜੂ ਬਾਵਰਾ’ ਬਣਾਉਣ ਦਾ ਇਰਾਦਾ ਪੱਕਾ ਕਰ ਚੁੱਕੇ ਹਨ। ਫਿਲਮ ਦੀ ਸਕ੍ਰਿਪਟ ਪੂਰੀ ਹੋ ਚੁੱਕੀ ਹੈ ਅਤੇ ਭੰਸਾਲੀ ਨੇ ਇਸ ਦੇ ਸੰਗੀਤ 'ਤੇ ਕੰਮ ਸ਼ੁਰੂ ਕਰ ਦਿੱਤਾ ਹੈ। ਇਸ ਫਿਲਮ ਵਿੱਚ ਉਹ ਰਣਵੀਰ ਸਿੰਘ ਅਤੇ ਆਲੀਆ ਭੱਟ ਨੂੰ ਸਾਈਨ ਕਰਨਾ ਚਾਹੰੁਦੇ ਹਨ। ਸੂਤਰਾਂ ਅਨੁਸਾਰ ਇਸ ਵਿੱਚ ਕੰਮ ਕਰਨ ਲਈ ਰਣਵੀਰ ਸਿੰਘ ਅਤੇ ਆਲੀਆ ਨੇ ਸਿਧਾਂਤਕ ਮਨਜ਼ੂਰੀ ਦੇ ਦਿੱਤੀ ਹੈ। ਇਹ ਅਗਲੇ ਸਾਲ ਦੀਵਾਲੀ 'ਤੇ ਰਿਲੀਜ਼ ਹੋਵੇਗੀ। ਉਂਝ ਇਸ ਫਿਲਮ ਵਿੱਚ ਰਣਵੀਰ ਤੇ ਆਲੀਆ ਦੀ ਜੋੜੀ ਬਣੀ ਤਾਂ ਦੂਜੀ ਵਾਰ ਹੋਵੇਗਾ, ਜਦੋਂ ਉਹ ਦੋਵੇਂ ਸੁਨਹਿਰੀ ਪਰਦੇ 'ਤੇ ਇਕੱਠੇ ਨਜ਼ਰ ਆਉਣਗੇ।
ਜ਼ਿਕਰ ਯੋਗ ਹੈ ਕਿ ਪਿਛਲੇ ਸਾਲ ਰਿਲੀਜ਼ ਫਿਲਮ ‘ਗਲੀ ਬੁਆਏ’ ਵਿੱਚ ਦੋਵਾਂ ਨੇ ਬਿਹਤਰੀਨ ਕੰਮ ਕੀਤਾ ਸੀ। ਮੁਰਾਦ ਤੇ ਸੈਫੀਨਾ ਦੇ ਅਭਿਨੈ ਦੀ ਲੋਕਾਂ ਨੇ ਖੂਬ ਤਾਰੀਫ ਕੀਤੀ ਸੀ। ਆਪਣੇ ਅਭਿਨੈ ਦੇ ਦਮ 'ਤੇ ਦੋਵਾਂ ਨੇ ਕਈ ਇਨਾਮ ਵੀ ਆਪਣੇ ਨਾਂਅ ਕੀਤੇ। ਜ਼ਿਕਰ ਯੋਗ ਹੈ ਕਿ ‘ਬੈਜੂ ਬਾਵਰਾ’ ਦੇ ਕਿਰਦਾਰ 'ਤੇ ਹਿੰਦੀ ਸਿਨੇਮਾ 'ਚ 1952 ਵਿੱਚ ਪਹਿਲੀ ਫਿਲਮ ਰਿਲੀਜ਼ ਹੋਈ ਸੀ, ਜਿਸ ਦਾ ਨਿਰਦੇਸ਼ਨ ਵਿਜੇ ਭੱਟ, ਜਦ ਕਿ ਸੰਗੀਤ ਨੌਸ਼ਾਦ ਨੇ ਦਿੱਤਾ ਸੀ। ਫਿਲਮ ਵਿੱਚ ਮੀਨਾ ਕੁਮਾਰੀ ਅਤੇ ਭਾਰਤ ਭੂਸ਼ਣ ਮੁੱਖ ਭੂਮਿਕਾਵਾਂ ਵਿੱਚ ਨਜ਼ਰ ਆਏ ਸਨ। ਬੈਜੂ ਬਾਵਰਾ 15ਵੀਂ ਸਦੀ ਦੇ ਮਸ਼ਹੂਰ ਸੰਗੀਤਕਾਰ ਸਨ। ਉਨ੍ਹਾਂ ਨੇ ਅਕਬਰ ਦੇ ਦਰਬਾਰ ਵਿੱਚ ਸ਼ਾਸਤਰੀ ਸੰਗੀਤ ਦੇ ਇੱਕ ਮਹਾਨ ਗਿਆਤਾ ਤਾਨਸੇਨ ਨੂੰ ਸੰਗੀਤ ਮੁਕਾਬਲੇ ਲਈ ਚੁਣੌਤੀ ਦਿੱਤੀ ਸੀ। ਉਹ ਤਾਨਸੇਨ ਨੂੰ ਆਪਣੇ ਸੰਗੀਤਕਾਰ ਪਿਤਾ ਦੀ ਮੌਤ ਦਾ ਜ਼ਿੰਮੇਵਾਰ ਮੰਨਦੇ ਸਨ।