ਕਰਨਾਲ, 29 ਮਾਰਚ (ਪੋਸਟ ਬਿਊਰੋ)- ਪਾਣੀਪਤ 'ਚ ਕੱਲ੍ਹ ਸਵੇਰੇ ਦੋ ਬੱਚਿਆਂ ਸਣੇ ਇੱਕੋ ਪਰਵਾਰ ਦੇ ਚਾਰ ਜੀਆਂ ਦੀ ਮੌਤ ਹੋ ਗਈ। ਇਹ ਘਟਨਾ ਰਾਸ਼ਨ ਡਿਪੂ ਚਲਾਉਣ ਵਾਲੇ ਅਨਿਲ ਸ਼ਰਮਾ ਦੇ ਘਰ ਦੀ ਹੈ, ਜਿਸ ਨੇ ਪਹਿਲਾਂ ਆਪਣੀ ਧੀ, ਪੁੱਤਰ ਅਤੇ ਪਤਨੀ ਨੂੰ ਗੋਲੀ ਮਾਰੀ ਅਤੇ ਫਿਰ ਆਪਣੇ ਆਪ ਨੂੰ ਵੀ ਗੋਲੀ ਮਾਰ ਲਈ।
ਮ੍ਰਿਤਕ ਅਨਿਲ ਸ਼ਰਮਾ ਦੇ ਸਹੁਰੇ ਨੇ ਦੱਸਿਆ ਕਿ ਉਸ ਦੀ ਧੀ ਪੂਨਮ ਦਾ ਵਿਆਹ 2008 ਵਿੱਚ ਅਨਿਲ ਸ਼ਰਮਾ ਨਾਲ ਹੋਇਆ ਸੀ। ਉਹ ਆਪਣੀ ਨੌਂ ਸਾਲ ਦੀ ਧੀ ਪ੍ਰਾਚੀ ਅਤੇ ਪੰਜ ਸਾਲ ਦੇ ਪੁੱਤਰ ਅੰਸ਼ੂ ਨਾਲ ਪਾਣੀਪਤ ਦੇ ਰਾਜਨਾਗਰ ਵਿੱਚ ਰਹਿ ਰਹੇ ਸਨ। ਕੱਲ੍ਹ ਸਵੇਰੇ ਉਨ੍ਹਾਂ ਨੂੰ ਅਨਿਲ ਦੇ ਗੁਆਂਢੀਆਂ ਨੇ ਫੋਨ ਕੀਤਾ ਕਿ ਘਰ ਵਿੱਚ ਸਾਰਿਆਂ ਦੀਆਂ ਲਾਸ਼ਾਂ ਪਈਆਂ ਹਨ। ਘਟਨਾ ਦੀ ਸੂਚਨਾ ਮਿਲਦੇ ਸਾਰ ਡੀ ਐਸ ਪੀ ਰਾਜੇਸ਼ ਅਤੇ ਸੰਦੀਪ ਸਿੰਘ ਮੌਕੇ 'ਤੇ ਪੁੱਜੇ। ਉਨ੍ਹਾਂ ਦੱਸਿਆ ਕਿ ਸਾਰਿਆਂ ਦੀ ਮੌਤ ਗੋਲੀਆਂ ਲੱਗਣ ਨਾਲ ਹੋਈ ਹੈ ਅਤੇ ਸਾਰੀਆਂ ਗੋਲੀਆਂ ਅਨਿਲ ਦੇ ਲਾਇਸੈਂਸੀ ਰਿਵਾਲਵਰ ਤੋਂ ਚੱਲੀਆਂ ਹਨ। ਪੂਨਮ ਦੇ ਪਿਤਾ ਤੇ ਭਰਾ ਦਾ ਦੋਸ਼ ਹੈ ਕਿ ਜ਼ਮੀਨੀ ਵਿਵਾਦ ਕਾਰਨ ਅਨਿਲ ਆਪਣੇ ਪਿਤਾ ਅਤੇ ਉਸ ਦੇ ਦਿਓਰ ਸਣੇ ਹੋਰ ਪਰਵਾਰਕ ਮੈਂਬਰਾਂ ਤੋਂ ਤੰਗ ਸੀ ਅਤੇ ਉਸ ਨੂੰ ਘਰ ਤੋਂ ਬੇਦਖਲ ਕਰਨ ਦਾ ਦਬਾਅ ਬਣਾਇਆ ਜਾ ਰਿਹਾ ਸੀ।