ਖੁਦ ਨੂੰ ਬਾਲੀਵੁੱਡ 'ਚ ਅਭਿਨੇਤਰੀ ਵਜੋਂ ਸਾਬਿਤ ਕਰਨ ਲਈ ਯਤਨਸ਼ੀਲ ਨੋਰਾ ਫਤੇਹੀ ਪਿੱਛੇ ਜਿਹੇ ਪੈਰਿਸ ਵਿੱਚ ਆਪਣੇ ਡਾਂਸ ਦਾ ਜਲਵਾ ਦਿਖਾਉਣ ਤੋਂ ਬਾਅਦ ਇੱਕ ਨਵੇਂ ਮਿਊਜ਼ਿਕ ਵੀਡੀਓ ਦੀ ਤਿਆਰੀ ਕਰ ਰਹੀ ਹੈ। ਉਹ ਆਪਣਾ ਇਹ ਤੀਜਾ ਸਿੰਗਲ ਗੀਤ ਇੱਕ ਕੌਮਾਂਤਰੀ ਕਲਾਕਾਰ ਨਾਲ ਮਿਲ ਕੇ ਤਿਆਰ ਕਰ ਰਹੀ ਹੈ। ਉਸ ਨੇ ਕਿਹਾ, ‘‘ਇਹ ਇੱਕ ਅੰਗਰੇਜ਼ੀ ਕਮਰਸ਼ੀਅਲ ਪੌਪ ਸੌਂਗ ਹੈ, ਜੋ ਇਸ ਸਾਲ ਰਿਲੀਜ਼ ਹੋਵੇਗਾ। ਮੈਂ ਮੋਰਾਕੋ ਤੋਂ ਪਰਤੀ ਹਾਂ, ਜਿੱਥੇ ਇਸ 'ਤੇ ਕੰਮ ਕਰ ਰਹੀ ਸੀ। ਇਸ ਬਾਰੇ ਮੈਂ ਅਸਲ ਵਿੱਚ ਉਤਸ਼ਾਹਤ ਹਾਂ।”
ਫਿਲਮ ‘ਸਟਰੀਟ ਡਾਂਸਰ 3 ਡੀ’ ਦੇ ਨਾਲ ਸਾਲ ਸ਼ੁਰੂ ਕਰਨ ਪਿੱਛੋਂ ਨੋਰਾ ਫਤੇਹੀ ਦੀਆਂ ਅਗਲੀਆਂ ਫਿਲਮਾਂ ਵਿੱਚ ‘ਭੁਜ: ਦਿ ਪ੍ਰਾਈਡ ਆਫ ਇੰਡੀਆ’ ਸ਼ਾਮਲ ਹੈ, ਜਿਸ ਵਿੱਚ ਉਹ ਜਾਸੂਸ ਬਣੀ ਨਜ਼ਰ ਆਏਗੀ। ਫਿਲਮ ਲਈ ਉਸ ਨੇ ਜਨਵਰੀ ਵਿੱਚ ਸ਼ੂਟਿੰਗ ਸ਼ੁਰੂ ਕੀਤੀ ਸੀ ਤੇ ਐਕਸ਼ਨ ਦਿ੍ਰਸ਼ਾਂ ਲਈ ਮਿਕਸਡ ਮਾਰਸ਼ਲ ਆਰਟਸ ਸਿੱਖ ਰਹੀ ਹੈ। ਇਸ ਰੋਲ ਬਾਰੇ ਉਹ ਕਹਿੰਦੀ ਹੈ, ‘ਮੈਂ ਕਈ ਚੀਜ਼ਾਂ ਸਿੱਖੀਆਂ ਹਨ, ਜਿਸ ਵਿੱਚ ਕਿੱਕ ਅਤੇ ਮੁੱਕਾ ਮਾਰਨਾ, ਹੇਠਾਂ ਸੁੱਟਣਾ ਅਤੇ ਇਥੋਂ ਤੱਕ ਕਿ ਬੰਦੂਕ ਚਲਾਉਣਾ ਸਿਖਿਆ ਹੈ। ਇਹ ਜ਼ਬਰਦਸਤ ਭੂਮਿਕਾ ਹੈ, ਜੋ ਕਰੀਅਰ ਦਾ ਅਹਿਮ ਮੋੜ ਸਾਬਤ ਹੋਵੇਗੀ।” ਨੋਰਾ ਖੁਦ ਨੂੰ ਕਲਾਕਾਰ ਵਜੋਂ ਸਥਾਪਤ ਕਰਨਾ ਚਾਹੁੰਦੀ ਹੈ। ਉਹ ਕਹਿੰਦੀ ਹੈ, ‘‘ਕਿਸੇ ਇੱਕ ਰੋਲ 'ਚ ਟਾਈਪ ਕਾਸਟ ਹੋਣਾ ਇੱਕ ਕਲਾਕਾਰ ਦੀ ਤਰੱਕੀ ਵਿੱਚ ਰੁਕਾਵਟ ਪੈਦਾ ਕਰਦਾ ਹੈ। ਬਹੁਮੁਖੀ ਪ੍ਰਤਿਭਾ ਉਦੋਂ ਉਭਰੇਗੀ, ਜਦੋਂ ਕਲਾਕਾਰਾਂ ਨੂੰ ਇੱਕ ਹੀ ਤਰ੍ਹਾਂ ਦੇ ਰੋਲ ਵਿੱਚ ਚੰਗਾ ਹੋਣ ਨੂੰ ਲੈ ਕੇ ਲੋਕਾਂ ਦੀ ਧਾਰਨਾ ਗਾਇਬ ਹੋਵੇਗੀ। ਉਂਝ ਚੀਜ਼ਾਂ ਬਦਲ ਰਹੀਆਂ ਹਨ।”