ਰੋਮ, 27 ਮਾਰਚ (ਪੋਸਟ ਬਿਊਰੋ)- ਕੋਰੋਨਾ ਵਾਇਰਸ ਤੋਂ ਬੁਰੀ ਤਰ੍ਹਾਂ ਪ੍ਰਭਾਵਤ ਇਟਲੀ 'ਚ ਬਰਗਾਮੋ ਸ਼ਹਿਰ ਮਹਾਮਾਰੀ ਦਾ ਕੇਂਦਰ ਬਣ ਗਿਆ ਹੈ। ਏਥੇ ਵਾਇਰਸ ਦੇ ਬੇਕਾਬੂ ਹੋਣ ਦਾ ਇੱਕ ਅਹਿਮ ਕਾਰਨ ਪਤਾ ਲੱਗਾ ਹੈ।
ਮਾਹਰਾਂ ਦਾ ਮੰਨਣਾ ਹੈ ਕਿ ਐਟਲਾਂਟਾ ਅਤੇ ਵੇਲੈਂਸੀਆ ਵਿਚਕਾਰ ਸੈਨ ਸਿਰੋ ਸਟੇਡੀਅਮ ਵਿੱਚ ਖੇਡੇ ਗਏ ਫੁੱਟਬਾਲ ਮੈਚ ਕਾਰਨ ਸਵਾ ਲੱਖ ਦੀ ਆਬਾਦੀ ਵਾਲੇ ਬਰਗਾਮੋ ਵਿੱਚ ਵਾਇਰਸ ਤੇਜ਼ੀ ਨਾਲ ਫੈਲ ਗਿਆ। ਇਹ ਮੈਚ ਫਰਵਰੀ ਵਿੱਚ ਇਟਲੀ ਵਿੱਚ ਸਥਾਨਕ ਪੱਧਰ 'ਤੇ ਵਾਇਰਸ ਦਾ ਪਹਿਲਾ ਕੇਸ ਸਾਹਮਣੇ ਆਉਣ ਤੋਂ ਦੋ ਦਿਨ ਪਹਿਲੇ ਖੇਡਿਆ ਗਿਆ ਸੀ। ਮੈਚ ਵੇਲੇ ਸਟੇਡੀਅਮ ਵਿੱਚ 45,792 ਦਰਸ਼ਕ ਸਨ। ਇਸ ਯੂਰਪੀ ਦੇਸ਼ ਵਿੱਚ ਅੱਜ ਤੱਕ ਕਰੀਬ 75 ਹਜ਼ਾਰ ਲੋਕ ਇਸ ਵਾਇਰਸ ਤੋਂ ਪ੍ਰਭਾਵਤ ਨਿਕਲੇ ਹਨ ਅਤੇ ਸਾਢੇ ਸੱਤ ਹਜ਼ਾਰ ਤੋਂ ਜ਼ਿਆਦਾ ਦੀ ਮੌਤ ਹੋ ਚੁੱਕੀ ਹੈ।
ਉੱਤਰੀ ਇਟਲੀ ਦੇ ਮਿਲਾਨ ਸ਼ਹਿਰ ਤੋਂ ਕਰੀਬ 60 ਕਿਲੋਮੀਟਰ ਦੂਰ ਬਰਗਾਮੋ ਵਿੱਚ ਸਭ ਤੋਂ ਵੱਧ ਪੀੜਤ ਦੱਸੇ ਜਾਂਦੇ ਹਨ। ਸ਼ਹਿਰ ਵਿੱਚ ਵਿਗੜੇ ਹਾਲਾਤ ਨਾਲ ਨਜਿੱਠਣ ਲਈ ਫੌਜ ਲਾਈ ਗਈ ਹੈ। ਬਰਗਾਮੋ ਦੇ ਮੇਅਰ ਜਾਰਜੀਓ ਗੋਰੀ ਨੇ ਇੱਕ ਫੇਸਬੁਕ ਚੈਟ ਵਿੱਚ ਕਿਹਾ ਕਿ ਮੱਧ ਫਰਵਰੀ ਤੱਕ ਅਸੀਂ ਹਾਲਾਤ ਬਾਰੇ ਕੁਝ ਨਹੀਂ ਜਾਣਦੇ ਸੀ ਕਿ ਕੀ ਹੋ ਰਿਹਾ ਹੈ?। ਜੇ ਇਹ ਸੱਚ ਹੈ ਕਿ ਯੂਰਪ ਵਿੱਚ ਜਨਵਰੀ ਵਿੱਚ ਵਾਇਰਸ ਪੁੱਜ ਗਿਆ ਸੀ ਤਾਂ ਇਸ ਦੀ ਪੂਰੀ ਆਸ ਹੈ ਕਿ ਸੈਨ ਸਿਰੋ ਵਿੱਚ ਮੈਚ ਦੇਖਣ ਵਾਲੇ ਕਰੀਬ 45 ਹਜ਼ਾਰ ਬਰਗਾਮੋ ਵਾਸੀ ਵੀ ਕੋਰੋਨਾ ਦੇ ਵਾਇਰਸ ਤੋਂ ਪ੍ਰਭਾਵਤ ਹੋਏ ਹੋਣਗੇ। ਇਹ ਵੀ ਸੰਭਵ ਹੋ ਸਕਦਾ ਹੈ ਕਿ ਮੈਚ ਦੇਖਣ ਵਾਲਿਆਂ ਕਾਰਨ ਗਿਣਤੀ ਵੱਡੀ ਹੋ ਸਕਦੀ ਹੈ।