ਨਵੀਂ ਦਿੱਲੀ, 28 ਮਾਰਚ (ਪੋਸਟ ਬਿਊਰੋ)- ਪ੍ਰਸਿੱਧ ਚਿੱਤਰਕਾਰ ਅਤੇ ਆਰਕੀਟੈਕਟ ਸਤੀਸ਼ ਗੁਜਰਾਲ ਦਾ ਕੱਲ੍ਹ ਰਾਤ ਦਿੱਲੀ ਵਿੱਚ ਉਨ੍ਹਾਂ ਦੇ ਘਰ ਦੇਹਾਂਤ ਹੋ ਗਿਆ। ਵੱਖ-ਵੱਖ ਢੰਗਾਂ ਵਿੱਚ ਵੱਖਰੀ ਸ਼ੈਲੀ 'ਚ ਚਿੱਤਰਕਾਰੀ, ਬੁੱਤ-ਤਰਾਸ਼ੀ ਕਰਨ ਵਾਲੇ 94 ਸਾਲਾ ਸਤੀਸ਼ ਗੁਜਰਾਲ ਦੇ ਪਰਵਾਰ ਵਿੱਚ ਉਨ੍ਹਾਂ ਦੀ ਪਤਨੀ ਕਿਰਨ, ਧੀਆਂ ਅਰਪਨਾ ਤੇ ਰਸੀਲ ਅਤੇ ਪੁੱਤਰ ਮੋਹਿਤ ਹਨ। ਉਹ ਸਾਬਕਾ ਪ੍ਰਧਾਨ ਮੰਤਰੀ ਇੰਦਰ ਕੁਮਾਰ ਗੁਜਰਾਲ ਦੇ ਭਰਾ ਸਨ।
ਸਤੀਸ਼ ਗੁਜਰਾਲ ਦੇ ਭਤੀਜੇ ਤੇ ਰਾਜ ਸਭਾ ਮੈਂਬਰ ਨਰੇਸ਼ ਗੁਜਰਾਲ ਦੇ ਮੁਤਾਬਕ ਸਤੀਸ਼ ਨੇ ਬੀਤੀ ਰਾਤ ਆਪਣੇ ਘਰ ਦਸ ਵਜੇ ਬਿਰਧ ਅਵਸਥਾ ਕਾਰਨ ਪ੍ਰਾਣ ਤਿਆਗੇ ਹਨ। ਆਰਕੀਟੈਕਟ, ਚਿੱਤਰਕਾਰ, ਮੂਰਤੀਕਾਰ ਅਤੇ ਗ੍ਰਾਫਿਕਸ ਆਰਟਿਸਟ ਵੱਜੋਂ ਪਦਮ ਭੁਸ਼ਣ ਸਨਮਾਨ ਨਾਲ ਨਿਵਾਜੇ ਗਏ ਸਤੀਸ਼ ਗੁਜਰਾਲ ਦੀ ਮੌਤ ਉੱਤੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਦੁੱਖ ਪ੍ਰਗਟ ਕਰਦੇ ਹੋਏ ਕਿਹਾ ਕਿ ਉਹ ਬਹੁਪੱਖੀ ਸ਼ਖ਼ਸੀਅਤ ਸਨ ਤੇ ਉਨ੍ਹਾਂ ਆਪਣੀ ਸਿਰਜਣਾਤਮਕਤਾ ਤੇ ਦ੍ਰਿੜ੍ਹਤਾ ਨਾਲ ਮੁਸਬਤਾਂ ਨੂੰ ਪਛਾੜਿਆ। ਮੋਦੀ ਨੇ ਕਿਹਾ ਕਿ ਗੁਜਰਾਲ ਦੀ ਬੌਧਿਕ ਪਿਆਸ ਨੇ ਉਨ੍ਹਾਂ ਨੂੰ ਦੂਰ ਤੱਕ ਪੁੱਜਦਾ ਕੀਤਾ, ਪਰ ਫਿਰ ਵੀ ਉਹ ਆਪਣੀਆਂ ਜੜ੍ਹਾਂ ਨਾਲ ਜੁੜਾ ਰਹੇ।